Três prizidenti na un ajatu

Éra un bes, três prizidenti staba na un ajatu la na néba ta bai.
Staba prizidenti di Mérka, prizidenti di Fransa y prizidenti di Kabu Verdi. Es staba ta konbersa sobri stadu di nason di ses país. Konbérsu staba rei di interesanti.
Pasadu un bokadu, prizidenti di Mérka fla: “gentis nu sta riba di Nova Iorki.”
Es pergunta-l: “Modi ki bu sabi?”
El fla-s: “N poi mon fóra di avion y N toka na un arranha séu.”
Gentis fla: “A bon …”
Es kontinua ta papia ti ki prizidenti di Fransa korta-s konbérsu y fla-s: “gentis nu sta ta sobrivoa Paris.”
Es pergunta-l: “Modi ki bu sabi?”
El fla-s: “N poi mon fóra di avion y N toka na torri Eifel.”
Gentis fla: “Sértumé …”
Papia di li papia di la, prizidenti di Kabu Verdi interronpi prizidenti di Mérka ki staba ta papia sobri situason ekonómiku atual y el fla-s: “gentis nu sta riba Praia.”
Es pergunta-l: “Modi ki bu sabi?”
El fla-s: “N poi mon fóra di avion gosi-li y N torna po-l déntu faxi, má mon ben sén nha riloji, sén nha anel di oru, y sén nha maskoti di oru di Purtugal.” Ahahahahahahahahahahahahahaha ….

Ka ta da-bu ngana da-l ku spóra?!

Agnelo A. Montrond

Éra un bes tenba un rapas ki ta gostaba di tene se karru sénpri luxadu. El ta ranjaba tudu di bon y di midjor pa se karru: ajanti largu, di kel más karu ki pode ten na merkadu automóvel; séntu tudu só di peli; sistéma di son di kel últimu gritu – ku kel anplifikador bodóna y kuatu kuluna putenti pa-l ta obi kel múzika N KA NPORTA.

Tudu kes asesórius midjor ki ten pa se karru, ki ta kaba mata éra un mersedes diskapotável miodinhu só di un lugar, el ta sakrifikaba txeu kuzas pe-l pode kunpra-s.

Se karru é se prioridadi númeru un. Éra própi un galantaria pa el, óras ki el ta fazeba kel bazofaria pa mostra algen kel se karru.

Un dia gó kantu el ba mostra se primu di Monti di Erriba, ki txigaba Mérka na prinsípiu, kel se karru, el panha baziu: el da bórta di fóra uns três ó kuatu bes ta mostra-l tudu kes tranfanfan ki el teneba na karru y dipos el mostra-l tudu kes bujigangas ki el teneba dentu di kel karru. Kantu el kaba mostra se primu tudu kes kuzas ki el teneba na se karru, se primu rabida na el y pergunta-l: “Má ka ta da-bu ngana da-l ku spóra?”

Anton nho po-m sinku kilu

Agnelo A. Montrond

Inda ka nén fazeba três dia ki Xibódi txigaba Lisboa. Tudu dia ki manxi Xibódi ta labantaba sédu palmanhan y el ta kumesaba ta anda di un pónta pa kel otu só na diskubri maravilhas di kel txon ki Déus anda ku pé.

Xibódi fla: “Lisboa gó é bunitu diskansadu! Inda nén metadi di es bunitéza N ka diskubri.”

Dja-l bai Sãu Béntu, dja-l spia kuazi tudu kes móntras más bunitu ki ten la, só ta pergunta présu di ropas y sapatu. Má nada el ka kunpra.

Finalmenti el txiga na un Kafé y tudu ratorku el razolve na pergunta présu di kafé:

“É nho, kantu é un kafé?”;

Inpregadu di kel Kafé risponde-l: “Un bika é sén ixkudu.”;

Xibodi pergunta-l: “Y sukri gó é kantu?”;

Inpregadu responde-l: “sukri gó é di grasa";

Xibodi fika uma kontenti y el fla kel inpregadu: “Anton nho po-m sinku kilu.”

ANEDÓTA: SANTXU KA TA ODJA SE RABU

Brockton, EUA, 29 di Agostu – Nha amigu Marsianu ta manda más stória pa N publika y N ta faze-l ku satisfason. Anedóta pa dia di oxi é:

Un profesora di Biolojia staba na aula. Mudjer ta odjaba fiota. Pa janela, el odja un vultu di kriansa distanti na patiu ta gadanha na arvuri. El ponta dedu pa kel vultu i, ku ar di trosa, el rabida el fla pa alunus:

- Nhos odja un prova ma omi ben di makaku!

Un di kes alunu trosentu korta profesora konbersu:

- Di makaku, non! Di ma-ka-KA!!!

- Pamodi ?! – prutesta profesora.

Kel mesmu alunu gaiatu, ku ar di gozu, kudi-l:- Pabia ki sa ta gadanha e fidju matxu nha!!!