Agnelo A Montrond
Puéta ta pintâ lua xeia ku pinsel na bu séu di amizadi
El ta sunhâ ku ténpu ku rima na meiu di bu liberdadi y fraternidadi
El ta buli-bu ku bida ku tudu lida na óra di bu partida
Fadigâ pa ki, si ka ten ninhun dinhéru ki ta dizinterrâ fidju-l parida
//
Puezia é alma y arma di puéta
Puéta é finjidor y fazedor di puezia sen el da-bu téta
Puéta é bu korpu bibu di puezia krusifikadu na krus di Pasárgada
Puezia é flôr ki ta enfeitâ arka azul ki é nos maior puéta
//
Puezia ta abrasâ y ta alegrâ bu tristéza
Puéta ta kebrâ y ta entristesê bu filisidadi ku sabura-l réza
Puezia é más ki rima y maiór ki métrika di bu spertéza
El é más grandi ki univérsu di vérsu-l bu miodéza
//
Puéta é más finjidor ki sina di bu distinu-l kunfiadéza
