Konbérsu Ku Mar!

Pa Agnelo A. Montrond

Dedikatória: N ta didika es puema pa tudu konbatentis di liberdadi di nos Pátria Kabu Verdi, ki ta konpleta 34 anu indipendenti, dia 5 di Julhu «kaminhu abértu pa filisidadi», ki e maior dia na stória di nos nason.

Mar!
Ó mar!
Éi mar!
Obi li mar!
Mar, e mi ki sa ta txoma-bu pa N papia ku bo, mar!

//

Kudi-m mar!
Pur favor, mar!
Responde-m mar.
N kre fla-bu só un kuza, mar.

//

N ta da-bu kuza bu pidi-m si bu obi-m es nha konbérsu, y bu konta-m bu segrédu, mar.
Fla-m undi ki Matildi sta, mar?
Fla-m undi bu tene bu rikéza, mar?
Fla-m kantu alma furtadu bu tene sukundidu na bu fundu, mar?
Fla-m ken ki odja-bu bu fundu ó ki xinti-bu bu karísia, mar?
Ningen, mar.
Nen kadjau ki bu ta beija y ta rola na el, mar
ki fare areia ki bu ta respinga na el, mar.

//

Ken ki obi rabulisu-l forsa di arti di bu melodia di amor ki e más tristi mórna ki ten?
Ken ki obi-bu ta ronka na rotxa-l Murru Djeu?
Ken ki obi-bu ta geme na areia prétu di Praia Lantxa?
Ningen.
Nen gritu di tudu kes ki morre fogadu na koba-l bu fundu ingratu y diskonhesidu.
Ken ki fla ma bo e solteru y azul?
Ningen.
Nen Ernestina, nen Madalan.

//

Ken ki fla ma marinheru balenti ta konta séti ondia ki el debe-bu, mar?
Ningen.
Nen piskador ki bu rabida-l se boti di alegria, mar.
Ken ki fla ma bu korasaun e salgadu, mar?
Ningen.
Nen Palanbotinhu ki fare Palanboton.
Nen pexi ki ta more pa se bóka ki fare lula di odju di uba di Pénaratxadu.
Nen búziu-l Pedrómi ki fare di Salobra
Nen odju-l Mar Mortu
Nen oredja-l Séti-Kabésa ki fare lingua di mundu.

//

Só bu raiba óra ki bu ta modja bu própi sónbra.
Só revólta-l dór ki N tene guardadu na nha petu di asu
y na nha alma di skuma branku arbu di bu terrasu.
Só sodadi di ken ki bai ki ka ta ben nunka más.

//

Mar!
Bu ronku modjadu na Kriolu e vós poderozu di revólta y txoru-l liberdadi!
Bu marazia e perfumi di silénsiu-l partida!
Rastu-l viaji na bu korpu tamanhu e sinal di kaminhu londji pa Santumé!
Mar, e bo ki ta leba-m nha kretxeu karragadu na bu kósta brabu!
Mar, e bo tanbe ki ta traze-m sodadi y laméntu di térra lonji.

//

Mar di Kabu Verdi,
Mar di séu,
Mar di Mundu,
Bo e más fundu ki fin di Mundu
Bo e di-meu
Bo e di-bo
Bo e di nos tudu.
Má bo e ka di ningen.

//

Bo e sénpri mar
Bo e mar di tudu óra
Bo e mar mansu
Bo e mar brabu
Bo e mar mariadu
Bo e sonhu-l demokrasia
Bo e soberanu
Bo e mar ki e ka mar di distinu di omi livri y indipendenti.


Agnelo A. Montrond, aamontrond@yahoo.com

Puemas di Khalo

N sta djuntu ku nhas gentis

Sol ta kanba di ripenti

Ta bai oji ta ben manhan

Dja-m sabi m’é ka ta fadja

Kel kalor ku lus pa djuda-m é di kurason

N ka mesti odjal pa-m xinti-l

Pamodi sangi ta puxa

//

N sta djuntu ku nhas friends

Lua ta ben padas ó interu

Ás N ka ta odja-l la riba

Má N sabi undi ki N ta atxa-l

Lonji di vista pértu kurason

Sén odja-l N ta kurti-l

Dia ta manxi dia ta bai

//

Vida sén sintidu é sima dia sén sol

Ku noti sén lua

Un stréla pa lumia-m

Un satéliti pa orienta-m

Dja-m sabi ma mi só

N ta kai

Má ku nhos nu ta avansa

_____________________________

Padas di mi padas di bo

Dja nu fazi un dja nu fazi dôs

Ka ta nega sangi

Sangi di nos dôs di pikinoti ku grandi

Ben di pas ben xeiu di amor

//

Sai di mi sai di bo

ku vida ku saudi

sima foi na priméru viaji

si ki foi na sigundu viaji

//

Kel ki nu prendi

nu ka ta skesi

Kuza fetu ku amor

ta sai ben fetu

//

Déntu mi

déntu bo

forti sabura ki ka ta kaba

mi ki da-u

bo ki da-m

padas di mi ku bo

____________________________________

Sabi FLA ka ta FLA

podi DA ka ta DA

ta kre TRA pa ka TRA

kenha ki sabi ka ta FLA

kel otu ki FLA ka ta DA

óras ki DA pa ka TRA

//

ta FLA ma ta DA

mas afinal ta TRA

simé FLA-FLA ka ta kaba

óra ki bu DA ta DA ki FLA

pamó TRA ki sa ta DA

//

é pa FLA kuza dretu

pa ka DA konbérsu

pa DA ku ruspetu

pa ka TRA diskansu

//

kenha ki TRA ka ta DA más

FLA é faxi DA é margós

TRA é doxi pa goza dipos

//

é ka tudu kuza ki ta FLADU

ki ta DADU ki ta TRADU

ó ki N FLA ma N ta DA

bu podi ben TRA

Não sou

Agnelo A. Montrond

Eu sou

E estou

O que ninguém é

E onde ninguém está

//

Eu sou tudo o que não sou

Para estar e não estar

É preciso ser poeta

Para ser tudo e nada que sou

//

Eu existo entre o ser e o estar

E estou como não queria estar

Mas não sou o ser que estou

Nem sou o ser que queria ser

//

A existência é não existir

Como o porvir há de vir

Mas que ninguém venha a obrigar-me a ser o que não sou

Ou a estar onde não estou

Agnelo A. Montrond