Dr. Aristides Lima Profiri Paléstra Sobri Revizaun Di Konstituisaun Di Kabu Verdi, Na Lesley University, Cambridge, Massachusetts, EUA.
Pa Agnelo A. Montrond
CAMBRIDGE, EUA, 19 di Junhu di 2009 – Dumingu dia katorzi di junhu, alguns dizenas di kuadrus y alguns jóvens studantis universitáriu sisti paléstra proferidu pa Dr. Aristides Lima sobri revizaun di konstituisaun di Kabu Verdi, na Lesley University, lokalizadu na Cambridge, Massachusetts, EUA. Staba la, un grupu bastanti reprezentativu, ki inklui kabuverdianus, kabuverdianu-amerikanus, y amerikanus.
Dipos di sérka di un óra di kondusaun, sénpri ta fazê kuza ki nha GPS staba ta fra-m, ó dretu ó tortu, N txigâ Cambridge, staba pra la kabu di onzi óra di pramanha. N atxâ kabu animadu, ku múzika di térra: Vuca Pinheiro, ki se dédu e tudu sabidu y se violaun ta obi ku el, staba la ku se kunpanhaménta y es oferese-nu un anbienti muzikal kabuverdianu dimé-divéra, taun rekintadu ki po sodadi da kriston di Kabu Verdi.
Staba un kafé ku un txeru ta rasendê tantu sabi ki lenbra-m kafé di Fogu. Nha amigu Gulibá, ki ben la di Lowell, fra-m mantenha kontenti ku un mon y na kel otu mon el teneba un satadju di kuskus di kanéla xeiu di mantega. Du sintâ djuntu ku ativista Domingos Lopes (Domingos Raiu-X) y más uns amigu, du da un dédu di konversa sobri tema di paléstra, y pasadu uns minutu, du labantâ tudu pa reasebê Dr. Aristides Lima ku un salva di palmas. Dr. Aristides Lima, ki e un omi di povu, un pulítiku spirienti y di vultu, kunprimenta, ku kel morabéza karaterístiku di un kabuverdianu amigu di tudu argen, tudu kenha ki staba la, antis di el tumâ se kafé.
Dipos di kel almosu riku y típikamenti Kriolu, ku djagasida, bakalhau, karni, torésma, etc, kazal Miguel & Alice Gomes, ki da boas vindas a pesual, konvida gentis pa diriji pa sala di konferênsia, undi ki dipos di Dra Maria Serpa, ki en reprezentasaun di Lesley University, dizeja boas vindas a Prezidenti di nos Asenbleia, y di D. Gunga Tavares, ki en reprezentasaun di Konsuladu Jeral di Kabu Verdi na Boston, diriji alguns palavras a partisipantis di es ivéntu, Dr. Aristides Lima faze un aprezentasaun sumáriu di aspétus más inpurtanti di prupóstas ki PAICV ta bai aprezenta prósimamenti na parlaméntu. Komu staba la arguns argen ki ka ta papiâ nen entendi Kriolu na kel sala, Dr. Aristides Lima diriji a prizentis tudu na ingles (N fika spantadu pamodi N ka sabeba si el ta papiaba ingles taun ben asin), el faze se aprezentasaun, ku kel elokuênsia abitual, y ka foi surpreza pa ningen, konsiderandu se speriensia tantu na jornalismu, komu na pulítika, sobritudu na parlaméntu komu deputadu y komu Prizidenti di Asenbleia, y dipos abridu sesaun di perguntas y respóstas.
Kolokadu arguns perguntas sobri konselhu konsultivu di kumunidadi, difinisaun di sidadania kabuverdianu, extradisaun, deportasaun, ofisializasaun di Kriolu, deputasaun, eleisaun na 2011, puderis di prezidenti di repúblika, etc.
Konsiderandu konstranjiméntu di ténpu ki dja staba avansadu, Dr. Aristides Lima, sumariamenti reaji a kes kestons ki foi kolokadu.
E prumeru bes ki un Prizidenti di Parlaméntu kabuverdianu partisipa na un ivéntu sima kel. Du ta sperâ ma el ta kontinuâ na futuru.
Kumisaun organizadora di kel ivéntu, koordenadu pa Sr. Domingos Lopes y Sr. Ulisses Gonçalves, sta di parabens, sobretudu Dra Ambrizeth Lima, ki fazê un isilenti trabadju, ki organizâ kel ivéntu ku tudu mestria até au míninu pormenor, pa ten kel susésu ki el tevi.
Dr. Aristides Lima y se kumitiva ki ta integra diputadu da Nason, eleitu pa sírkulu das Américas, Alberto Alves, sta na Stadus Unidus desdi dia dozi di es mes, na kuadru di un programa di vizita ki kontenpla Parlaméntu Stadual di Massachusetts na Kaza Parlamentar lokalizadu na Boston undi el teve enkontru di trabadju ku lejisladoris y reprezentantis stadual. Tanbe el profiri un paléstra «In Memorian João Lopes» na CACD, na Pawtucket, Rhode Island. Programa inda ta kontenpla vizita a alguns séntru susial kabuverdianu y kontaktu ku omis y mudjeris di negósiu kabuverdianu. Manha, sábadu dia 20, kumisaun organizadora di vizita di Dr. Lima ta konta ku partisipasaun di kumunidadi en masa na jantar en onra a Sua Exa Prizidenti di Asenbleia Nasional di Kabu Verdi ki ta regresâ pa Kabu Verdi na prósimu dia vinty y tres di es mes.
Agnelo A. Montrond
No comments:
Post a Comment