Kabuverdianus na Brockton Sta Ku Mayor Jim Harrington!

Pa Agnelo A. Montrond

Brockton, 24 di Otubru di 2009 – 3 di Nuvénbru, dia di eleison di «Mayor», ou seja prizidenti di Kámara Munisipal di Brockton, di deputadus munisipal y di menbrus di Kumité di Skóla, dja sta na pórta. Kabuverdianus sa ta partisipa di fórma vizível, má ka sima na 2007 ki tinha 2 grupus di kabuverdianus ta apôia 2 kandidatu: James Harrington y Jass Stewart ki perde pa sérka di 600 votu y ki es anu sa ta konkorre pa «Councilor-at-large», ou seja diputadu munisipal. Di es viaji, si N ka sta nganadu, fóra un ó otu kazu izuladu, psarse-m ma kabuverdianus sta tudu unidu ta apôia amigu di kabuverdianus, Mayor Harrington, ki sa ta torna konkorre pa más un mandatu di 2 anu. Na 2007, komu kandidatu a prizidenti di Kámara di Brockton, ku lema «D’es bes k’e bes», Jass Stewart teve un fórti apôiu di kabuverdianus y Kriolu foi lingua di kanpanha.

Foi un verdaderu enkontru di amigus, kel jantar-konvíviu, onti, na restauranti Sodade Térra. Kabuverdianus konparese en pézu pa dimonstra ses apôiu pa torna ileji Jim Harrington: restauranti Sodadi staba konpletamenti xeiu, y kabuverdianus staba koladu na kunpanheru móda sardinha. Na ses petu staba skrebedu na ingles: «I’m with Jim Harrington» ki signifika Jim Harrington N sta ku bo. Anbienti foi markadu pa morabéza típiku di kabuverdianus, ku kel bon kumida di Sodade, spesialmenti konfesionadu pa kel ivéntu. Kel muzikinha di térra, sabe pa afrónta, foi un autentiku «show» di konjuntu Magma di Vulkaun, un konjuntu formadu só pa jóvens, inkluindu baixista ki e un minina (kel-li nu ta fla di pasaji), ki txiga Mérka resentimenti. Komu ka pode fadjaba, teve tanbe un poku di konbérsu. Alguns pesoa faze uzu di palavra: primeru foi Gaby Leitão y dipos foi Celestino De Pina. Dipos di un brévi aprezentason di razons pamodi kabuverdianus debe vota en masa na Jim Harrington, na prósimu dia 3 di Nuvénbru, foi ves di própi Mayor di Brockton ki diriji alguns palavras pa audiênsia. «Boa Noiti», foi primeru palavra ki na KRIOLU sai di bóka di Nos Prizidenti di Kámara di Brockton, Mayor Jim Harrington, ki provoka un txuba di palmas y alguns zibiu. Perguntadu Jim Harrington undi ki el prende papia Kriolu, y el responde ma foi na Kabu Verdi, kantu ki el baba la sérka di 2 anu pasadu. Mr. Harrington faze un brévi referênsia a se mandatu di 4 anu ta lidera «sidadi di kanpions», y el fala sobri jeston finanseru di sidadi di Brockton, seguransa, idukason y programas pa jóvens. El fla ma enbóra el enfrenta posibilidadis di korti na orsaméntu di sidadi di Brockton, na situason di krizi, el toma mididas nesesáriu y el aprezenta un orsaméntu ikilibradu y sen korti. El fla ma el konsigi mante tudu pulísia, bonberu munisipal, y profesoris na trabadju, y ma el konstrui nóvu skólas di alta teknolojia, enkuantu ki na otus sidadi, un númeru signifikativu di pulísia, bonberu, y profesoris perde ses enprégu y fitxadu alguns skólas. El fla tanbe ma na Brockton, nótas na «MCAS», sigla di «Massachusetts Comprehensive Assessment System», un testi ki stadu di Massachusetts ta konsebe y ta adiministra pa studantis di kuartu, oitavu y désimu anu di skolaridadi, sa ta midjora manenti, y Brockton dja e un di kes midjór sistema skolar urbanu na es stadu.

A segir foi ves di Sr. Moisés Rodrigues, Diretor di Servisu di Kumunidadi di Brockton, funson ki ta korresponde a terseru kargu más inpurtanti na sidadi. Moisés fla ma Mayor Harrington abri pórta di sidadi di Brockton pa kabuverdianus y ma tudu bes ki nu meste Mayor Harrington, el sta la pa difende interesis di kabuverdianus y naun só. El sita izénplu di grupu di konselherus pa jóvens ki es kria, y el fla ma duranti veron ki pasa, es ranja inprégu pa serka di 400 jóvens ki pagadu ku dinheru di fuku-fuku di ses.
Nha ex-alunu, jóven Luis Fontes, papia na kualidadi di dirijenti di kel grupu di jóvens y, entri más, el fla: «Moisés y Mayor Harrington e nha inspirason». Kapiton Dempsey Andrade papia y fla: «Kual e kandidatu ki sa ta ben fika djuntu ku nos pa nu enbrasa-l, tra fótu ku el, faze asada ku nos, etc? Kal kandidatu ki kruza Dje-di-Ronbu pa bai Brava? Kual e kandidatu ki dja kume nos katxupa, nos xerén, nos tenteren, etc? Pa termina se intervenson el fla: «Harrington, povu sta ku bon» y prizentis responde ku un salva di palmas.
Dipos foi muméntu muzikal y kultural, di konvíviu, interason, y konfraternizason. Alguns vózis marka prizénsa: Carmindo Lopes, Paulo fidju di Talulu, Lutxinha, jornalista Valdir Alves di Cabo Video y Bétu ki na un duetu es kanta «Mundu Ka Kre pa N kre».
Nu ta aproveita pa lansa un apélu a tudu kabuverdianus ki e sidadon merkanu, ki sta resensiadu y ki ta vivi na Brockton, ó na un otu lugar undi sa ta realizadu elison munisipal dia 3 di Nuvénbru, pa es izérsi ses dever síviku, pa es izersita ses sidadania, pa es vota en konsiênsia, ku intelijênsia y ku konfiansa na kandidatu ki ta luta y difende ses interesi. Nu mostra ma nos kabuverdianus, tanbe nu ten ves, vos y vultu, y ma nos votu ta faze diferénsa.

Agnelo A. Montrond, USA
aamontrond@yahoo.com