Pa Agnelo A. Montrond
Nu sunha ku filisidadi y unidadi pa konbate tristéza
Nu sunha ku pulítikus íntegrus ki ka ta kruza ses brasu na kus di moléza
Pa rekuza rekunhesi trabadju y óbra di ses opozitoris só pa faze pulítika di spertéza
Stratéjia di pinta Kabuverdi ku kór di pobréza y di sufriméntu e más ki mofinéza
//
Kria kondison pa vivedu midjór na Kabuverdi e ka skorrega ku konbérsu fiadu pa Natal na ladera di pusibilidadi
E bira-l realidadi palpável pa tudu algen, di más pikinóti ti más grandi, na tudu kantu y rekantu di Kabuverdi
Konbérsu ki bale e kel di Hillary Clinton ki fla Mundu pa odja izénplu di bon governason na Kabuverdi
Térra di pás, di gozu, di prugrésu, di ruspetu pa direitus umanu, di demokrasia, y di liberdadi
//
Só pulítikus ségu ka ta odja dizenvolviméntu di nos infra-struturas rodoviáriu, portuáriu, y aeroportuáriu
Só pulítikus surdu ka ta obi ma apósta sértu e na más y midjór inprégu, idukason, justisa, y seguransa
Só pulítikus duenti ki ka sta na móda ta kria kondison pa ka ten kondison pa midjór saudi pa kabuverdianus
Só pulítikus dizoredjadu ta gagixa ma inda ka sta kriadu kondison pa nu ofisializa nos lingua matérnu
//
Nos Pruméru-Ministru, Dr. José Maria Neves fla sabiamenti ma Diáspura e nos 11u ilha, y el ta kontenpla-l
Ku igualdadi di direitus y opurtunidadis pa dizenvolviméntu di nos Nason Kosmopolita Global
Nos konprimisu e ku trabadju y nau ku padja pa kuntinua ta transforma mizéria na fartura, y pobréza na rikéza
Pa dizenprégu pode ser létra mortu na nos séu abértu ku sonhu di sidadon di mundu na nos grandéza
No comments:
Post a Comment