Guvernador Di Massachusetts, Deval Patrick, Enkontrâ Ku Representantis Di Kumunidadi Kabuverdiana

Fótus – FORCV.COM

Pa Agnelo A. Montrond

« … Hoping for the best and working for it, as his grandmother used to counsel him …», Konsedju di dóna pa se nétu Deval Patrick, guvernador di stadu di Massachusetts: … Sperâ pa midjór y trabadjâ pa el …

E ka só dóna di guvernador Deval Patrick ki ta da-l konsedju. Kabuverdianus tanbê enkontrâ ku el, faze-l perguntas y da-l konsedju onti, dia 22 di Maiu, na AMADO ENTERPRISE, sediadu na Dorchester.

Kel enkontru di onti, e un indikador di inportánsia ki NOS GUVERNADOR DEVAL PATRICK ta da a kumunidadi kabuverdiana na Massachusetts. Kabuverdianus na Mérka ten ves, vós y vultu. Má du mestê sta kada bes más organizadu, unidu y dimonstrâ ma du ten pézu eleitoral na Mérka, y má du podê fazê diferénsa. Pa du ganhâ más ruspetu, du debê kriâ un organizasaun pulítiku fórti y unidu, pa partisipâ na pulítika tantu na Mérka kómu na Kabuverdi. Votus di kabuverdianus podê ser determinanti pa disidi kenha ki ta ser eleitu prósimu guvernador di Massachussetts. Sima kontisê ku eleisaun di prizidenti Barack Obama, undi ki grupu Cape Verdeans For Obama puzisionâ na terrenu y kontribui pa vitória di Prizidenti Obama, un grupu semelhanti podê perfeitamenti fazê memu trabadju pa eleisaun di prósimu governador di Massachusetts. Sima ki apresentador di enkontru di onti, Adalberto Teixeira frâ, y ben fradu, di mesmu manera ki kriadu grupu Cape Verdeans For Obama podê tanbê kriadu un grupu Cape Verdeans For Deval Patrick or Somebody Else.

Na se kurtu intervensaun, NOS GUVERNADOR DEVAL PATRICK fra ma el ka sta na senda pulitiku na Massachusetts só pa el kómu un individu, má sobretudu pa nos tudu kómu un kumunidadi só. El insentivâ prizentis a partisipâ y a fikâ engajadu di fórma pesual y kuletivu na eleisaun ki sa ta avizinhâ, y nau só.

Formatu di es enkontru foi brévis preokupasauns, perguntas y / ou konsedjus ki partisipantis kolokâ y ses respetivus respóstas pa NOS GUVERNADOR DEVAL PATRICK. Kolokadu arguns perguntas na árias di negósiu, asésu di mídia pa grupus minoritárius, idukason, défisi orsaméntal a nível lokal y stadual, promésas eleitoral, etc. Partisipantis fika sklaresidu y satisfeitu ku respóstas.

Na es enkontru staba kabuverdianus líderis influentis na kumunidadi ki ta reprezentâ várius setoris susial di kumunidadi kabuverdianu na Massachusetts: adivogadus, ativistas, profesoris, líders asosiativus, ómis y mudjeris di negósius, entri otus. Pusivelmenti ta ten kontinuidadi a más enkontrus pa formasaun di un iventual CAPE VERDEAN POLITICAL ACTION GROUP a nível di stadu di Massachusetts.

Governador Deval Patrick foi eleitu na Nuvénbru di 2006 pa un mandatu di kuatu anu. Na bagaji el trazê un enórmi speriensia di lideransa di altu nível na árias di negósius, pulítika, guvernasaun, y organizasauns nau-lukrativu. Inda ka sabedu kenha ki ta ben ser kes kandidatus ki ta ben dizafia Deval Patrick na disputa puzison di nóvu inkilinu pa Massachusetts State House.

NOS GUVERNADOR DEVAL PATRICK, un proeminenti adivogadu ki forma na famozu y prestijiozu Harvard University na Cambridge, fla ma el sa ta prende kriolu y ma dja el prende tres palavras: VOTA PA MI.

Agnelo A. Montrond