MÁS Y MIDJÓR KABUVERDI: Si É Pa Nu Muda Pa Piór, Midjór Nu Kuntínua Sima Nu Sta - Un Izénplu Na Áfrika – Parti I

Pa Agnelo A. Montrond

Si é pa nu volta pa derraderu guvernason rabentóla di anus 1991 - 2001, midjór nu kuntínua sima ki nu sta, ku es BON GUVERNASON di Dr. José Maria Neves y se ekipa ki bira-nu un PDM y izénplu na Áfrika! É ka mi ki fla é Sekretária di Stadu Merkanu Hillary Clinton ki fla.

Dja N puxa pa kabésa. Dja N baskudja nha mimória. Dja N skrebe nha opinion. Dja N lé txeu y ku atenson. Dja N odja ku odju di odja. Dja N xinti ku naris di xinti. Dja N obi ku obidu di obi, y dja N da kónta ma Kabuverdi sa ta dizenvolve di manera armoniozu y ekilibradu y ma pobréza na Kabuverdi dja diminui di 13%. Di 37% ki el staba na ténpu di MPD gósi el sta sérka di 24% y guvérnu di Dr. José Maria Neves sta ta luta pa riduzi-l ti el kaba na nada. Na índisi di dizenvolviméntu umanu di Nasons Unidas, Kabuverdi subi 3 pontu, y el pasa di lugar númeru 221 pa 118 y gósi nu sta na désimu-pruméru lugar na Áfrika, lógu dipos di Giné Ekuatorial. Kabuverdianus mesti ntende ma es guvérnu merese opurtunidadi pa kuntínua ku es dinámika na se ajenda di trabadju pamodi Kabuverdi sta na kaminhu sértu. Kabuverdi sta na kaminhu suguru, alkatruadu, sinalizadu, y iluminadu. Kabuverdi sta na kaminhu abensuadu pa Nhordés, bunitu di naturéza, y akarinhadu pa Amor a Nos Térra.

Kabuverdi Sta Na Móda y el debe kuntínua na móda. Kabuverdi sa ta bira kada bês más y midjór Kabuverdi, un Nason Kosmopolita Global. Kabuverdi sa ta bira kada bês más mudérnu y konpititivu na tudu ária pusível y imajinável. Susésu y dizenvolviméntu di Kabuverdi na es últimus anus é un spinha ki sta trankadu na garganta di Opozison ki dja dizuspera y dja perde ton. Nu kuntínua ta sunha ku más y midjór Kabuverdi. Nu kontinua ta sunha ku un Kabuverdi sén frontera. Nu kuntínua ta sunha nos sonhu ku orgulhu nasional pa dizenvolviméntu di kada un di nos ilhas y di nos désimu prumeru ilha ki é nos diáspura. Nu kuntínua ta sunha ku pobréza komu un palavra mortu na disionáriu di Kriolu.

Ku tudu aeroprtu ki dja fazedu: na Praia, na Boavista, y na Sanvisenti. Ku Kriola ki é dizafrónta di nos Kabuverdi di Speransa, ki ta labanta na Brava y ta deta na Brava pa sirbi nos kabuverdianas y kabuverdianus. Inda ku Kriola ki dja bira kaminhu di Brava pa Djarfogu kaminhu di pé. Ku tudu dinhéru ki nu konsigi ku MCC, ki nu jeri ku prufesionalismu, rigor, transparênsia, y integridadi, ti ki nu kualifika y dja nu kunsigi más na kel sigundu konpaktu di MCC. Ku tunel ki dja fazedu na Santanton. Ku anél rodoviáriu na Djarfogu. Ku barraji di Poilon. Ku tudu alkatron ki dja podu na txon di Kaubverdi, agó nu pode kanta:

Txon di Kabuverdi ten spónja sima Txon di Olanda

Nu ta anda nu ta balansa y nu ta disliza na strada alkatruadu

Oxi nos Txon dja ka ten spinhu

Kaminhu di kabra éra kel bês – ó ki sabi na mundu!

Kabuverdianas y kabuverdianus, rizidentis na Kabuverdi ó na diáspura, nu da guvérnu di Dr. José Maria Neves más un mandatu pa el kuntínua ta bira Kabuverdi kada bês más grandi, más dizenvolvidu, ku alegria y filisidadi na korason di tudu kabuverdianas y di tudu kabuverdianus, ku más y midjór saudi pa tudu algen! Kabuverdianas y kabuverdianus spadjadu pa mundu interu, nu da guvérnu di Dr. José Maria Neves más un mandatu pa el kuntínua ta bira Kabuverdi un país di kunfiansa na nos morabéza y na prugrésu na tudu kantu y rekantu di Kabuverdi. Má ka nu kruza nos brasu y spéra só pa guvérnu di Dr. José Maria Neves trabadja pa transforma Kabuverdi na kel Kabuverdi ki Amilcar Cabral sunha ku el. Nu kuntribui tanbe pa bira Kabuverdi kada bês más Kabuverdi: Térra di pás, di gozu, di ruspetu pa direitus umanu, di demokrasia, di liberdadi, di igualdadi y justisa susial.

Nu meste muda es mentalidadi di krispason pulitiko-partidáriu, y dexa di pensa ma si N ka sta ku bo, mi é kóntra bo, pa nu uni na nos diferénsas y kopera ku guvérnu di Dr. José Maria Neves, pa tudu djuntu nu kuntínua ta bira Kabuverdi kada bês más Kabuverdi, ku bonansa di tudu kel ki falta-nu na pasadu, pa imigrason dexa di ser nos sina. Nu djunta mon pa nu bira kel dilema: “Ter que partir e querer ficar ” en Ten prazer na fika y vive na Kabuverdi y bai pa stranjeru só si nu krê ba pasa féria ó vizita familiaris y amigus. Nu sunha ku unidadi y luta. Nu sunha ku pulítikus íntegrus ki ka ta pinta Kabuverdi ku kór di pobréza y di sufriméntu só pa spertéza. Só pulítikus duenti ki ka sta na móda ta kria kondison pa ka ten kondison pa midjora vida di kabuverdianus, ku más y midjór inprégu, idukason, justisa, y seguransa. Só pulítikus dizoredjadu ta gagixa ma nu «mesti muda» speransa pa un futuru midjór pa dizispéru di dufuntu pasadu di anus 90. Nhos lenbra ma Quem nunca fez, não faz e jamais fará. Ku MPD, «Plus ça change, plus c’est la même chose».