Si É Pa Nu Muda Pa Piór, Midjór Nu Kuntínua Sima Nu Sta - Un Izénplu Na Áfrika – Parti II
Pa Agnelo A. Montrond, USA
Muviméntu rabentóla rabenta dos bês ( y inda el ta torna ben rabenta; nhos spéra nhos ta odja) y el pari dos fidjinhus na rua, na dôs partu: se priméru fidju txoma PCD y sugundu txoma PRD. Dôs partidinhus «bazofu» ki korajózamenti dinúnsia ses mai ki staba ta faze un mau guvernason ou seja un bon disgovernason, ku txeu dívidas, txeu kurrupson, kofri baziu, atrazu na pagamentu di bolsa pa studantis na stranjeru, esbanjamentu, fadja na kunprimisus di pagaméntu a parserus di dizenvolviméntu di Kabuverdi, skandalus gritantis sima kazu di enbaixador Estrela, kazu di siméntu, kazu di un ex-Ministra ku se enteadu, dizaparesiméntu di 2 milhon na kel negósiu obskuru na privatizason di ENACOL, etc. Má simé, MPD mankixa na puder ti 2001, altura ki povu da-l un konpitenti karton brumedju, pa fla-l ma dja staba basta. A partir di es data, tantu mai komu ses dôs fidju kumesa ta perde eleison na tudu kobon y na tudu «balkon». Pa konsolu, es da kunpanheru un grandi «gataria» ti ki es atxa ma es «mesti muda». Anton alguns muda pa ses mai, MPD. Y gósi es sta djuntu ku ses mai. Tantu fidjus komu mai es é un pokabrigónha. Ka pode ten falta di karáter más tamanhu di ki es: ses postura é inkoerenti, inkonsistenti y poku sériu. Es sa ta namora ses mai pa odja si es al konsigi algun taxu na prósimu eleison na dia 6 di Fevereru. Má nganadu ki es sta. Di sertéza es ta panha baziu. Li na Mérka, sta garantidu ma es ta leba dôs - zéru. Kel úniku ligason ki tinha di Boston pa Sal es korta-nu-el y es afronta-nu nos imigrantis na Mérka. Si mai «Mesti Muda» debe sigi mau izénplu di ses dôs fidjus malisuadu ki karkutiba y fundaba ses mai mon, anton mai «Mesti Muda» mesti muda pa bira un fidju malisuadu di Kabuverdi disprezadu pa iternidadi y fidju malisuadu mesti muda pa bira mai «Mesti Muda» irresponsável ki pariba es y botaba-s na rua di maus-módi. Dia 6 di Fevereru nhos krê ntrega Kabuverdi na mon di es mai «Mesti Muda» irresponsável ku ses dôs fidjinhus malisuadus pa es ben da-l na pédra otrubês? KRÉDU! NEN KA NHOS BEN KU EL.
Nos priméru ministru Dr. José Maria Neves é un líder vizionáriu, sínplis, umildi, y karismátiku, ki ta inkui y nunka ta sklui kabuverdianas y kabuverdianus di partisipa na es nóva largada pa kuntínua es «momentum» ou seja es dinámika di transformason di Kabuverdi na un arkipélagu di orgulhu di tudu ses fidjus y na un refersênsia na Atlântiku. Duranti es dés anu di bon guvernason di José Maria Neves, úniku primeru ministru di Kabuverdi ki ka tevi ninhun SKANDALU na se guvernason, un guvérnu KANPION ki inda ka da ninhun sinal di disgasti. Inda nu tene un José Maria Neves frésku, konpitenti, xeiu di spiriênsia, ku un monti di ideias, ku briu y «aggiornamento» na manga, pa inova y inplementa se ajenda di transformason di Kabuverdi na un Kabu Sabi, Suguru, y Bunitu, un verdaderu «paraízu» na Atlântiku, undi tudu algen ta vive dretu y ku dignidadi, pa ses sonhu ka ser nen Olanda, nen Mérka, nen Londris, nen Paris, nen Lisboa má NOS KABUVERDI SABI, SUGURU SUSÉGADU KU MÁS Y MIDJÓR MÓRNA, MÁS Y MIDJÓR MIDJU, MÁS Y MIDJÓR MAR. Grasas a trabadju di Dr. José Maria Neves y se ekipa, gósi nu podi bai di Boston diretamenti pa Praia ou pa Mindélu. Kabuverdianas y kabuverdianus sta orgulhozu di Nos Kabuverdi ki sta más Kabuverdi di ki kel di anus 1991 a 2001. Inda nu kre pa el bira kada bês Más Kabuverdi. Dia 6 di Fevereru, nhos krê ntrega nos Kabuverdi ben trabadjadu di 2001 ti gósi pa guvérnu di José Maria Neves, na mon di MPD pa el da maxa-trás, pa el torna ben da-l na pédra? KRÉDU! NEN KA NHOS BEN KU EL.
NU PINTXA! Pa frenti ki é kaminhu. Nu ta troka mudansa na nos mutor dia 6 di Fevereru pa nu poi más forsa na es mudansa. Sima nos Premier Dr. José Maria Neves fla, nos dimokrasia sta kada bês más konsolidadu; guvernason sta kada bês más bodóna; infrastruturas sta kada bês más mudérnu y fixi; turistas sa ta bira kada bês más txeu; sa ta trabadjadu kada bês más pa Más y Midjór Saudi pa Kabuverdi; nu tene kada bês más y midjór skólas y universidadi ku ensinu superior di kualidadi; nu sa ta bira kada bês más mudérnu na ária di teknolojia, industria, informason, y kumunikason; Kabuverdi sa ta bira kada bês más linpu y saudável, ku más y midjór portus, más y midjór stradas, más y midjór águ, más y midjór ospital, más liberdadi e más sidadania. Nu sta na midjór kaminhu. Nu kuntínua nos jornada na kaminhu di prugrésu y nu pega nos futuru rixu na mon y nu tranka-l ku kuntinuidadi na dinámika di liberdadi y dimokrasia en diagunal na Porton Di Nos Ilha. Dia 6 di Fevereru, nhos krê ntrega Kabuverdi na mon di MPD, pa el ben da-l ré pa el torna ben da-l na pédra? KRÉDU-IN-KRUS! NEN KA NHOS BEN KU EL.
Nos konprimisu e ku seriedadi, integridadi, y onestidadi na trabadju pa nu kuntínua ta transforma mizéria na fartura, y pobréza na rikéza. É ka ku balélas na prumésas eleitoral nen ku padjas ki dizenprégu ta ben ser létra mortu na nos séu abértu ku sonhu di sidadon di mundu na nos grandéza. Kabuverdi dja bira un país di dizenvolviméntu médiu y dja el ganha fama di BOA GOVERNAÇÃO. Nhos krê pa nu muda pa ténpu di inaugurason di latrinas ku xafaris en vês di inaugurason di aeroportus, tunel, barraji, etc? Nhos krê pa nu muda nos aeroportus di beton pa aeroportus di térra batida? Nhos krê pa nu muda kes otus infrastruturas di beton pa nu faze-s di madera karapati, pa nu kubris ku padja? Nhos krê pa nu muda pa trás pa piór ó pa nu kuntínua ta bai pa frenti pa un futuru kada bês midjór? Nhos da nhos rispósta dia 6 di Fevereru, en konsiensia, ku intelijênsia, ku kunfiansa na más y midjór Kabuverdi.
Kuantu a ideia di un terseru forsa pulitika pa ikilibra parlaméntu na Kabuverdi, povu ten stadu ta da sinal klaru na susesivus ileison, ma sosiedadi kabuverdianu sta ben polarizadu. Partidu vensedor ten stadu ta konsigi maioria absoluta/kualifikada, un realidadi ki ta difikulta-nu akerdita na afirmason di un terseru forsa na spétru pulítiku kabuverdianu. Kabuverdi bira polarizadu móda Mérka undi ki kes dôs partidu pulítiku grandi, Republikanu y Demokrata ta alterna puder y kes partidus pulítikus más pikinoti ka ten spreson eleitoral.
Nos tudu nu sabe ma é nesesáriu ntende pasadu di Kabuverdi pa nu pode projeta un futuru midjór pa kabuverdianas y kabuverdianus. Só pulítikus dizoredjadu ta gagixa ma nu «mesti muda» speransa pa un futuru midjór pa dizispéru di dufuntu pasadu di anus 90. Nhos lenbra ma Quem nunca fez, não faz e jamais fará. Ku MPD, «Plus ça change, plus c’est la même chose». É es «Mesti Muda» li ki nhos krê? NEN KA NHOS BEN KU EL.
No comments:
Post a Comment