Dedikatória: N ta didika es puema pa tudu difensoris y promotoris di Lingua y Kultura Kabuverdianu, pa es okazion spesial, dia 21 di Fevereru di 2011, ki pa désimu-pruméru bês ta selebradu dia internasional di lingua matérnu, pa nu puxa pa kabésa, pa nu matuta y pensa na Kriolu, nos lingua di bérsu, spreson di identidadi di Nos Nason, pa nu toma konsiénsia di es faktu, pa nu uni na nos diferénsas, pa nu da-l dignidadi ki el merese, pa nu stablesi un statutu jurídiku-konstitusional pa Kriolu y Purtuges pode ten mesmu direitu y lejitimidadi na ses utilizason na sosiedadi kabuverdianu, pa nu normaliza y ofisializa se skrita y se uzu, pa el inxinadu masivamenti na skóla, pa el uzadu sistemátikamenti na admnistrason y na kumunikason susial tantu na oralidadi komu na skrita, y pa insentiva se skrita ku AK (ex-ALUPEC) na meiu artístiku kabuverdianu.
Kriolu é Stréla ki ta brilha na séu di Nason Kabuverdianu
Kriolu é «rainbow» tudu koloridu na surrizu di mininu di nos térra
“Mininu di bibi ratxadu ta txora fómi” éra na kel ténpu …
Oxi ses fatu é forsa, lus y gia na spedju di Más Kabuverdi
//
Kabuverdi ku se Kriolu, Nhordés ku se Mundu
Kriolu é mórna obidu ku sodadi na Térra londji ta kuda mundu
Kriolu é mar ki ta kebra di mansinhu
Pa beja y abrasa nos dés grauzinhu di térra ku amor y karinhu
//
Kriolu é simentera di nos Kultura
Ki nasi na Sidadi Vélha, bérsu di Kriolista Dr. Marsianu Nha Ida Padri Nikulau Ferera
Txon ki oxi é ka di Morgadu má Patrimóniu Kultural di Umanidadi
//
Kriolu é Amor pa nos térra Kabuverdi
Abensuadu pa Nhordés y bunitu di naturéza
Ki oxi dja ka ten só “rótxa nu móda un mininu”
Se korpu sa ta infeitadu ku tunel, anel rodoviáriu, barraji, portu, aeroportu, etc
//
Oxi, Txon di Kabuverdi ten spónja sima Txon di Olanda
Nu ta anda nu ta balansa y nu ta disliza na strada alkatruadu
Oxi nos Txon dja ka ten spinhu
Kaminhu di kabra éra kel bês – ó ki sabi na mundu!
//
Kabuverdi oxi é un arkipélagu di orgulhu di tudu ses fidjus
Un Kabu Sabi, Suguru, y Bunitu, un verdaderu «paraízu» na Atlântiku
Undi tudu algen ta vive dretu y ku dignidadi
//
Nu kuntinua ta sunha pa sina di Kriolu ka ser Olanda, nen Mérka, nen Londris, nen Paris, nen Lisboa, má nos Kabuverdi, Sabi, Suguru, Suségadu, Saudável, ku más y midjór mórna, más y midjór midju, más y midjór mar.
No comments:
Post a Comment