TACV Cabo Verde Airlines Na Kontaktu Dirétu Ku Kumunidadi Na Mérka, Parti III

Pa Agnelo A. Montrond*

Krónika - Brokton, Stadus Unidus, 24 di Julhu di 2009: N prumeti kuntinua ku es asuntu na parti III, komu ta fladu ma prumésa e dívida, N ta fazi kiston di kunpri ku nha prumésa, enbóra pur kauza di kunprimisu prufísional N dimora un bokadinhu (y N ta konta ku konpriensaun di leitoris). N ta kontinua ta konpartilha ku nhos más alguns sujestons y preokupasons diliberadamenti na Kriolu y naun na purtuges, ki sima tudu algen sabe pa nos kabuverdianus e un lingua stranjeru, y dja N sabe ma alguns krítikus ta ben iziji-m pa N traduzi es krónika na purtuges pa es pode ntende, má sima ki dja N fla txeu bes y N ta ripiti más un bes, kel-li e ka só rezistensia kultural má e alienason kruzadu ku ifeitus di reskísiu di kulonialismu kultural. Dja faze 34 anu ki nu toma indipendensia, má ti inda na kabésa di alguns di nos patrísius, nos e un pseudo-kulónia kultural di Purtugal. Parse-m ma indipendensia kultural ta leba ténpu y jerasons pa el pode konsolida. Pur isu ki nu debe kuntinua ku es luta, labuta y es muviméntu di libertason kultural di nason kabuverdianu global. Ka ten tadju. Nu Pintxa! Di es viaji kabuverdianamenti nu ta konpartilha es sujestons y preokupasons lisinsinli:


9. Pusibilidadi Di Opera K u un Boeing 767 En Ves di Boeing 757: Na se respósta PKA (PCA na purtuges) fla ma aparelhus ki TACV ten na es muméntu e adaptadu a tráfiku ki nu ten. Nu ka debe odja kuzas na un piriudu konjuntural. Nu debe odja tráfegu au longu di un anu. Di faktu nalguns piriudu di anu nu ten prublémas ku bagajen pamodi nos pasajerus normalmenti ta viaja ku txeu bagaji. Má nu pode ranja otu fórma di da respósta a es prubléma di bagaji sén sobrekarrega operasons duranti anu ku avion di maior pórti ki ta konsumi más konbustível, ta iziji pagaméntu di más taxa di aeroportu, etc, ki ta tinha un inpaktu mutu grandi na nos kónta, na un altura ki nu kre ikilibra nos operason di pontu di vista ikunómiku-finanseru. Alex Furtado, Diretor di TACV na Mérka, fla ma un 767 e un aviaun más grandi más e’ ta iziji otu tipu di rekursus finanseru, se aluger e mutu más karu ki kel avion ki nu tene na es muméntu y e’ dimaziadu grandi pa kes otus rótas ki e ka pa Mérka. Komandanti Socorro konplementa y suplementa kes respóstas y el fla ma na es muméntu un B767 ka ta sirbi pa TACV pamodi ses kustus operasional e di lonji superior a kustu operasional di un B757, y na es prisizu muméntu TACV ka sta en kondison di suporta kes kustus. Pur isu TACV ta opta pa mante kel Boeing 757 ti ki TACV konsolida operason pa Boston y ki demanda di tráfiku di pasajerus y di karga justifika mudansa pa vous rentáveis ku aparelhus di maior pórti, ki nunka TACV ka poi di parti pamodi sta en abértu pusibilidadi di fazedu studu pa disididu sorbri eventual remodelason di fróta, y provavelmenti substituison di aparelhu pa un di maior pórti ki ta transporta más pasajeru ku ses bagájen y até karga. Komandanti Socorro inda bai más lonji y el splika ma di faktu aeroportu di Praia ten ses limitasons di dimension ki e ridizidu y ki ka ta pirmiti ki kel B757 diskola na Praia ku se karga másimu pa pode respeita pézu másimu na deskolájen na Praia, ki e inferior a pézu másimu ki kel B757 pode deskolaba ku el si fosi na Sal. Es limitason di dimensaun di pista di Praia (dimensionadu pa un aviaun kritiku A 320 ó ikivalenti, salvu érru) ta afeta inda más kapasidadi di operason di sértus avions di maior pórti. Purtantu talves suluson ideal seria aumenta dimensaun di pista di Praia pa fasilita operason más seguru di avions di maior pórti sén limitason operasional di pézu na deskolájen ó na aterrájen.

10. FAQ, Frequently Asked Questions: Kantu ki perguntadu módi ki kumunidadi pode partisipa na es prusésu y djuda tanbe, fazedu sujeston pa podu «FAQ, Frequently Asked Questions» ó seja lista di perguntas y respóstas ki gentis frekuentimenti ta kre sabe, na «website» di TACV ki brevimenti ta sta dispunível. Gentis kontenti ku es sujeston y es prometi ma es ta inplimenta-l brévimenti.

11. Konkista Merkadu Di Turismu Merkanu: Fladu ma meste fazedu marketing pa konkista merkadu di turismu merkanu ofersendu un pakoti konpetitivu ku distinus turistikus atual sima Karaibas y otus. Respondedu ma sa ta kontenpladu es pusibilidadi ki inda sta na fazi di studu di merkadu y di viabilidadi. TACV ta spéra ma ta ten más tráfiku, más pasajeru pa odja si e pusível riduzi tarifas ó enton ten tarifas prumosional ku más frikuênsia. TACV sta satisfeitu ku operasons di es pruméru y sugundu frekuênsia pa Mérka y talves pode pensadu na un tirséru frekuênsia, má ka duranti un anu interu, má talves duranti alguns piriudu di anu.

12. Más Sobri Bagájen: Sima ki nu flaba antis, ténpu di vou na perkursu Praia - Boston e sérka di 45 minutu, asvez até un óra, más ki ténpu di vou na perkursu invérsu, Boston - Praia, ki ta kurresponde a sérka di 3 a 4 toneladas di kunbustivel amás. Pur isu pasajerus ta pirmitidu di traze só un vulumi pamodi sinaun ta tinha txeu vulumis ki ta fikaba na Praia. Nu ta pensa ma e ka kurrétu un pasajeru ten direitu viaja ku dos maleta pa Kabuverdi y óras ki el ta volta pa Mérka el ten direitu di viaja só ku un maléta. Y kel otu, kuzé ki el ta faze ku el si el ka pode traze-l pa Mérka, enbóra seja ki el e inpurtanti pa el y el ka pode dexa-l na Kabuverdi? Kel-li pode ser realmenti un prublema ki ten ki ser rezolvedu di un fórma ó di otu. E ka debe kuntinua asin. Nu ta pensa ma e pusível viabiliza un suluson di konprumisu y di ikilíbriu pa TACV y pasajerus ki ta bai di Mérka ku dos vulumi, pa un vulumi ben anton na un vou kargeru pa Boston, en ves di kel pasajeru ser obrigadu a manda-l di barku ó anton fika perdedu di el na Kabuverdi.

13. Labanta Bagájen Na Alfandega Di S. Filipi, Fogu, e Difísil: Un partisipanti fla ma na alfandega di S. Filipi, Fogu, e difísil labanta bagájen ki ta fika pa trás, ta bai na un otu vou y ta fika na aeroportu pamodi funsionáriu di TACV só ta sta na aeroportu na óra y dia ki ten vou. Kel-li pode kauza algun disabor pa gentis ki ta mora lonji di S. Filipi y ki asves ten ki bai la alguns bes ti ki es konsigi labanta ses bagaji.

14. Konpetison Ku Otus Konpanhia: Labantadu tanbe kiston di konpetison ku otus konpanhia, nomeadamenti DELTA Airlines ki brevimenti ta kumesa ta opera pa Kabu Verdi y na se respósta, António Neves fla ma entrada di DELTA na operason kumersial pa Kabu Verdi e bon tantu pa Kabu Verdi komu tanbe pa TACV ki ta presta-l servisu di asistensia «Handling Services» y es ta trabadja djuntu.

15. Bixa Na Aeroportu di Praia: un partisipanti labanta es keston y fla ma el odja gentis di ajénsia ta txiga ta pasa riba di algen (ki asves pode ti ser VIP: ménbru di guvérnu, diputadu, enbaixador, etc) ki dja dura na bixa y ta faze «check in» pa pesoas ki es ta alega ma e VIPs. Kel-la debe kaba y ajentis di TACV ka debe pirmiti kel prátika la. Anton meste kriadu un balkon spesial pa kel-la y asin kultiva ruspetu pa ves di kada un.

Ta kuntinua – Brevimenti nu ta publika parti IV ki e últimu parti y nu ta aborda más alguns preokupasons y sujestons ki nu konsigi apura y nu ta spéra ma ku es mudéstu kontribuisaun kumunidadi ta fika más ben informadu sobri operason di vous di TACV Cabo Verde Airlines.

Agnelo A. Montrond,
*Tékniku Superior Ku Spesialidadi Na Explorasaun Aeronáutika, ENAC, Toulouse, France
aamontrond@yahoo.com

TACV Na Kontaktu Dirétu Ku Kumunidadi Na Mérka (Parti II)

Pa Agnelo A. Montrond*

Krónika – Brokton, Stadus Unidus, 9 di Julhu di 2009: Un delegason di Transpórti Aériu Di Kabu Verdi, TAKV (TACV na purtuges) xefiadu pa Prizidenti di se Konselhu di Administrason, PKA (PCA na purtuges), António Pereira Neves, steve risentimenti na Stadus Unidus, na un vizita di kontaktu dirétu ku kumunidadi na Mérka, pa obi di pértu preokupasons y sujestons pa midjora kualidadi di servisu ki TAKV ta presta a se klientis. Es louvável inisiativa di Delegadu di TAKV na Mérka, Alexandre Furtado, foi un duplu susésu tantu pa TAKV komu pa kumunidadi. Es «tête-à-tête» ku kumunidadi foi produtivu, pedagójiku, y el kontribui pa splika y klarifika alguns ekívukus y mal-entendidu ki staba na kabésa di txeu algen na kumunidadi ki aplaudi es enkontru ki ka podeba txiga li na nos na midjor óra. Dja nu flaba ántis y nu ta torna ripiti más un bes ma nu ta spéra ma es izénplu ki TAKV da, ta ser sigidu pa otus instituisons ki ta lida ku imigrantis sima Alfandega y otus, y ma es ta faze mésmu kuza.

N ta kontinua ta konpartilha ku leitoris preokupasons, sujestons y respóstas ki dadu y asin kuntribui pa leba es informason pa kunhesiméntu di tudu kes ki ka staba la prizenti, pamodi nu ta pensa ma e’ inpurtanti y di interesi pa tudu nos konpatriótas kabuverdianus:

4. Prosediméntus di seguransa na vou duméstiku: Un partisipanti fla ma nu sta orgulhozu di nos konpanhia di bandera ki e un di kes raru konpanhia afrikanu ki foi aprovadu pa «FAA, Federal Aviation Admnistration» pa bua pa Stadus Unidus, ki pa kiston di seguransa ka ta aseta txeu konpanhias stranjeru pa bua pa Mérka. Má perguntadu pamódi ki prosediméntus di kontrólu di seguransa e fetu ku elevadu profesionalismu y ku un altu nível di «Know how», ki kuazi tudu kuza ta pasadu a penti finu, na tudu vou internasional, má na vou duméstiku abusulutamenti nada ka ta fazedu. Inda kel partisipanti karapati pé rixu na txon y e’ fla ma vida di un pasajeru ki ta bai di Boston pa Praia, pur izénplu, e ka más inpurtanti ki vida di un pasajeru ki ta bai di Praia pa Fogu, pur izénplu. Fladu ma en ves di diskrimina seguransa di pasajerus na vou duméstiku ku internasional, debe uniformizadu kontrolu di seguransa di pasajeru, di ses bagaji di mon, di ses bagaji ki ta bai na puraun y di kurreiu, pa tudu vou: fépu, kumersial duméstiku ku internasional. Respósta a es perguntas y preokupasons ka foi mutu klaru y nen e’ ka foi konvinsenti. PKA di TAKV rekonhesi ma seguransa y prevenson pa ka kumetedu atu ilísitu a bordu di aviaun, y naun só, e senpri prioridadi númeru un na aviasaun sívil y e’ akresenta ma mestedu un djunta mon pa rezolvedu es keston. N ka ten sertéza, má parse-m ma nes mumentu sta un entidadi internasional ta faze auditoria na TAKV y nos sonhu e ma brevimenti ta inplementadu prosediméntus di seguransa uniformizadu pa kontrolu di tudu vou duméstiku na Kabu Verdi sima kes ki ta fazedu na vou internasional.

5. Stop pa más di 24 óra; Kolokadu kiston di prolongaméntu di stop pa más di 24 óra (másimu di un simana) sen aumentu na présu di pasaji y Diretora Kumersial splika ma kel-la e un kiston di pulítika di tarifa di TAKV ki ta sigi un prátika internasional di présu na es matéria. Maria Da Luz Spencer dexa klaru ma si stop e pa un ténpu inferior a 24 óra présu di bilheti e óbviamenti más baratu ki si e’ for pa más di 24 óra ki dja présu ta ser lójikamenti más karu.

6. Prumuson - Kiston di tarifa prumusional: perguntadu pamodi ki ta fazedu publisidadi ma bilheti ta sta a venda pa un présu promusional, duranti un determinadu periudu di ténpu, má óras ki gentis ta bai kunpra bilheti, inda déntu di kel periudu di ténpu ki foi stabelesidu, es ta fladu ma bilheti na présu di prumuson dja ka ten más pamodi dja es bendedu tudu. Fika klaru na respósta, ma publisidadi di promuson (ki algen txiga di rotula di publisidadi enganóza) ten omitidu un informason inpurtanti ki e ma promuson e ka pa un númeru ilimitadu di lugar má sin pa un númeru limitadu di lugar ki ta podu a dispozison di klientis na un bazi «FCFS, First Come First Served» ó seja ken ki kunpra pasaji prumeru ta konsigi kunpra na présu di promuson y kenha ki dura na ba kunpra, dja ka ta atxa bilheti na présu di promuson, pamodi dja es ká kunpradu. Tanbe, akuzadu TAKV di prátika di «amigismu y kunpadriu» pamodi fladu ma ta ba kunpradu bilheti na présu di promuson y ta fladu ma ka sta más, má otu algen ta bai dipos y es ta bendedu bilheti na présu di promuson. Fazedu sujeston pa TAKV kumesa ta bendi bilheti iletróniku (e-ticket) «online» na undi ki tudu algen ta odja klaru kantu lugar ki sta dispunível, kal ki e présu, etc, y kel-li ta ben klarifika y rezolve kes tipus ki prublemas ki foi levantadu y própi TAKV ta fika izéntu di es tipus di akuzason. Tanbe, pa fasilita y sinplifika vida di klientis, sobretudu ku entrada en vigor di «e-tickets» a partir di prósimu mes di Dizénbru, en ves di aseita pagaméntu só en dinheru líkidu ó ku karton «Mastercard» ó «American Express», TAKV debe da ixpidienti y kria kondison pa kumesa ta aseita VISA tanbe ki e más popular li na Mérka, si N ka sta inganadu.

7. Modi ki kumunidadi pode djuda TAKV: Perguntadu modi ki kumunidadi pode djuda TAKV y respósta foi ma lideris, ativistas y organizasons sívikas na kumunidadi pode djuda na divulga informason na kumunidadi na kuadru di un asun pedagójiku y idukativu pa faze menbrus di kumunidadi ntende ma ten limitasons ku bagaji di mon ki es ten ki ruspeta, ma es debe bai pa aeroportu pa es pode faze «check in» na óra, pa es entra na sala di enbarki na óra. Tanbe pididu kolaborason y kooperason di pasajerus pa ka viaja ku bibidas alkuólikas txeu dimas, pamodi lei sobri transporti di bibidas alkuólikas ta limita kuantidadi di bibidas ki e pirmitidu. Alén disu, viaja ku txeu bibidas alkuólikas na mon e riskadu y e’ ta konprometi seguransa. Tanbe bebi txeu dimas na viaji, toma un kuzinha, torna toma más un kuzinha, na kel brinkadera di toma di-li, toma di-la, algun fasilitu pode toma gata ki e prigozu, torna pruibidu. Fladu tanbe ma pode ser disagradável fala altu dimas na kabini, pamodi ten algen ki pode ka gosta.

8. Konbustível y présu di bilheti: Foi sujeridu ma kónpra di konbustível, ki e un fator determinanti na présu di bilheti, y ki e un di kes kuzas más karu pa un konpanhia aéria, pa un longu periudu di ténpu ta fika más baratu pa TAKV. Tanbe perguntadu pamodi ki présu di bilheti na époka alta e taun karu si en konparason ku otus distinus ki até pode ser más lonji en térmus di distansia y respósta foi ma realidadi ikunómiku-finanseru di TAKV, naturéza di operason ki e regular y naun «Charter», ses rekursus, enfin dimensaun y realidadi global di TAKV komu konpanhia, e diferenti di otus konpanhia, y tudu kes fatoris la ta influensia présu, ki apezar di tudu dja txiga di ser 499 dóla merkanu. Má parse-nu ma es kiston di présu inda ka fika mutu ben sklaresidu.

N ta pensa ma es enkontru di TAKV ku kumunidadi, e un kumesu di es stratéjia di TAKV ki ta kontinua ta aprosima kada bes más di kumunidadi, na es prokura konstanti di midjora kualidadi di servisu ki el ta presta, y tanbe imájen di marka di nos konpanhia di bandera. Nu sta kunfianti ma ekipa di jeston di TAKV ta leba en konsiderason preokupasons y sujestons di nos kumunidadi, y ma es ta toma mididas ki ta permiti di rezolve kes prublemas ki foi kolokadu pa kumunidadi. Sima ki fladu na enkontru di sábadu, na un Kriolu Térra-Térra, ki kai partisipantis dentu xikra, mandis gentis di Djarfogu, nu ten ki fuku-fuku pa nu pode rezolve nos prublémas. Nos sabedoria popular ta fla: «sima nu kre nu ka pode sta, y sima nu sta nu ka pode fika».

Ta kuntinua: brévimenti nu ta publika Parti III

Agnelo A. Montrond,
*Tékniku Superior Ku Spesialidadi Na Explorasaun Aeronáutika, ENAC, Toulouse, France
aamontrond@yahoo.com

TACV Cabo Verde Airlines Na Kontaktu Dirétu Ku Kumunidadi Na Mérka, Parti I

Pa Agnelo A. Montrond

Krónika – Brokton, Stadus Unidus, 4 di Julhu di 2009: Prizidenti di Konselhu di Administrason di Transpórti Aériu Di Kabu Verdi, ki abreviadamenti na Kriolu nu ta dizigna pa PKA (PCA na purtuges) di TAKV (TACV na purtuges), respetivamenti, y se delegason sta na Stadus Unidus na kuadru di un vizita di kontaktu dirétu ku klientis y kumunidadi en jeral na es zóna di Nóva Inglatérra, na Mérka ki e un merkadu inpurtanti pa TAKV (TACV na portuges), pa obi di pértu preokupasons y sujestons di kumunidadi, ku objetivu di midjora kualidadi di servisu ki TAKB (TACV na purtuges) ta presta a se klientis. E prumeru bes, salvu érru, ki un delegason di es kalibri riuni ku kumunidadi pa toma pulsu di prublémas ki ta afeta-nu y pa inklui-nu na buska di suluson di nos própi prubléma. Nu ta kongratula PKA (PCA na purtuges) di TAKV (TACV na purtuges), Antonio Pereira Neves, y se delegason, konpostu pa Xéfi di pilotus, Komandanti Mario Socorro, Diretora Kumersial, Maria Da Luz Spencer, y Diretor di Gabineti Jurídiku, Arnaldu Silva. Es louvável inisiativa di Delegadu di TAKV (TACV na purtuges) na Mérka, Alexandre Furtado, ki en nómi di kumunidadi nu ta aproveita pa agradese-l di tudu nos kurason, foi bastanti produtivu pamodi el foi pedagójiku, idukativu y el kontribui pa splika y klarifika alguns ekívukus y mal-entendidu ki staba na kabésa di txeu algen. Nu ta spéra ma es izénplu ki TAKV (TACV na purtuges) da, ta ser sigidu pa otus instituisons ki ta lida ku imigrantis.

N teve onra y prazer di partisipa na dos enkontrus ku es delegason: un ku Mídia kabuverdianu na Brokton, sésta-fera dia 2 di Julhu, y un otu ku kumunidadi, onti dia 3 na sala di konferensia di Restoranti Sodadi, na Brokton. Na kes dos enkontru, kolokadu perguntas y preokupasons, fazedu sujestons y dadu respóstas. Na kualidadi di ativista y ménbru di es kumunidadi, y pa responde a un apélu ki foi lansadu a nos kumunidadi, N ta da nha kontribuison y N ta aprezenta di sigida, un rizumu di kes dos enkontru di trabadju, na tentativa di spadja es informason pa kunhesiméntu di tudu kenha ki ka staba la prizenti, pamodi N ta pensa ma es informason e di interesi pa tudu kabuverdianus y naun só:

1. Dispidiméntu: fazedu un pergunta relasionadu ku un entrevista ki PKA (PCA na purtuges) da na Olanda, sobri negosiason y ajustaméntu di pesoal na kuadru di legislason laboral kabuverdianu, komu un pusível midida pa rizolve prubléma finanseru di TAKV (TACV na purtuges). Na se respósta, el fla ma e difisil atxa un soluson di ikilíbriu entri TAKV (TACV na purtuges) y ses trabadjadoris sindikalizadu, pamodi ku lei laboral kabuverdianu atual, dispidiméntu di trabadjadoris e difísil, y ma debe ivitadu. Fika klaru ma na Kabu Verdi e ka fásil dispidi trabadjador sima li na Mérka. Anton, el sujiri ma talves meste djobedu lejislason laboral kabuverdianu.

2. Dos maléta na bai y só un maléta na ben: un partisipanti pergunta pamodi ki na perkursu Boston – Praia, kada pasajeru ten direitu a leba dos vulumi (dos maléta), má na perkursu invérsu, Praia – Boston, kada pasajeru ten direitu a traze só un vulumi (un maléta). Na se respósta, PKA (PCA na purtuges) (ki kuidadozamenti remeti es kiston tékniku pa Xéfi Pilotu) fla ma e pamodi na ta bai pa Praia, ténpu di viaji e sérka di un óra más poku ki na ta ben pa Boston, pamodi ten béntu di kauda ki e favoravel na ta bai y ten béntu di frenti ki e disfavorável na ta ben. Kumandanti Socorro konplementa respósta di PKA (PCA na purtuges) y el fla ma kel sérka di un óra di vou a más ó a ménus ta kuresponde a alguns toneladas di kunbustivel a más ó a ménus. Fika ben klaru ma komu ta mestedu más poku konbustível na ta bai, aviaun ta pode leba más karga (payload, sima ta fladu na ingles) y pur isu kada pasajeru pode leba dos maléta. Má komu na ta ben, ta mestedu más txeu konbustivel (ki e un penalizason pa payload) ki na ta bai, aviaun ta traze ménus karga, y pur isu ki kada pasajeru só ta pode traze un maléta. Es respósta tékniku, ki na realidadi e un limitason di kapasidadi di es aviaun ki sa ta uzadu na es muméntu na es perkursu Boston – Praia – Boston (nu ta fla di pasajen ma pode ka ser aviaun ideal pa izijénsia di es vou ki e di longu perkursu), parse-m ma konvense tudu partisipantis. Sujiridu pa TAKV (TACV na purtuges) kumesa ta faze vou kargeru pa Kabu Verdi pa tenta rizolve es prubléma di pasajeru ki ta kre bai pa Kabu Verdi ku txeu malétas. Nu sabe má na nos kultura, óras ki un algen ta bai di Mérka pa Kabu Verdi, el ta kre leba pelu ménus un prizenti pa kada un di ses amigus y familiaris, ki sima nu sabe ás ves pode ser txeu (alen di prizentis ki gentis ta pidi-l pa el leba pa ses amigus y familias), y sima un partisipanti fla, si badu Kabu Verdi y ka leba prizenti, as ves pode korredu risku di ka rasebedu dretu. Na se respósta, António Neves fla ma dja es tinha pensadu na es tipu di vou, ma TAKV (TACV na purtuges) ta kumesa brevimenti (pusivelmenti a partir di prósimu mes di Dizénbru) ta faze vou kargeru pa Kabu Verdi, y partisipantis fika tudu kontenti ku es nóba.

3. Atrazu: tanbe fazedu pergunta sobri atrazu na vous di TAKV (TACV na purtuges) ki as ves pode ser txeu dimás. Na se respósta, PKA (PCA na purtuges) fla ma apezar ki atrazu ta kontise ku otus konpanhia tanbe, e ka só ku TAKV (TACV na purtuges), nos konpanhia di bandera sta enpenhadu na minimiza atrazu, y ideal seria ilimina atrazu pur konplétu. Má el rikonhesi ma atrazu e un prublema bikudu y di difisil soluson pamodi na ekuason di atrazu ta intervê variáveis ki muitas vezis e ka fásil di kontrola, sobretudu pamodi atrazu na un vou pode provoka atrazu na un otu vou, y ku limitason di númeru di aparelhus ki nu ten, atrazu ta kauza TAKV (TACV na purtuges) algun dór di kabésa. Má fika klaru ma e un kiston ki pode studadu y enkontradu soluson ki infilismenti ka ta depende só di TAKV (TACV na purtuges), má tanbe, entri otus, e’ ta dipende tanbe un poku di pasajerus ki debe kolabora. A es respetu fladu ma bagaji di mon e realmenti un prubléma: ten pasajeru ki ta leba 2 ás ves 3 bagaji di mon enkuantu ki só un bagaji di mon ku un pézu másimu di 5 kilu e pirmitidu. Si for más di ki 5 kilu dja e ten ki podu na poraun y si for txeu e ta provoka atrazu. Ten otus algen ki ta leba bagaji di mon mutu grandi dimas ki ka ta pode lebadu nen na poraun. TAKV (TACV na purtuges) ten ki leba kes bagaji la pa ses skritóriu na Quincy y klaru ki tudu kel-li ta kontribui pa más atrazu inda. Tanbê, fladu ma alguns pasajeru ka ta entra na sala di enbarki na óra pamodi konformi e abitu na nos kultura, es ta fika djuntu ku ses amigus ó familiaris pa kel últimu abrasu ó beju y kel-la ta provoka atrazu. Es papia di kes kauzas li, má inda ten más otus kauzas ki es ka papia d’el y ten otus kuzas ki ka ten nada a ver ku TAKV (TACV na purtuges) ki txeu bes ta paga pa kulpa di otus.

Ta kuntinua: brevimenti nu ta publika parti II

Agnelo A. Montrond,
aamontrond@yahoo.com