ISUBÁ FANTASMA ANÓNIMU: KOBA-M SÓ FÉDI Y INTXI-M DI TUDU ÉRRU!

Agnelo A. Montrond

«… Intxa bu kakulâ, sima mar di alkatrás. Txorâ, bu txorâ sangi, bu rabentâ di raiba. Krédu-in- krus, figa-kanhóta, sinal di Santakrus. Bai diberbunkadu, pa spasu superior. Ba prantâ bu bóka, la na préga-l mar. Bu ten sónbra runhu, bu ten spritu pizadu. Ami N ka fidju kreki, nen N ka lan di banbarderu. Ba pa piku di inférru, pa N ka deta-bu na txabi, pa N pranta-bu kadiadu na kel bu bokon di Burru …», parti di létra di Karkutisan interpretadu pa Linkin y Klarinda.

Dedikatória: 1) Pa tudu leitoris di LIBERAL, N ta didika es meditason y reflekson sobri kumentáriu ki un fantasma kobardu y anónimu ku identifikason falsu (ti póva kontráriu) di Osvaldo Monteiro - omonteiro@gmail.com faze na rodapé di nha artigu KA NU PARTIDARIZA LINGUA KABUVERDIANU, undi ki gratuitamenti el ta insulta-m ku uns balélas kobardamenti inventadu; 2) Pa direson di LIBERAL, ki iventualmenti ta bazia na liberdadi di spreson pa aprova, publika, y viabiliza kes tipus di kumentárius injuriozus, ki kategórikamenti ta viola direitus umanus.

N manda un mensaji pa omonteiro@gmail.co, má ti inda N ka resebe se respósta. Es pesoa ta izisti ó e un Fantasma mé-divéra?

Enkuantu N ta aguarda respósta a es pergunta, N ta konsidera ma e un Fantasma, ti el ganha koraji pa prova kontráriu, ku se verdaderu nómi y se fotografia, móda mi N sa ta faze li.
Sima N flaba ántis, pa un kiston di prinsípiu, pa respetu, karáter, moral, y integridadi ki várius funsons ki N ta dizenpenha ta iziji, N ka sa ta ben reaji a kes tipu di kuzas li, ki e ka pa liga. Má kel-li gó N ten ki fla-l publikamenti y asumidamenti, ku tudu ironia, eufémismu, ipálaji, subérba y konbérsu pardubaxu ki nu ten na Kriolu, inspiradu na kel karkutisan li-dirriba li:
Isubá Fantasma; N ka meste fla-u: karkuti-m; Funda-m Mon! Ka bu responde-m; Skrebe kumentáriu na Kriolu, má ku AK, Alfabétu Kabuverdianu, bu fla ma mi e oportunista politikeru; Skrebe otu, na Kriolu má ku AK, Alfabétu Kabuverdianu, bu fla ma mi «e demagogu ki ta muda di partidu pulítiku sima muda di klubi di futibol»; Fantasma bu ten graxé; Inxina mosinhus es kuza e modi; Skrebe más un kumentáriu, na Kriolu, má ku AK, Alfabétu Kabuverdianu, bu fla ma mi e «dizonéstu, kabésa lébi, sen valor, sen prinsípiu, demagogu y pseudo-intelektual ki ta muda di filiason partidáriu só pa sirbi nha interesi pesual di muméntu»; E la Fantasma karkuti-m; Txaputi-m; E la mui-m; Morde-m;

Fantasma bu skesi di skrebe na bu kumentáriu, na Kriolu, má ku AK, Alfabétu Kabuverdianu, ma N ka ten kursu; ma N ka ten ninhum diploma; ma N kunpra nha diploma na Mandjaku; ma N ka «teacher», etc; Isu bá Fantasma, karkuti-m; Panha na algen bu poi tudu só na mi; Kaba ku mi; Koba-m só fédi; Funda-m mon; Da-m n’obidu; E si própi Fantasma, bo e bodóna; Po-m tudu érru ki ten na mundu; Inxina-m es kuza e modi; Tra-m ku bara marmélu; Po-m tudu érru ki ten na mundu ; Fantasma bo e di koraji; Da-m ku pó na bazidja; Baza-m pó; Lonba-m pó na tópi; Xikótia-m kósta ku xikóti kabal marinu; Faze-m aleluia; Mata-m djuda;

Aseiti Fantasma, trotxa-m; Piza-m; Dispreza-m; Rafodja-m; Insulta-m; Sukundi bu pedreja-m; E si própi Fantasma, Xuxa ku mi; Spreme-m; Nheme-m; Lonba-m; Kuspi-m na róstu; Ka bu Libra-m; E si própi Fantasma, bu ten mural; Po-m na ladera; Dipos po-m na rubera; Inverte-m; Reduzi-m a insignifikanti; Frega pé riba di mi; Fura-m odju; Po-m rabu; Po-m skangadja; Da-m ku spóra; Txoma-m di Burru; Txoma-m di Mintirozu na ladera;

Isubá Fantasma: spadjiga-m pó; txobe-m pó; manduka-m; xagua-m pó; da-m kumeda; trabesa-m pó na pontada; rasta-m; foga-m; ratxa-m bafatada; po-m kabrestu; po-m rabitxi; dipos po-m barbitxi - pamodi e kela ki N ta merese; Fantasma, bo bu ka ten médu; Fla-m ma mi e fidju di koitadu; Intxi-m só di kurruptu; Faze-m bióku; Toka-m lata; Unhi-m kadera; E kel ki N ta merese; N ka bu nétu nen N ka nétu di bu batatera; Kasa-m piskós; Po-m travu; Sonda-m, bu da ku mi na txon; Marafusta na mi; Da-m kabesada; Txoma-m bitoku; Txoma-m …

Dipos gó, Fantasma, kunpadri di superintendenti di latrina, bu ta xagua bu bóka fédi ku agu skóntra dimokrasia-l ditadura, pa ningen ka da kónta di kel bu bafu fédi fodóku, bu ta toma frésku na bentu-l ventuinha rabentolinha, bu ta bisti fatu npristadu verdi ku branku marka eMiPêDê, bu ta poi gravata pasbézia na totis di trás pa dianti, bu ta troka konbérsu, troka sujeitu, vérbu, predikadu, y bu ta tatia só na partuges di prétuges na kanpanha, pa bu ben tenta ngana koitadu povu ki bu ta pensa ma e burru, ignoranti, y dodu. Má nganadu ki bu sta, seu Fantasma, xéfi di diretor di ritréti. Spéra bu ta ben odja na 2011 ma povu «quem mais ordena» e spertu y el sabe skodje kenha ki e pulítiku onéstu y stável ku próva dadu, ponderadu pa prinsípius di étika, filantropia, sivismu, elevason intelektual, anti-demagogu, ki ta koloka interesi kulétivu riba di interesi pesual. E li mé ki nu sta, Fantasma. Kontinua … Pa dianti ki e kaminhu. Ti la, fika ku bu bóka na staleru ta karkuti-m y koba-m só fédi na jornal «online» pa via di anonimatu, pa pode fladu ma bo e mangradu, mofinadu riba mofinu, póbri di spritu, torna koitadu. Má bu ka ten nada faze ku mi. Kudadu só pa bu ka xinti tentason di subi na skada la ribóna, ó na prédiu más altu ki ten na undi bu sta, pa bu kanpia y lonba na txon pa bu fika stiradu la, pa bu ba panhadu ku gudja! Ó bu ta prifiri xinti tentason di txupa limon pa bu pode kala ku es bu konbérsu ki ka bale nen mei-tiston furadu, ki ningen ka sa ta liga-bu?

Agnelo A. Montrond