Lingua Más Sabi E Kel Ki E Di-Nos

Pa Agnelo A. Montrond

Dedikatória: N ta dedika es puema pa tudu menbrus di nos Parlaméntu na Kabuverdi

Lingua más sabi e kel ki e di-nos
El e ki e txabi ki ta abri-nu porton di nos ilha
Pa nu kumunika sen kenhenhi na tudu djeu
Sen burgónha, na tudu repartison
Sen médu, na tudu tribunal
Sen mantxontxa y sen érru, na skóla
Má ku liberdadi tudu óra y na tudu kau
Y ku lejitimidadi konstitusional na Parlaméntu


//

Lingua más sabi e kel ki e di-nos
Kriolu bo e taun grandi ki ningen ka pode ranja diskulpa pa rabaxa-bu

//

Ai si nu ka ofisializa-l
Iklipsi na nos alma pode ser total
Arbisa sabi N pode ka ten pa N da-l
El ki sta di vizita na Sal
Y nos mininus pode ben pasa mal

//

Lingua más sabi e kel ki e di-nos
Kriolu, bo e taun grandi ki ningen ka pode ranja diskulpa pa ka ofisializa-bu

//

Forsa di Kriolu
Nos lingua di bérsu
Ki e itérnu y imortal
Abri fódja di libru di nos konstituison en flor
Skrebe na tudu variantis ki bu ten
Ma si Purtuges e grandi y el e amor
Abo inda bu kre-nu más txeu pamódi bo e maior

//

Kriolu, abo e taun grandi ki ningen ka pode inferioriza-bu
Nen forsa di Kretxeu ki Nho Eugenio dedika-bu
Skrebedu gó ku alfabétu npristadu na Luis de Camões
Ki kantadu na Japon ku vós di oru di nos rainha Cesária
Ku pé na txon di orgulhu di nos ré maior

//

Melodia di Nha Kodé di Pedro Cardoso nina-bu sima mininu Jizus
Ta obi robéka franses di Linkin
Ta geme dór di nos dór na Rubera Djeu
Na mi menor ku arku Rubera Nhor Dés

//

Lingua más sabi e kel ki nu kre pa batizadu
Ku el nu ta ntendedu na tudu kabu
Ku el nu ta konbersa ku Deus
Y nos konbérsu ta txiga séu y ta obidu

Agnelo A. Montrond, USA
aamontrond@yahoo.com