Agnelo A. Montrond Stória, stória, fartura di séu, amen!
Éra un bes tinha dôs rapasis ki só es kontraba ku kunpanheru, es ten ki pegaba na konbérsu …
Un bélu dia, Karkutisan ba toma kafé na Kafé Armonia-Dósi-Enkontru, y el kontra la ku Konbérsu-Sabi ta toma se kafé. Na maré ki Karkutisan kumesa ta ndoxa se kafé, el kunprimenta Konbérsu-Sabi di maus modi, y el tra-l na konbérsu. Ses konbérsu ba ta panha ténpra manenti-manenti. Tudu gentis ki staba la, alguns pa interesi y kuriozidadi pa kel konbérsu, y otus só pa gana di da fé, sigi kel konbérsu di pértu y ku atenson. Konbérsu fika ta puxa konbérsu y kuzas ba ta kenta, ta kenta ti ki fumu fika ta baza y lumi staba kuazi ta pega. Bóka di Karkutisan fika tãu kenti y margós ki se konbérsu fika ta sai en braza y tudu margosadu. kel li gó N tinha ki kontaba-nhos. Má nhos ta bai tra nhos konkluzon y moral di es stória nhosmé. Kel konbérsu foi si:
Karkutisan: Bu stratéjia é ser autor anónimu di kumentárius na jornal pamodi bu ka ómi. Y bu manha é bisti di mudjer y muda vós pa papia konbérsu di ómi.
Konbérsu-sabi: Nau, bu debe sa ta kunfundi-m ku otu algen. Mi, N ten orgulhu di identifika nha kabésa y da kara ku nha fotografia y asumi kuza ki N ta fla. Mi, N ta pensa y skrebi só kuzas puzitivu. Nha fatu y más ropas ki N ta bisti é nha integridadi, nha onestidadi, y nha postura na sosiedadi.
Karkutisan: Ben ku konbérsu sabi, ku vós doxi sima sukri prétu. Nhu artikula nhu ben. N ta funda-bu mon já, kutubenben.
Konbérsu-sabi: Nu kalma! Ka meste gérra. Briga ku konbérsu ka ta rizolve nada. É só dizamizadi ki bu ta kria. Lenbra ma ten palavra ki ta firi más di ki própi punhal. Y ten otus ki é moda un flôr. Mi é favor a pás entri nos y kóntra tudu tipu di gérra.
Karkutisan: Ka bu ben tenta ngana-m ku bu konbérsu sabi. Só dja-m avisa-u. Nén pa ka tenta. Bo é só na puxa-puxa. Midjór bu susega, pa N ka dizinburra na bo, bruxa. Katxupa di rei é ka pa tudu stangu xuxu di inveja.
Konbérsu-sabi: N ta akredita ma ku konbérsu y boa vontadi tudu kuza ta rezolvi. Krispason dja ka sta na móda más. Pulítika ta fazedu é ku pedagojia y nãu sima ki Mané kre dizanka na inosenti ki ka debe nada. Nha katxupa é suor di nha trabadju y é nha méritu. Má é di nos tudu. N ta kume nha katxupa y N ta da tudu algen bokadu.
Karkutisan: Odja kenha ki sta papia di krispason. Obi diabu ta papia di bujon. Má mi gó bu ka ta nbrudja-m nau. Kel é bu trabadju. N ka bu kuléga, dengenhudu. Ba djobe bu pé d’érba ki bu ta brinka ku el, stangudu. Kredu-in-krus bóka fédi. Bá indjon, felpudu! Ku mi ka podedu.
Konbérsu-sabi: Nos tudu djuntadu inda é poku na es taréfa di dizenvolve Kabu Verdi. Dizenvolviméntu é ku trabadju y óbra. É ka ku konbérsu fédi, koba nos kunpanheru, y rabaxa nos opozitoris pulítiku, ki ta lutadu kóntra pobréza y atxadu suluson pa nos prublémas. Unidadi na diferénsa y luta pa nos kauza kumun ki nu meste pa transforma Kabu Verdi na un país undi ki tudu kabuverdianu ta vivi un vida di kualidadi y na dignidadi.
Karkutisan: Kualidadi y dignidadi? Bu sta na xuxadera! Midjór bu toma juis pa juis ka toma-bu. Mi bu ka ta ngana-m, dexa-m ba ta fla-bu. Dja-m bebe agu di tudu kulidadi: dósi, móli, salobradu, salgadu, di sistérna, di fonti, di txafaris, di moringu, di póti, di jilera, di garrafa, di kópu, agu sagradu di ká Nho padri, enfin ti H2O dja-m bebe. Dja bu obi? Mi é ka duspi deta nãu. Y dja-m pode ku nha konbérsu. Aian! Dja-m fla-bu y N ta torna fla-bu ma bo é só na puxa-puxa. Si bu ka obi N ta ripiti-bu ma é midjór bu susega, pa N ka dizinburra na bo, dibérbunkadu.
Konbérsu-sabi: Experiensia ta rima ku konpitensia, má é ka ta rima ku sarbaxaria. Pensa puzitivu, pa dianti ki é kaminhu. Lenbra ma kaminhu londji ta andadu di béspa, y é ka na béspa di ba pa sérra ki ta kriadu katxor. Atenson! N ka kre fla ma bo é katxor. N sta só na konparason di konbérsu.
Karkutisan: Obi li mos: koraji di nha vérsu skerderu na es gérra virtual, ganha fama na Paiol y na Txadinha! Kel santu ki ta garda-bu ki ta garda-m tanbe, prega-sainha! N ka ten médu di xuxu ki fare di diabu patakeru irmon di pixinginha!
Konbérsu-sabi: Dja-m obi. Ma é na pás ki nu debe luta pa midjora nos térra.
Karkutisan: Idukason ben la di koleju y koleju ben la di Lisboa. Bu mai ka d’el, bu pai ka d’el y bo na el é te tolera na Ganboa. Diplóma bodóna ka ta kunpradu na lója, nén é ka ta tradu atoa. É só ku próva dimonstradu di kapasidadi ki el ta konsigidu ku méritu na proa.
Konbérsu-sabi: Aian, é sima bu fla. Pelu ménus un kuza dretu dja bu fla.
Karkutisan: Bo é falsu, bá-tinbóra. Bu tenta bandona-m y bu bandona bu própi kabésa na mau óra. É sima fatisaria ki bira kóntra fatisera na krus di zéru-óra.
Konbérsu-sabi: Sin!
Karkutisan: Es bu jeitu ta koba só fedi é ka matxu, nén é ka fémia. Só e pode sér matxa-fémia. Bu koraji é sukundi trás di txikêru pa manda rekadu y papia ku vós di lébri fémia.
Konbérsu-sabi: Kel é ka nha stilu. Dja-m fla-bu ma bu debe sa ta kunfundi-m ku otu algen.
Karkutisan: Bu ka nha nétu, nén bu ka nétu nha batatera. Fidju dôs pá, sén jerason, sén era, nén bera, bu bokera é própi di fatisera.
Konbérsu-sabi: Nos tudu é irmon y fidju di Déus. Insultu é pekadu …
Karkutisan: Ami é kontra ALUPEC. Aian, mi é própi kontra. Má ka bu pergunta-m pamodi, pamodi N ka sabe pamodi. Basta ki mi é kontra. Mi gó! Fladu fla ma é un inpuzison; ma ta ben fika ta papiadu é só Kriolu di Praia; ma alfabétu sa ta ben mudadu; enfin un monti di trapadjada y kalapitxa ki otu nén N ka sa ta lenbra. Si N prende ALUPEC ki N kréka. Nén matadu. Es podi ofisializa-l y tudu, má mi …
Ta kuntinua brevimenti.
Sapatinha rubera riba, sapatinha rubera baxu, ken ki sabe más konta midjór!
Agnelo A. Montrond
Bill Clinton
