Liberdadi Di Spreson Na Kumunikason Susial Kabuverdianu!

Agnelo A. Montrond


Dedikatória: N ta didika es vérsus a tudu fantasmas sibernautas naun identifikadus y tudu kes otus patétas anónimus ki jornal ka ta iziji identifikason y ta permiti-s pa es sukundi na braku y manda bóka kóntra artikulistas ki es gó es ten ki identifika y da kara ku fotografia, menbrus di guvérnu, líders asosiativu, rilijiozus, pulítikus, pesoas individual ó kuletivu, instituison, sidadon komun, ets.


Es puema ta rima sén rima,
El ka meste métrika
Nen melodia-l matimátika
Di puéta ka nporta
Ki ta nbia runhu móda dirrumunhu-l Bórta-bórta.
//
Kara-l pó di txeu biku y kumentáriu anónimu ki sta na móda gósi!
Y ta publikadu kumentáriu ki ka ten a a ver ku artigu,
Pa kumentaristas pode da ku pó sén manha na burru marradu,
Pa dizaforu pamodi e kela ki artikulistas ta merese.
//
Kenha ki ten kara-l pó só di un biku,
Ó el e dodu, ó el e di Trás,
Ó el e di Erriba
Ó el e di Esbaxu
Ó el e di Krus di Bérru.
Ó el e di Piku di Inférnu
Má el e ka di Kutélu.
//
Ó el ka tene nada na trus,
Ó el ka atxa nada na kalsinha
Y el ta dizinburra na inosenti.
Má pamodi nha genti? Pamodi?
//
Es raiba-l kamalhaun mudu y surdu di txeu biku-l falsidadi
E di grasa, y e ka pa paga
E di nha irmun Kanpetxa, nha amigu-inimigu, ki ka bale nen meiu tiston furadu.
//
Es raiba mudu y surdu di txeu biku-l falsidadi
E ka dadu
E ka pistadu
Nen e ka pididu
E ka ta mata sedi
Ki fare fomi
//
Pamodi e raiba di katxorrinhu duenti.
//
Kulpadu e vulkaun di Fogu ó vinhu manekon di gentis Montrond?
//
Skrebe puezia dja bira terapia
Kumentárius anónimu é alegria y pon di kada dia
Kuze ki N ta faze si e duensa?
Dexa Galu kanta na baia
Y autoriza katxor pa ladra londji la Kobon.
//
Pamodi e ka beneni maldadi ki ta da kabu-l puéta dizafinadu,
Ki ta suisida tudu bes ki el ta skrebe un puezia disnortiadu,
Nu ó bistidu pasbézia,
Sén sapatu ó ku sapatu furtadu,
Ku pé na txon y spritu na kaxon.
//
Puéta di bibi ratxadu ta txora filisidadi ku aljéma na mon …
//
Puéta ki nase puéta,
E kel ki ten kara di-médivéra,
Metadi feiu-bunitu y badiu,
Metadi bunitu-feiu y sanpadjudu,
Y metadi sén beléza, sén metadi y di Santa Luzia.
//
Puéta e Kriolu di Kabu Verdi
Ki ta skrebe sabi ku Alfabétu Kabuverdianu.
Sima na mensaji di Natal
Ki nos Pruméru Ministru José Maria Neves manda-nu es anu na Kriolu
Y el ta ba-nu lizu diretamenti pa nos korason, sén sforsa pa pensa ku kabésa
Sima ki Nelson Mandela fla.
//
Es nha puema éra pa ser pruibidu, sensuradu y publikadu antis di N skrebe-l.
Má Jizus dipos di keda ka meste.
//
Ka nu kunfundi liberdadi di spreson ku liberdadi di funda algen mon.
Nha genti, e kóntra direitus umanu na tudu Nason.
Ka nu kunfundi dimokrasia ku sarbajaria.
//
Direitus y deveris debe podu na balansa.
Si un algen ten liberdadi di spreson pa difama un otu, injuria-l, insulta-l, suja-l se nomi, ets
Kel otu algen tanbe ten ses direitu, konformi sta konsagradu na nos Konstituison
//
Pur isu, nos ministru di tutéla ten razon ti ki ta sobra
Pa prupoin já y sén dimóra,
Un pakóti lejislativu
Pa disiplina y regulamenta liberdadi di spreson na kumunikason susial kabuverdianu
//
Pa ki lei di indemnizason pa danus moral ó otus
Kumesa ta vigora na Kabu Verdi
Sima ta kontisi na kaulker país di direitu dimokrátiku.
//
Agnelo A. Montrond