Pa Agnelo A. Montrond
Salvu érru, ku bazi na kuadru jurídiku kabuverdianu atual, ka é pusível arkua ku konsekuênsias legal ó inputa responsabilidadi jurídiku pa:
ameasa - ameasa algen ku palavras skritu na kumentáriu a se artigu di opinion, ku intenson di kauza-l un mal grávi y injustu, devia ser punidu;
injúria - ofénsa a dignidadi ó dekoru di pesoas, tanbe devia ser punidu;
kalúnia - falsamenti inputa algen un faktu difinidu komu un krimi; nes kazu devia ser punidu tantu autor di kalúnia komu jornalista ki sabendu ma kalúnia e falsu ta propala-l ó divulga-l;
difamason - inputa algen un faktu ofensivu a se reputason, devia ser punidu;
identidadi falsu - un algen ki ta uza identidadi falsu pa kauza danos a otus;
ó otu ofénsa kualker, kumetedu na spasu virtual pa un anónimu.
Nes muméntu nén autor anónimu, nen órgaun ki ta publika kumentárius anónimus negativu ka sa ta inputadu responsabilidadi. Pamodi? Kel-li ki é pergunta ki N ta koloka a nha kabésa y a tudu leitoris. Má komu ti inda tudu sa ta pasa inpunementi, es, tantu responsáveis di jornais dijital komu komentadoris anónimus, sa ta kontinua, sén burgónha, ku es prátika ki pode sa ta kria un mal-estar susial ki meste konbatedu ku urjênsia. E ka ta benefisia ningen. Au kontráriu e ta baxa nível y el ta promove mediukridadi. Anton, N ta ripiti y N ta torna fla ma é nesesáru regulamenta y disiplina es aspétu na kumunikason susial kabuverdianu. Y N ta spéra ma ken ki e di direitu ta torna obi es nha apélu. Ku es preokupason na menti, N sa ta ben konpartilha ku leitoris nha opinion en relason a es matéria, através di es siginti vinti pontus:
1. N ta parti di presupostu ma nos tudu nu ta difende Kabu Verdi, kabuverdianus, nos lingua y nos kultura, ku únhas y dentis. Nu debe faze-l livrimenti, má déntu di ruspetu, idukadamenti, y nu debe kritika ideias y naun pesoas, mensájen y naun mensajeru. Krítikas pesoal ki e negativamenti akutilanti, ofensivu, repugnanti, kontumas y dispropozitadu devia ser filtradu, poupadu (ó anton devia kriadu un spasu separadu própriu pa es fin) ó anton mandadu diretamenti pa se destinatáriu através di kurreiu eletróniku di kel pesoa vizadu, en ves di publikadu. Sobretudu óras ki autoris ka ta asumi y es ta da kara ku anonimatu, talves apoiadu y até ku kunplisidadi di kenha ki ta disponibiliza spasu pa es veikula ses negatividadi. Será ki es autor(is) di kumentárius anónimus negativu ta uzufrui di liberdadi di koba y di insulta pesoas, ki na ninhun parti di mundu sivilizadu ka ta izisti (só na DJANÓNIMO talves)?
2. Infilismenti maioria di kumentárius na internet é anónimu y negativu. Nu ta pergunta pamodi y nu ta kestiona lejitimidadi di anonimatu negativu. Kuzé ki ta leba un algen a sukundi na braku di anonimatu pa el da se opinion «come il fault» ó kumenta ku profundidadi konteúdu di un textu ó un artigu kualker?
3. Será ki e pamodi un kumentarista anónimu e konpleksadu, e ka orgulhozu di se opinion, se pontu di vista, se argumentason, ets, y pur isu e ka ta asumi-s ku frontalidadi?
4. Será ki e pamodi el ten médu di konsekuênsias negativu di kuzas ki el ta skrebe?
5. Puxa pá! Anton será ki e medu di asumi autoria di un komentáriu intelijenti, konstrutivu, ínpar y jenial?
6. Ó será ki e só pamodi kumentarista anónimu e un fantasma ki ka kre pa ningen sabe ma el ta izisti – El ten medu di se izistênsia kaótiku y enigmátiku?
7. Será ki e un terapia pa duénsa di dizikilibriu psikulójiku ki ta ikilibra óras ki un kumentarista anónimu ta tra ku funda na «internet»?
8. Dja N analiza alguns kumentárius anónimus «online» y tendênsia é ki maioria é negativu: difamason, injúria, kalúnia, falsifikason di identidadi, ameasa, linxaméntu di pesoas, enfin, sujeira di karáter individual, profesional, susial, pulitiku, ets. Y komu tudu kuza ten un razon di ser, ten ki ten un splikason plauzível pa es postura anónimu na internet. É ka só kritika gratuitamenti na ton di brinkadera pa suja y poi otus baxu, baxu-l trósa. Es tipu di pesoas é meskinhu, kobardu, di personalidadi baxu, y mediúkri. E algen ki ka sa ta dadu atenson y sta na un mundu di frustrason y ta prokura sublimason di ses prublemas na koba algen, fla fédi, na tentativa di faze tudu algen bira sima es: un órfaun susial, dizorientadu, un terrorista spiritual pa distrui tudu kenha ki ta faze-l sónbra ó ta difende un ideolojia diferenti di di-sel. É kela ki ta txomadu di ignoránsia multi-dimensional y rezistênsia tantu pasivu komu ativu pa tudu kenha ki ten, pode, sabe, ó ta manda.
9. Má ka ten régra sen isépson. Ten pesoas ki pode atxa ma es ten lejitimidadi pa opta pa anonimatu pur kauza di inkonpatibilidadi ku kargus ki es ta dizenpenha, y es ta da kónta ma ses liberdadi di spreson sta limitadu y es ta prokura es via pa veikula ses opinion.
10. Será ki anonimatu é konsekuênsia di limitason di liberdadi?
11. Pa un algen koba se xefi, ka konkorda ku se stratéjia pulitiku, ets, ten ki ser pa via di anonimatu, pamodi medu di perde inprégu?
12. Anton anonimatu e razultadu di inperfeison di dimokrasia ki é kontroladu?
13. É un défisi di dimokrasia?
14. Un sidadon debe ser livri di skrebe ó fla kuza ki el ta pensa ó xinti, ku máskra ki el ta prifiri, pamodi el ten direitu absolutu a liberdadi di spreson y vive na un dimokrasia perfeitu?
15. Será ki anonimatu ta atraiu pesoas pa enrikesi partisipason na komunikason susial dijital? Ó Será ki nos kumunikason susial kre é kuantidadi en ves di kualidadi di partisipason?
16. Má nu lenbra ma kes ofénsas ki N mensiona anteriormenti é ka toleradu nén pa pesoas anónimus nén pa pesoas ben identifikadu. Má gentis ka nu konfundi dimokrasia ku direitu inalienável pa rabaxa pesoas, difama-s, dizakredita-s, ó likida-s moralmenti. É ki ten un konflitu natural entri liberdadi di spresa na anonimatu pa suja bon nómi di pesoas, y direitu ki kes pesoas ten a ses bon nómi. Txeu di kes komentárius anónimus e taun negativu ki más sédu ó más tardi es ta kaba pa intoksika opinion públika.
17. Será ki inpurtanti e ideia ki kumentárius ta irradia y naun autoris (mensájen y naun mensajeru)?
18. Fladu fla ma nalguns jornal dijital, e ka tudu kumentáriu anónimu ki ta publikadu. Só es ta publika kel ki ta konve-s, ki é kóntra artikulista (ki es e kóntra el tanbe), y ki es ta apoia pulitikamenti pa rabenta ku ses opozitoris.
19. Será ki sa ta pulitizadu kumentárius anónimus?
20. Má nu lenbra ma na un país di direitu demokrátiku, liberdadi di un sidadon ta termina undi liberdadi di un otu ta kumesa y frontera di ses liberdadis e un zóna di konflitus konstanti. Pur isu ki siênsia jurídiku ta izisti y ki na un guvérnu demokrátiku dime-divéra ten ki ten un puder judisial y un puder lejislativu separadu y indipendenti di kunpanheru. Y pa konpleta kel sistéma di independênsia y separason di puder «check and balance system; trias politica» ten tanbe puder izekutivu. Nalguns sistemas demokrátiku parlamentar, es separason y independênsia pode ka ser mutu klaru y pode ten alguns «nuances». Má ka nu skese ma dimokrasia puru é un ideal, e utopia, y e ka ta izisti, nén e ka podi izisti pamodi e un konseitu idealista.
Nhos reaji: ku anonimatu ó sen anonimatu, ka ta interesa, desdi ki seja déntu di kes parámetrus …
VIVA INTEGRIDADI
VIVA ONESTIDADI
VIVA ÉTIKA, MORAL, Y ELEVASON
VIVA KABUVERDIANUS
VIVA ALFABETU KABUVERDIANU
VIVA KRIOLISTAS
ABAIXU ANONIMATU NEGATIVU
Agnelo A. Montrond
Salvu érru, ku bazi na kuadru jurídiku kabuverdianu atual, ka é pusível arkua ku konsekuênsias legal ó inputa responsabilidadi jurídiku pa:
ameasa - ameasa algen ku palavras skritu na kumentáriu a se artigu di opinion, ku intenson di kauza-l un mal grávi y injustu, devia ser punidu;
injúria - ofénsa a dignidadi ó dekoru di pesoas, tanbe devia ser punidu;
kalúnia - falsamenti inputa algen un faktu difinidu komu un krimi; nes kazu devia ser punidu tantu autor di kalúnia komu jornalista ki sabendu ma kalúnia e falsu ta propala-l ó divulga-l;
difamason - inputa algen un faktu ofensivu a se reputason, devia ser punidu;
identidadi falsu - un algen ki ta uza identidadi falsu pa kauza danos a otus;
ó otu ofénsa kualker, kumetedu na spasu virtual pa un anónimu.
Nes muméntu nén autor anónimu, nen órgaun ki ta publika kumentárius anónimus negativu ka sa ta inputadu responsabilidadi. Pamodi? Kel-li ki é pergunta ki N ta koloka a nha kabésa y a tudu leitoris. Má komu ti inda tudu sa ta pasa inpunementi, es, tantu responsáveis di jornais dijital komu komentadoris anónimus, sa ta kontinua, sén burgónha, ku es prátika ki pode sa ta kria un mal-estar susial ki meste konbatedu ku urjênsia. E ka ta benefisia ningen. Au kontráriu e ta baxa nível y el ta promove mediukridadi. Anton, N ta ripiti y N ta torna fla ma é nesesáru regulamenta y disiplina es aspétu na kumunikason susial kabuverdianu. Y N ta spéra ma ken ki e di direitu ta torna obi es nha apélu. Ku es preokupason na menti, N sa ta ben konpartilha ku leitoris nha opinion en relason a es matéria, através di es siginti vinti pontus:
1. N ta parti di presupostu ma nos tudu nu ta difende Kabu Verdi, kabuverdianus, nos lingua y nos kultura, ku únhas y dentis. Nu debe faze-l livrimenti, má déntu di ruspetu, idukadamenti, y nu debe kritika ideias y naun pesoas, mensájen y naun mensajeru. Krítikas pesoal ki e negativamenti akutilanti, ofensivu, repugnanti, kontumas y dispropozitadu devia ser filtradu, poupadu (ó anton devia kriadu un spasu separadu própriu pa es fin) ó anton mandadu diretamenti pa se destinatáriu através di kurreiu eletróniku di kel pesoa vizadu, en ves di publikadu. Sobretudu óras ki autoris ka ta asumi y es ta da kara ku anonimatu, talves apoiadu y até ku kunplisidadi di kenha ki ta disponibiliza spasu pa es veikula ses negatividadi. Será ki es autor(is) di kumentárius anónimus negativu ta uzufrui di liberdadi di koba y di insulta pesoas, ki na ninhun parti di mundu sivilizadu ka ta izisti (só na DJANÓNIMO talves)?
2. Infilismenti maioria di kumentárius na internet é anónimu y negativu. Nu ta pergunta pamodi y nu ta kestiona lejitimidadi di anonimatu negativu. Kuzé ki ta leba un algen a sukundi na braku di anonimatu pa el da se opinion «come il fault» ó kumenta ku profundidadi konteúdu di un textu ó un artigu kualker?
3. Será ki e pamodi un kumentarista anónimu e konpleksadu, e ka orgulhozu di se opinion, se pontu di vista, se argumentason, ets, y pur isu e ka ta asumi-s ku frontalidadi?
4. Será ki e pamodi el ten médu di konsekuênsias negativu di kuzas ki el ta skrebe?
5. Puxa pá! Anton será ki e medu di asumi autoria di un komentáriu intelijenti, konstrutivu, ínpar y jenial?
6. Ó será ki e só pamodi kumentarista anónimu e un fantasma ki ka kre pa ningen sabe ma el ta izisti – El ten medu di se izistênsia kaótiku y enigmátiku?
7. Será ki e un terapia pa duénsa di dizikilibriu psikulójiku ki ta ikilibra óras ki un kumentarista anónimu ta tra ku funda na «internet»?
8. Dja N analiza alguns kumentárius anónimus «online» y tendênsia é ki maioria é negativu: difamason, injúria, kalúnia, falsifikason di identidadi, ameasa, linxaméntu di pesoas, enfin, sujeira di karáter individual, profesional, susial, pulitiku, ets. Y komu tudu kuza ten un razon di ser, ten ki ten un splikason plauzível pa es postura anónimu na internet. É ka só kritika gratuitamenti na ton di brinkadera pa suja y poi otus baxu, baxu-l trósa. Es tipu di pesoas é meskinhu, kobardu, di personalidadi baxu, y mediúkri. E algen ki ka sa ta dadu atenson y sta na un mundu di frustrason y ta prokura sublimason di ses prublemas na koba algen, fla fédi, na tentativa di faze tudu algen bira sima es: un órfaun susial, dizorientadu, un terrorista spiritual pa distrui tudu kenha ki ta faze-l sónbra ó ta difende un ideolojia diferenti di di-sel. É kela ki ta txomadu di ignoránsia multi-dimensional y rezistênsia tantu pasivu komu ativu pa tudu kenha ki ten, pode, sabe, ó ta manda.
9. Má ka ten régra sen isépson. Ten pesoas ki pode atxa ma es ten lejitimidadi pa opta pa anonimatu pur kauza di inkonpatibilidadi ku kargus ki es ta dizenpenha, y es ta da kónta ma ses liberdadi di spreson sta limitadu y es ta prokura es via pa veikula ses opinion.
10. Será ki anonimatu é konsekuênsia di limitason di liberdadi?
11. Pa un algen koba se xefi, ka konkorda ku se stratéjia pulitiku, ets, ten ki ser pa via di anonimatu, pamodi medu di perde inprégu?
12. Anton anonimatu e razultadu di inperfeison di dimokrasia ki é kontroladu?
13. É un défisi di dimokrasia?
14. Un sidadon debe ser livri di skrebe ó fla kuza ki el ta pensa ó xinti, ku máskra ki el ta prifiri, pamodi el ten direitu absolutu a liberdadi di spreson y vive na un dimokrasia perfeitu?
15. Será ki anonimatu ta atraiu pesoas pa enrikesi partisipason na komunikason susial dijital? Ó Será ki nos kumunikason susial kre é kuantidadi en ves di kualidadi di partisipason?
16. Má nu lenbra ma kes ofénsas ki N mensiona anteriormenti é ka toleradu nén pa pesoas anónimus nén pa pesoas ben identifikadu. Má gentis ka nu konfundi dimokrasia ku direitu inalienável pa rabaxa pesoas, difama-s, dizakredita-s, ó likida-s moralmenti. É ki ten un konflitu natural entri liberdadi di spresa na anonimatu pa suja bon nómi di pesoas, y direitu ki kes pesoas ten a ses bon nómi. Txeu di kes komentárius anónimus e taun negativu ki más sédu ó más tardi es ta kaba pa intoksika opinion públika.
17. Será ki inpurtanti e ideia ki kumentárius ta irradia y naun autoris (mensájen y naun mensajeru)?
18. Fladu fla ma nalguns jornal dijital, e ka tudu kumentáriu anónimu ki ta publikadu. Só es ta publika kel ki ta konve-s, ki é kóntra artikulista (ki es e kóntra el tanbe), y ki es ta apoia pulitikamenti pa rabenta ku ses opozitoris.
19. Será ki sa ta pulitizadu kumentárius anónimus?
20. Má nu lenbra ma na un país di direitu demokrátiku, liberdadi di un sidadon ta termina undi liberdadi di un otu ta kumesa y frontera di ses liberdadis e un zóna di konflitus konstanti. Pur isu ki siênsia jurídiku ta izisti y ki na un guvérnu demokrátiku dime-divéra ten ki ten un puder judisial y un puder lejislativu separadu y indipendenti di kunpanheru. Y pa konpleta kel sistéma di independênsia y separason di puder «check and balance system; trias politica» ten tanbe puder izekutivu. Nalguns sistemas demokrátiku parlamentar, es separason y independênsia pode ka ser mutu klaru y pode ten alguns «nuances». Má ka nu skese ma dimokrasia puru é un ideal, e utopia, y e ka ta izisti, nén e ka podi izisti pamodi e un konseitu idealista.
Nhos reaji: ku anonimatu ó sen anonimatu, ka ta interesa, desdi ki seja déntu di kes parámetrus …
VIVA INTEGRIDADI
VIVA ONESTIDADI
VIVA ÉTIKA, MORAL, Y ELEVASON
VIVA KABUVERDIANUS
VIVA ALFABETU KABUVERDIANU
VIVA KRIOLISTAS
ABAIXU ANONIMATU NEGATIVU
Agnelo A. Montrond
No comments:
Post a Comment