Pamodi ki ta aprovadu y ta publikadu ofénsas pesual na kumentárius anónimu na «internet»?

Pa Agnelo A. Montrond


N ta koloka siginti perguntas pa prezadus leitoris:

1) Insultu pesoal na kumentáriu anónimu debe ser investigadu y punidu, ó nau?
2) Si respósta e sin, puni insultu e moralmenti injustifikável ó el e prigozu?
3) Bu sabeba ma insultu pode kauza sufriméntu y danus morais ó profesionais na pesoa vizadu?
4) Y bu sabeba ma kel sufrimentu ta dipende si kel algen ki es kre atinji, realmenti kre xinti insultadu?

Alguns eleméntus di respósta a es kuatu perguntas:

a) Ki ta xatia ku un insultu insustentadu e só kenha ki kre. Purtantu, soluson e ka liga kes tipus di insultu la. Y nen ka meste punidu kenha ki ta insulta gratuitamenti. Punison e ka liga, y txau. Só imaturus y kaprixozus ki ta liga insultu y ki ta preokupa ku lejislason pa insultu. Y si nu debeba lejisla es matéria, éra só pa flaba adultus ma es debe konporta komu adultus y naun komu kriansas, na un sosiedadi plural y demokrátiku.

b) Y más, un leitor aténtu ka ta akredita na parvisis ki el ta lé só pamodi un parvu kualker skrebe-s y ku algun kunplisidadi di alguns moderadoris anónimus patétikus di kumentárius anónimus, ki ta viola ses própi statutu y linha editorial, es foi patétikamenti aprovadu y publikadu. E ka pa liga ninhun asnera ki anónimus ta skrebe, pa odja si es ta kiria y bira grandi. Un insultu ta kastiga se kabésa y se própiu autor, pa se própi ifeitu refleksivu di rakoxeti. Y ifeitus di un insultu ta dipende di reputason, imájen y kualidadis di kenha ki sa ta ser vizadu, y di kapasidadi di análizi informadu ki kenha ki sa ta lé pa tra konkluzon. Pur izénplu, un anónimu ki ta rezolve na insulta nos prestijiozus jornalistas Alberto Pina, prizidenti di FORCV, Apolinario Das Neves, diretor di LIBERAL, José Vicente Lopes ó diretora di jornal A Semana Dra. Filomena y ta fla-s ma «es ka ten kursu, ma es kunpra ses diplómas na mandjaku; mas es ta sta na dróga; ma es tenta mata nos primeru ministru ku karru, ets» ó ta txoma-s di «kurruptus, nodjéntus, patétas, gaterus, ladrons, fidjus di p---, patétas, sarbajis, ets», (será ki es ta aprovaba tudu es komentárius li y publika-s sima ki es ten stadu ta aprova y publika kes otus?) el ta perde se ténpu y se enerjia pa nada, pamodi ninhun leitor informadu y aténtu ka ta liga kes insultus la. Y nu debe intende ma e ka pabia di patetisi di un patéta ki nu ta konklui patétikamenti y forma un opiniaun patéta sustentadu únikamenti pa un patetisi patétiku.

c) Ma atenson, predispozison di públiku pode ser determinanti na ifeitus ki insultu pode ten y pode faze algun sentidu lejisla es matéria. Si kuzas ki anónimus skrebe di un algen po-l perde se trabadju, faze-l ser sujeitu di un investigason kriminal, po-l leba purrada, ó algu ekiparadu, anton dja ta justifika arkua ku un prusésu juridíku y leba autor y kúnplisis pa tribunal undi eventualmenti es pode ser punidu izenplarmenti si provadu ma es é kulpadu. Y si for asin, nu pode imajina kes pesoas ta rabenta soru na tésta tres-tres, ta baza skuma pa tudu dos ladu di bóka, ets.

Anton nu sa ta odja klaru ma liberdadi di spreson na kumunikason susial debe ten limiti: ofénsas pesoal a individus privadu, kumentárius anónimus ki ka ten nada a ver ku materia ó ideias ki un textu di opiniaun ta veikula, ofénsas a personalidadis públiku, ó instituisons, sima injúria, difamason, ameasa, insultu, ets, debe fika devidamenti kontenpladu na nos kódigu jurídiku. Nu sabe ma idukason, sivismu, kortezia y onbridadi e valoris ki ka ta inpodu a ningen pa via lejislativa. Má malkriason, salbaxaria, difamason, ameasa, injúria, ets, debe fika devidamenti lejisladu pa es, entri otus, razons ki N aponta li.

Agnelo A. Montrond