Fidju Kabra e Rotxa Ki El Ta Bai

Pa Manuela Pina

Dedikatória: Kel-li ta bá pa tudu argen ki diskisê di se oríjen.


Diskunfiansa e mariadu
Atriviméntu ka ta setadu
Juiz mariadu e dór di kabésa
Burrisi e kastigu

//

Ku ken ki e intilijenti
Tolu ta panhâ mau
Azédu ku dósi ka ta djuntâ

//

Bu distinu e ka agu dósi
E agu salgadu, txoku y fédi.

//

Si bu gosta di kór-di-róza
Nha fidju tumâ juiz
Kazaméntu e ka sabi más.
Pobri ku riku éra un bes.

//

Kriólas teneba odju fitxadu
Bédju ka ten lugar más

//

Ami ningen ka ta ngana-m ki fare ofende-m
Y N ka ta pasâ riba di ningen.
Nén N ka laranja di fundu-l Spigon
Ki durmi dósi y manxê azédu.

//

Nha fidju ka bu diskisê
Ken ki ben di kutélu
Ku mon riba kabésa
Juiz mariadu
Ki pasâ bida na kamóka ku leti
Na kafé di nganha, margós pa kaba matâ
Pé na txon na padjigal
Ranhu na rariz ta pinga na bóka
Dór-d’odju ku raméla na odju.
Ai nha fidju ka bu diskisê ná.

//

Kel ténpu sabi ka ta volta más.
Ténpu sabi e ténpu di mininu.
Má fikâ ta sabê ma fidju kabra,
E rotxa ki el ta subi.

Manuela Pina