SANDIKI

Ten puezia ki é marazia ki só SANDIKI PATXETXETI ku se kapangas ta ntende-l. E ka pamodi Porra ta rima ku Arra ki es é poétiku. Sabedoria popular ta fla ma susésu di uns é tristéza di otus. Nha filisidadi é bu nodju. Má filisidadi é létra ki inda ka ntendedu. El é un direitu ki ta konsigidu só ku dever kunpridu. Filisidadi é un ideal intilijenti y artifisial. E el ki tene-bu ta barbuli na lama.

Filis é kenha ki é perfeitu. Kenha ki ta faze só ben. Tristéza gó é itérnu.
Proporsionalidadi: filisidadi sta pa paraízu sima tristéza y sufriméntu sta pa inférnu

Se tristéza é bu filisidadi, má inda Pilotu ta morde-bu na máma kadera. Tudu pasu ki el da bu sta se trás. Sai katxor, sai … Sai katxorrus, sai, sai …


Oiu burru, oiu. Xita, xita! Ba pa spasu superior. Pega sima léstri na rotxa, txea na rubera, txuba na mar, agu na djarós. Bá txupa rapusada ó divertida. É ka mi ki ta rumina. Kenha ki sta inkomodadu ki ta ratira. Bo é kel padja mau, sen moral y ku kel kara pau. N ta pergunta Deus pamodi ki intelijensia di otus ta inkomoda-bu. Bu sta fumadu o kuzé? Kudadu pamodi bu testa sta kuazi ta nasi txifri tantu pa frenti komu pa trás y pa ladu.

Munda-m di nha bera, pé di bitxu. Pega ku oredja sima karman di kata azeti. Totis tézu. Kanéla moda onzi. Kabélu bedju sima ki ralanpu ku trubada panha-bu kabésa. Bu sa ta txera budungu sima bodi bédju kapadu. Spera bu ta odja bu fin: rusu, séku, raganhadu.

Tudu algen dja ka konxe-bu. Li bu ka ta ngana ningen. N rapende ki N konxe-bu.