Pa Agnelo A. Montrond, USA
Brockton, EUA – 21 di fevereru di 2010 - Dedikatória: N ta didika es puema pa nha amigu y kuléga Prof. Euclides Fontes, ex-diputadu di Nason y un autentiku difensor di Kriolu. Tanbe N ta didika títulu di kabuverdianu di anu 2009, ki N ganha resentimenti na sondájen realizadu pa FORCV, a Dr. Marciano Moreira, más konxedu pa Marciano Nha Ida Padri Nicolau Ferreira, un verdaderu konbatenti pa liberdadi linguistiku y kultural na Kabuverdi, y N ta didika-l tanbe pa kauza y muviméntu pró ofisializason di KRIOLU. Inda N ta didika-l pa kada konbatenti di es luta y labuta pa nos terseru liberdadi linguistiku y kultural: liberdadi di papia, lé, obi, skrebe, y rasiusina na kualker varianti di Kriolu di Kabuverdi, en pé di igualdadi ku purtuges y linguas di paizis di akolhiméntu di kabuverdianus na diáspura.
Oji e dia internasional di lingua matérnu
Dia di KRIOLU, orgulhu di nos Nason Kabuverdianu
Bo e nos lingua di bérsu na es nos bérsu kosmopolita y serenu
Ku bo na bu lugar, nos konkista y libertason ta fika más konplétu
//
Kriolu bo e nos lingua tudu floridu
Bo e nos amor di kretxeu tudu koloridu
Bo e nos flor nasional di nóvi pétalas tudu unidu
Bu ta enfeita nos konstituison y bu ta bira-l más bunitu ki tudu
//
Es ta xinti-bu má ka ta ofisializa-bu
Ta da diskulpa ma kondison sa ta falta-bu
Má ta papia-bu y ta uza-bu
Sen burgónha ki fare pokabrigónha
Na kanpanha bo ki e ofisial
//
Kriolu e sodadi di speransa
Speransa e koraji pa kumesa
Kumesa e kria kondison
Kondison e ofisializa sen dimóra
Ofisializa tudu variantis di Kriolu ki e nos Pátria
//
Ofisializason di Kriolu
E kondison nesesáriu y sufisienti
Pa Kriolu, Lingua ofisial di nos Nason
Sakédu onbru ku onbru ku purtuges
Orgulhozu pa relasiona na dualidadi orizontal
Ku tudu linguas ki ten na mundu
//
Kriolu, ka ten tadju ki ta tadja-nu di ofisializa-bu un dia
Kaminhu e ka mutu lonji
Si vontadi pulitiku sta-nu pértu
Pa nu txiga kel konsénsu ki ta uni-nu
Pa nu labanta identidadi di nos Nason
Agnelo A. Montrond
No comments:
Post a Comment