OMI KABUVERDIANU DI ANU 2009

Marsianu nha Ida padri Nikulau Ferera

Na dia 25/Janeru/2009, jornal online www.forcv.com deklara ma Agnelo A. Montrond elejedu (atraves di un sondajen realizadu pa mensionadu jornal) omi kabuverdianu di anu 2009.

Pa defende kredibilidadi di ses sondajens, Redason di mensionadu jornal ta alega, nomeadamenti: ma rezultadus di kuazi tudu ses sondajens konsernenti a eleisons la na Merka ka fadja kuandu konparadu ku rezultadus efetivu; ma ses sondajens preve vitoria di PAICV na ultimu eleison lejislativu i vitoria di Ulisses Correia e Silva na ultimu eleison autarkiku...

Sondajen dekore di dia 04/Janeru/2010 ti dia 23/Janeru/2010 na mensionadu jornal ki ten sedi la Merka, e dirijidu pa nos konpatriotas i ta afirma ma e prinsipal jornal kabuverdianu na diaspora – ku serka di 200.000 leitor i meiu milhon artigu abertu mensalmenti.

Redason di mensionadu jornal elabora es lista li di pesoas ki, di ses pontu di vista, ten xansi di ser konsideradu omi kabuverdianu di anu 2009 (a sigir, N ta indika nomi di kada nomeadu, sigidu di respetivu numeru di votus i korespondenti persentajen): profesor di nos lingua i defensor di se ofisializason, Agnelo A. Montrond, 337, 38%; jornalista i fundador di Rádio Atlântico na Olanda, Noberto Silva, 280, 32%; Carlos Tavares (ki da artista Norberto Tavares un rin), 122, 14%; skritor Arménio Vieira, 78, 9%; prezidenti di Universidadi di Bridgewater, Dana Mohler-Faria, 38, 4%; fundador di skola di futbol – EPIF –, José Lobo (Djédji), 12, 1%; i kantor Gilyto, 9, 1%. Es sondajen, purtantu, tevi 876 votantis.

Mas, Agnelo A. Montrond e kenha? Agnelo A. Montrond ganha fama esensialmenti trokadu se luta na Komunikason Sosial eletroniku pa defende ofisializason di lingua kabuverdianu i pa defende alfabetu kabuverdianu (ex-ALUPEC).

N ta parabeniza sinhor Carlos Tavares pa se aktu nobri i eroiku di doa Norberto Tavares un rin – el ta vive pa tudu tenpu na korason di maioria di menbrus di Nason Kabuverdianu!

N ta parabeniza jornalista Noberto Silva pabia (independentimenti di marjen di eru di un sondajen i di eventuais posibilidadi di manipulason) N ta akredita ma es votason ta refleti ses asons en prol di aumentu di felisidadi di Kabuverdianus!

N sta rei di sabi ku rezultadu di es votason – el ta mostra ma Kabuverdianu gosta di se lingua! E ki lingua e se kunpanheru fiel (ti na mumentu ki el ta sunha) desdi kantu el toma konsiensia di se ezistensia ti fin di se vida.

Kel li e mas un indisiu ma, provavelmenti, MpD fadja kantu el nega, na mes di Novenbru pasadu, pa ofisializadu gosi li nos lingua ku argumentu ma inda poku algen ki sabe skrebe sugundu alfabetu ofisial.

Di kualker manera, un forma di aumenta persentajen di Kabuverdianus ki sabe skrebe ku alfabetu ofisial, e uza-l na Komunikason Sosial. I, nes aria, Agnelo A. Montrond e, sen duvida, un lider. Fora kel la, dja ten txeu anu ki el e profesor di nos lingua.

Nº 2 di Artigu 9º di Konstituison ta ordena Stadu pa kria kondisons pa ofisializa nos lingua. Purtantu, dja sta desididu dja ma debe ofisializadu nos lingua.

Nos luta ta kontinua – dezignadamenti na kontribui pa kria midjoris kondison pa plenu ofisializason di nos lingua. Pa vive lingua kabuverdianu! Pa vive Dr. Agnelo A. Montrond!

Marsianu nha Ida padri Nikulau Ferera