Dedikatória: N ta dedikâ es puema pa tudu família di Alda Fonseca Fontes, más konxedu pa Tia Nhanha, ki falisê di morti natural, ku 100 anu di idadi, na dia 16 di es mês di Janeru, na Cape Cod, Stadus Unidu.
Tia Nhanha e un alegria ki ben pa es mundu
Nos prinséza di dia, di noti, di mar, di térra, y di tudu
Dja-l kunpri se distinu y dja-l bai pa séu sinzéntu ki bira azuladu
Y dje-l dixâ Koba Figera, Mérka y mundu interu tristi margudjadu nun lutu profundu
//
Se morti e partida pa iternidadi djuntu ku Déus nos salvador
Bronzi, pédra, madera, mar azul, térra e só pa pekador
Tia Nhanha e flor ki abri pa flori pórta di séu sen dór
Pa resebê-l ael ki vensê tenpu di oru na arka di se splendor
//
Tia Nhanha e tudu ki e bon, onéstu, justu, y puru
Na sepultura ki ta garda-nu es joia di oru
Ki ta konjugâ vérbu itérnu na tudu tenpu ki birâ di txoru
Tia Nhanha senpri konduzi distinu di natureza ku bondadi
Se alma bibu oji auzentâ di se korpu na óra y ku pontualidadi
Pa el bá ser filis na paraizu djuntu ku Kristu pa iternidadi
Agnelo A. Montrond
Frases ditas pela Tia Nhanha:
Á Bidjiça
Bidjiça di Merca
Bu câ tâ bem
Ami n câ tâ bai
Nû câ tem saída
Nû câ tem undi di bai
Corpu n câ teni más
Modi kim tâ bai?
Ma Deus tâ djudano
Ma Deus tâ danu corági
É pâ nû guentâ
Ês poco qui ficano
Deus tâ bá ku nhôs
Deus tâ fica ku nôs
Té ki nû odjâ dispôz
Si Deus quizer
Por César Lubrano
No comments:
Post a Comment