Kel Galu é un poka-brigónha!

Agnelo A. Montrond

Ten un galu ki ka é própi galu.
Se piskós txukidu é peladu sima pelada-xô di ká Txalu.
Se pérna paduku é kurtu sima kel di kel flanu.
El ta kanta rei di fédi sima kel kankan fédi di Djingilanu.

//

Kel galu é más invejozu ki kel galinha anâ, furfuia, y pedrada.
Kel galu ka ta feta ninhun franginha, nen kel di Dada.
Kel galu é un brigónha.
Se vos é roku y se péna é bénéni más ki própi pisónha.

//

Kel galu ka ten krista pamodi e mofinu.
Komu el é malisuadu, se spóra sai-l fóra di lugar di midinpinu.
Se txoru é sima falsu inu.
E ka ten papu, má el ten denti, y el ta kume só na kotxu-l Ninu.

//

Kel galu ten tudu érru y tudu difétu ki ten na mundu:
el é ségu, má el ta finji ma el ta odja;
manku, má é ka ta mankixa djuntu ku algen;
runhu, armadu en dretu;
raganhadu, má ta da pa kalmu;
stangudu, má ta da ma el ka ta liga nada;
mudu só di un banda-l bóka;
surdu, só pa un ladu;
malkriadu pa tudu ladu, dibaxu amá di riba;
fraku sima katxor di pekadu, má ta da ma el é di koraji;
ta koba só fédi, y ta da pa idukadu djuntu ku algen;
brutu, ta da pa mansu;
fazedor di kontu, ta da pa sériu;
kabésa ka prontu, armadu en puéta di me-dia pa tardi;
invejozu, ta da pa rilijiozu;
temozu, ki nen karneru;
burru, sén rabitxi nén albarda;
malandru, ta da pa fidalgu;
papiador, ta da pa rezervadu y …

//

Kel galu é ka própi galu.
E ka ta kanta na óra;
El ta ngana algen di madrugada;
El é galu brajeru;
Diretor di kapera;
Ku postu di pintonzinhu ta ba rubera na ladera;
Pa ba djunta ku se kuléginhas: furminginhas, largatixinhas, bagabaginhas y purginhas.
Se fé y se speransa é un dia tra un kursinhu na ruberinha pa-l pode bira un galon,
Ku katxu kunpridu y pérna más muskulozu pa-l ba rabida kotxu di se amiginhu na txikeru.

//

Kel galu ka bale pa kria,
Ki fare pa faze kaldu.
Anton kuzé nu ta faze ku el?
Kaldu, nau.
Feta ó gala galinha, tanbe nau.
Korda algen di madrugada y na óra, nén pensar.
Úniku kuza ki kel galu mofinu sabe ben é pega pedi pa-l ka kókó se pé, óras ki el ta kanta, pa-l fla:
“Dja-m kókó pééééééééééééé…; dja-m kókó pééééééééééééé… ”
Anton tudu kenha ki tene pedi ta da-l y el ta pega riju y di grasa.
É ka meste pagadu.
Só kel postu y kel títulu dja txiga-l.
Dja-l branku dja! Ken ki ka krê dexa.