Konparason Entri Kriolu Akadémiku Y Kriolu Susial

Agnelo A. Montrond

Nu sabi ma purtuges ten algun influénsia na kriolu, sima ingles ó franses pode ten tanbe. Sénpri ki un algen prende un novu lingua, es lingua ta influênsia se lingua nativa. Óras ki N ta papia kriolu, nha kriolu pode ten influênsia di franses, ingles, ó purtuges. Purtantu, N ta spera ma nhos ta ntende razon pamodi N ta uza alguns térmus derivadu di purtuges na nha textu. É ka pa bazofaria nãu. Txeu bes kes térmus ta ben sén N krê. É ki skéma mental di un kabuverdianu ki studa na un otu lingua ta sta na kel lingua. El ten ki transfiri di kel lingua la pa kriolu. É keli ki podi ixplika influênsia ki txeu kabuverdianus ten na ses kriolu, ki algen txiga di batiza di krioles, ki é kriolu ku txeu influênsia di purtuges. Y li na Mérka nu ten «Creo-English» ki é kriolu ku influênsia di ingles. Txeu algen na Mérka ta fla: N ta txoma-u di patrás en ves di fla N ta txoma-u dipos; draiva karru en ves di gia karru; N ba stoa onti en ves di N ba lója onti; manhan N ten pointiéntu ku nha dotor en ves di fla manhan N ten konsulta ku nha dotor; bu ten ki leba kabésa txéka di bu pai en ves di bu ten ki leba papel ki ta mostra kantu dinheru bu pai ta ganha, ets. Stranjerismu di un fórma jeral, ta kontisi na kuazi tudu lingua. Y Kriolu é ka exsepson a es régra.

Kriolu ten alguns vokábulus ki ta deriva diretamenti di purtuges y ki txeu kabuverdianus ku fraku skolaridadi pode ten algun difikuldadi na ntende sima: konstranjiméntus, monótonu, abranjênsia, telespetadoris, kativu, ixtremamenti, ets. Alguns pesoas ta atxa ma kela devia ser ivitadu y ma Kriolu debe skrebedu só na se fórma orijinal. Até sértu pontu N ta konkorda má nén sénpri é pusível. A sigir N ta aponta alguns razon:

Kriolu é un lingua sima kualker un otu, sima nos tudu nu sabe. Tanbe, nu sabe ma na ingles, ten várius nível di kumunikason formal y informal. Vokabulárius y «register level» ta dipendi di kontextu y tanbe di interlokutoris. Nos tudu nu sabe ma ingles ki ta uzadu na un kontextu akadémiku é konpletamenti diferenti di ingles ki ta uzadu pa pesoas sosializa ku kunpanheru. Pur izénplu ingles ki N pode uza pa N da un aula di matimátika pa ixplika kálkulu integral ó kálkulu diferensial é konpletamenti diferenti di ingles ki N ta uza pa kumunika ku amigus na un jantar na un restoranti. Mesmu kuza ta kontisi na kriolu: kriolu ki dôs adivogadu ta uza pa papia sobri direitu internasional konparadu é diferenti di kriolu ki dôs piskador ta utiliza pa papia di péska. N ta rifiri a un advogadu di mesmu manera ki N ta rifiri a un piskador. Ses ixtatutu susial ka sta en kauza. Ki N sa ta konpara é ses nível di kriolu.
Sosiedadi kabuverdianu ten klasis. Y klasis é fetu ku bazi na txeu kritérius. Nu podi perfeitamenti papia di klasi intelektual y klasi di trabadjadoris di «FAIMO» (frenti di alta intensidadi di mon di óbra). Interason entri menbrus di kes dôs klasis la na kriolu, ta fazedu na dôs tipu di kriolu linguistikamenti diferenti, sima ki N flaba antis. Dôs matimátikus podi papia sobri rizoluson di prublémas di eleméntus finitu ku konstranjiméntu lokal ó global. Nes kazu nu ten ki uza palavra konstranjiméntu, y e ka podi sér substituidu pa palavra difikuldadi pamodi signifikadu é ka kelmé. Repara, N ta rikonhesi ma es palavra só ta introduzidu na un anbienti akadémiku y txeu algen podi ka sabi se signifikadu. Fala di kriolu orijinal podi ka faze sintidu na es kazu. Na nível universitáriu ta papiadu kriolu akadémiku y nãu kriolu orijinal. Es tipus di mitus li meste ser dismistifikadu. Y N ta sujiri pa nu dizafia nos kabésa, ti ki nu konvensi nos kabésa, ma kriolu komu lingua ki el e é, el ten ki ten níveis ki ta bai di nível baxu a nível elevadu, konformi kontextu for susial ó akadémiku. Só pa nu xinti gostu di un lamiré di kriolu akadémiku, y modi ki el ta ben sér, nu ta konvida leitoris ki ta ntende ingles pa traduzi ó interpreta es pikénu textu (ki é un extratu di ensiklópédia Wikipedia) li na kriolu, sén uza palavras ki ka ta faze parti di «Kriolu orijinal, ou seja Kriolu nativu»:

«In mathematics, a Sobolev space is a vector space of functions equipped with a norm that is a combination of Lp norms of the function itself as well as its derivatives up to a given order. The derivatives are understood in a suitable weak sense to make the space complete, thus a Banach space. Intuitively, a Sobolev space is a Banach space or Hilbert space of functions with sufficiently many derivatives for some application domain, such as partial differential equations, and equipped with a norm that measures both the size and smoothness of a function. Sobolev spaces are named after the Russian mathematician Sergei L. Sobolev. Their importance lies in the fact that solutions of partial differential equations are naturally in Sobolev spaces rather than in the classical spaces of continuous functions and with the derivatives understood in the classical sense. »
N pode perfeitamenti uza palavras sima konstranjiméntus, monótonu, abranjênsia, telespetadoris, kativu, ixtremamenti, ets pa skrebi un textu. Si N podi uzas na ingles ó na purtuges, N ka sa ta odja pamodi ki na kriolu N ten obrigatoriamenti ki skrebe na kriolu orijinal. Sima ten purtuges iruditu tanbe ten kriolu iruditu. Repara ma kriolu iruditu é ka un «Bad Portuguese» ó purtuges mal papiadu sima ki alguns ta fla. N ka ta rifiri a konpléksu nén di superioridadi nén di inferioridadi. N ta pensa ma rikéza di nos kriolu sta na se fleksibilidadi tantu a nível di variantis komu na vokabuláriu derivadu di purtuges y otus lingua. Nu debi enkara nos lingua ku abertura y altas ixpetativas. Ka nu limita nos lingua só a se verson orijinal. Aliás dimension di un lingua ta ivolui. E ka ta fika só na se stadu orijinal. Kriolu ki ta papiadu na parlaméntu é un próva klarividenti di es faktu.

Agnelo A. Montrond