Por Agnelo A. MontrondDedikatória: N ta dedika es textu pa louva nha ex-prufesóra di idukason fízika na Liséu Domingos Ramos, na Praia, na 1976, D. Adelcia Pires, Primera Dama di Kabu Verdi, ki inspira-m y mostra-m kaminhu di susésu, sobretudu kantu ki el skodjeba mi pa bai entrega um bouquet di flor a Dr. Agostinho Neto, na muméntu ki el ta dizenbarkaba di avion na aeroportu di Praia, ki na altura éra Prizidenti di Repúblika Popular di Angóla, y ki baba pa Kabu Verdi na un vizita ofísial. Kel jéstu foi tãu signifikativu pa mi, el kria-m un elevadu sintidu di auto-estima y di auto-kunfiansa, y é talves pur isu ki el fika markadu pa sénpri na nha mimória. Obrigadu, Sinhóra Prufesóra.
N atxa ma é oportunu konpartilha ku leitoris, es nha textu, ki foi aprizentadu onti, na jantar di Gala di Nos Prizidenti, Pedro Pires, na Lantana, Randolph, na Mérka, pa Maria João Vasconcelos y Any Chantre, ki ku taléntu, mestria y elokuensia, kativa atenson di kel plateia di gentis ki staba la, y ki sigi-s di pértu, ku atenson y nun krexsendu di interesi, pa obi kes palavras ki a sigir nu ta transkreve:
N ta xinti orgulhóza di ten es priviléjiu di konpartilha ku nhos tudu ki digna onra-nu li oji ku nhos amável prizénsa na es jantar di gala, alguns muméntus y faktus markantis na perkursu di Nos Prizidenti, nun linguájen sínplis sima se dimenson umana di un líder pulítiku ínpar y inegualável, y tanbe na lingua di Térra ki tantu el ten kontínuamenti lutadu y labutadu pa el, di un fórma inkansável y abnegadu. Y nu ta kumesa pa prinsípiu y nu ta konvida nhos pa nhos sigi-m pasu a pasu, luta a luta, konbati a konbati, y konkista a konkista.
Na dia 29 di Abril di 1934, un kuza grandi kontise na Djarfogu! Ka foi vulkon ki spludi, nén ka foi txon ki treme. Pelu kontráriu, foi nobidadi sabi ki treme Djarfogu interu, kantu ki pasadinha di péna azul traze Kabu Verdi kel arbisa sabi di un mininu patrióta ki ben mundu pa ben liberta nos povu di sufriméntu, y dizafronta nos gentis di tantu trabadju riju y tratu mofinu. Di nómi konplétu Pedro Verona Rodrigues Pires, kel mininu ki gatinha y ki kumesa ta odja injustisa ku odju di Djarfogu, se ninhu, ki dipôs ba ta kria y ta bira grandi, ki xinta na kartera di skóla, primeru na S. Filipe na Fogu, dipôs na Praia y na Sanvisenti, y finalmenti na Lisboa, Purtugal, sénpri ta sunha ku liberdadi y fraternidadi, y preokupadu ku kuzas ki el staba ta obi ku orédja di revólta y ta odja ku odju di determinason di un verdaderu líder vizionáriu, korajozamenti y ku un sentiméntu nasionalista y patriótiku mutu forti di un dever pa kunpri pa ku se povu, el larga skóla y el troka oportunidadi di susésu pesual ki el teneba pa frenti na se karrera universitáriu, y djuntu ku Amílcar Cabral, Aristides Pereira, y otus, el riska se bida na matu di Giné, sén médu-l morti, ku raiba-l d’abuzu, pa liberdadi di tudu nos ki oji orgulhozamenti ta fla ma nos é kabuverdianus livri, indipendenti y demokrátiku, má sobretudu pa ki tudu kabuverdianu pode ba skóla un dia. Desdi sénpri el akredita na viabilidadi di Kabu Verdi komu un país independenti, livri y soberanu, na un altura en ki dúvida éra sertéza pa kuazi tudu algen.
N ka krê alonga mutu txeu, N ta sér brevi y N ta pasa en revista alguns muméntus y faktus más relevantis na perkursu di Nos Prizidenti:
1934 – 1956: El nase, kria y vive na Kabu Verdi ti idadi di 22 anu. El tistimunha situason di fómi di 43 y 47 ki reforsa se patriotismu y segreda-l nesesidadi urjenti pa liberta Kabu Verdi di kel situason di duminason.Na 1956 el bai studa na Purtugal.
1961 – 1968: Klandestinamenti el bai atxa Amilcar Cabral y el integra PAIGC. El trabadja na Senegal y na Fransa ta mobiliza kabuverdianus partiotas pa gérra y el manti ligason sekrétu ku struturas di PAIGC na Kabu Verdi.
1968 – 1975: Pires foi komandanti di rijion militar di Giné Bisau. Na 1973 el foi skodjedu komu responsável di kumison nasional di PAIGC na Kabu Verdi. Na 1974, Pires regresa pa Kabu Verdi pa lidera PAIGC la. Es omi ten tantu koraji y vizon, ki kantu el binha di luta, na pasaji pa Sal, na 1974, el perguta se kabésa: « e es ki é Térra ki du luta pa el? Má nu ten ki kontinua es luta simé ...».
Sob se lideransa, PAIGC konsigi txeu avansu pa indipendensia di Kabu Verdi. Na Junhu di 1974 Pedro Pires foi eleitu menbru di parlamentu kabuverdianu . Na Dizénbru di 1974, na kualidadi di xéfi di delegason di PAIGC, Pires negosia y sina ku guvérnu portuges, transison pulítika, ki kaba pa dizenboka na indipendensia na 5 di Julhu di 1975. Na dia 6 di Julhu di 1975 el foi ileitu prumeru ministru di nason indipendenti ki éra Kabu Verdi.
1975 – 1990: Na fin di anus 80, mididas pa liberaliza ekonomia nasional y atrai investiméntu extérnu foi implementadu ku algun susésu pa guvérnu di Pedro Pires. Na 1981, Pires foi ileitu sekretáriu jeral adjuntu di PAICV. Duranti três mandatu konsekutivu, na un periudu di 15 anu, ki bai di 1975 a 1990, guvérnu lideradu pa Pedro Pires inplementa un pulitika stratéjiku, tátiku, proativu y pragmátiku pa konstrui un nason global y un stadu organizadu, efisienti y kredível, sénpri ku odju na un futuru kada bes midjor, apezar di ki pontu di partida foi situason di pobréza extrému, ku agravanti di falta di rekursus. País konsigi un melhoria substansial na saudi, idukason analfabetizason, kualidadi di vida y na diféza di meiu anbienti. Na planu internasional, guvérnu di Pedro Pires kria un Stadu útil, y dizenpenha un papel ixtremamenti inpurtanti na prusésu di negosiason ki dizenboka na indipendensia di Namíbia y na ivakuason di prezénsa di militaris kubanus y sul-afrukanus di Angola. Na Fevereru di 1990, komu un vizionáriu ki konsigi odja na óra H y xinti na muméntu sértu nesesidadi pa un mudansa radikal na sistema pulítiku kauverdianu, Pires lidera prusésu di introduson di sistéma di multipardidarismu na Kabu Verdi, y el da abertura pulitika, ki decorre na paz, tranquilidade e respetu pa jogo dimocratiku.
1990 – Prizenti: Na seténbru di 2000, el anunsia se kandidatura a kargu di Prizidenti di Repúblika di Kabu Verdi, y el kaba pa ser ileitu Nos terseru Prizidenti na dia 25 di Fevereru di 2001. El foi ri-eleitu Nos Prizidenti na últimus eleisões prizidensiais. Se ixsilenti dizenpenhu é un orgulhu pa Kabu Verdi y pa nason kabuverdianu na se globalidadi. Nos Prizidenti Pedro Pires resebi sigintis distinson: Na Marsu di 2007, el resebi diploma « Honoris Causa» na Universidadi Federal di Ceara na Brazil; Órden Amílcar Cabral di Kabu Verdi; Medalha Amílcar Cabral di Guinea-Bissau; Órden di Liãu di Senegal; Órden Infanti D. Henrique di Portugal.
Pa tudu ki el ten fetu y ki el ta kuntinua ta fazi en prol di dizenvolviméntu di Kabu verdi y di Nason Kabuverdianu N ta gostaba di pidi nhos tudu pa nhos labanta pa da un salva di palmas pa Nos Prizidenti, Pedro Pires, y pa se espoza, Primera Dama di Kabu Verdi, D. Adelcia Pires, y ses fidjas Sara y Indira Pires.
Obrigada.
3 comments:
Dios grasa nu ten otu kanal di komunikason! Trokadu un kumentariu ki ta kondena es artigu patriotiku, N manda pa Liberal Online kumentariu ki ta ben a sigir, desdi 15H40 (ora di Kabu Verdi = GMT+1) di onti 29/09/2008, mas ti inda (09H09 di Kabu Verdi di oji, 30/09/2008) es ka publika-l. Nha kumentariu era kel li:
E pa da palmas rixu! Ton rixu, kapas di mata kes moskitu - alienadus i ajentis di alienason - ki ten raiba di erois ki luta pa liberta nos povu di 500 anu di sklavajismu, fomi i alienason! So nu ta konsigi ten mas pesoas di ben na nos tera si nu labanta nomis di kes ki tevi koraji di sigi kaminhu di onra i eroisidadi, di entrega pa kauzas justu, di po ses vida en risku – prova kabal di amor pa nos tera Kabu Verdi i pa Kabuverdianus! Algen fla ma izenplu e ka midjor forma di influensia, mas sin uniku forma apropriadu di influensia. Npos, Komandanti di Brigada, Pedro Verona Rodrigues Pires, e un IZENPLU pa nos fidjus! Un ORGULHU pa tudu Kabuverdianu livri di 500 anu di alienason i di ajentis di alienason! Oji, na nos tera, ten un grupu ki sa ta tenta spadja ma nu ka ten erois, nu ka ten pesoas dretu, ma tudu e so bidjakus. E kasi! Nu labanta erois, dixi bidjakus, ama solidariedadi! So asi nu ta konstrui un sosiedadi suguru pa nos disendentis!
Nos Presidente Pedro Pires merece do bom, do melhor, e do super pela simples razão de que ele não ser o melhor politico cabo-verdiano em toda a extensão da palavra, mas sim porque ele é o único líder politico que estreiou e exemplificou como se faz uma oposição responsável observando todos os tramites do jogo democrático. Se hoje a democracia funciona em Cabo Verde, e somos um exemplo na nossa região, isso deve-se em grande parte a esse líder carismático, cujo humanismo e sentido de estado ultrapassam os limites do razoável. Isso deve ser dito, repitido, e ecoado em coro, tantas vezes quantas forem necessárias. Os cabo-verdianos de boa fé de certeza farão deles e delas essas lindas palavras do articulista Agnelo Montrond. Assim é que é oh Senhor Montrond: a Deus o que é de Deus e a César o que é de César.
Prezo informar aos estimados leitores que este meu comentário que a seguir transcrevo foi enviado para o LIBERAL desde ontem mas ainda continua aguardando a sua vez para ser publicado, se não for censurado gratuitamente:
Nos Presidente Pedro Pires merece do bom, do melhor, e do super pela simples razão de que ele não ser o melhor politico cabo-verdiano em toda a extensão da palavra, mas sim porque ele é o único líder politico que estreiou e exemplificou como se faz uma oposição responsável observando todos os tramites do jogo democrático. Se hoje a democracia funciona em Cabo Verde, e somos um exemplo na nossa região, isso deve-se em grande parte a esse líder carismático, cujo humanismo e sentido de estado ultrapassam os limites do razoável. Isso deve ser dito, repitido, e ecoado em coro, tantas vezes quantas forem necessárias. Os cabo-verdianos de boa fé de certeza farão deles e delas essas lindas palavras do articulista Agnelo Montrond. Assim é que é oh Senhor Montrond: a Deus o que é de Deus e a César o que é de César.
Post a Comment