Konsuladu Jeral di Kabuverdi na Boston sa ta organiza un Méza Rodóndu lideradu pa linguísta kabuverdianu Dr. Manuel Veiga, dia 3 di maiu, kinta-fera, sinku óra di tardi, na Massasoit Community College, na Brockton.
Tema prinsipal di es Méza Rodóndu é «Kriolístika na Kabuverdi – Un Prusésu, Un Dizafiu».
Na se intervenson Dr. Veiga ta faze un brévi abordájen di sigintis tópikus:
1. formason di kriolu kabuverdianu
2. negason di si statutu linguístiku
3. rezisténsia di patriótas más konsienti
4. afirmason di kriolu kabuverdianu dipôs di Indipendénsia y se projeson pa futuru.
Tanbe es Méza Rodóndu ta inklui perspetivas di kumunidadi na Mérka apresentadu pa skritoris y profesoris.
Es ivéntu é abértu pa tudu públiku interesadu. Pisoas interesadu debe konfirma ses partisipason ku rejistu na website http://www.eventbrite.com/org/428017294 ó ku un xamada pa Konsuladu através di númeru di tilifóni 617-353-0014.
Prufesor Veiga ta sta na Boston prinsipalmenti pa ben partisipa na un konferênsia organizadu pa konsuladu di Portugal, konsuladu di Kabuverdi y konsuladu di Brazil, na kuadru di festival di Portugal di 2012, ki ta dekore na Universidadi di Massachusetts, Boston, intituladu: «Literatures in Portuguese Language: Reconstruction of Identity in Migration Contexts». http://www.bostonportuguesefestival.org/index.php
Manuel Veiga é dotor en linguístika (vertenti kriolístika), na Universidadi Fransês di Aix-Marseille, ku un tézi di análizi diskritivu y kontrastivu sobri Kriolu di Kabuverdi.
El foi Diretor-Jeral di Kultura, Diretor–Jeral di Patrimóniu Kultural, Prizidenti di Institutu Nasional di Kultura, Rasponsável di Dipartaméntu di Liguístika, duranti un róda di anu, y Prizidenti di Grupu di Padronizason di Língua Kabuverdianu, strutura proponenti di ALUPEC.
Manuel Veiga foi Diputadu na Asenbleia Nasional di Kabuverdia, na sestu y sétimu lejislatura; Prizidenti di Kumison Spesializadu di Edukason, Siénsia y Kultura, na Parlaméntu Kabuverdianu; Menbru di Bureau di Parlaméntu di CEDEAO (2003-2004); Visi-Prizidenti di Kumité Internasional di Studus di Kriolu (1996-2005); menbru-fundador di Asosiason di Skritoris kabuverdianu.
El publika un data di ensaius y di artigus, na ária di linguístika y di kultura, na revistas nasional y stranjeru. Pa alén di Diskrison Strutural di Língua Kabuverdianu (1982), di romansi Odju d’Agu (1987), na kriolu, el publika romansi Diário das Ilhas (1997); A Sementeira (1994); Introdução à Gramática do Crioulo (1995, 1996); Le Créole du Cap-Vert, tézi di dotoramentu (2000); O Caboverdiano em 45 Lições (2002); A Construção do Bilinguismo ( 2004); Dicionário Caboverdiano-Português (2011); el é kordenador di un trabadju koletivu, Cabo Verde – Insularidade e Literatura ( 1998).
Manuel Veiga foi Ministru di Kultura (2004-2010). Na es muméntu, el é Profesor Asosiadu di Universidadi di Kabuverdi y Koordenador di Mestradu di Kriolístika y Língua Kabuverdianu. El ta inxina disiplina di Língua Kabuverdianu y disiplina di Traduson y Téknikas di Spreson na Kriolu.
El é Sidadãu Onoráriu di Sidadi di Rubera Grandi d Santiagu, pa kontibutu ki el da na rakonhisiméntu di Sidadi Vélha komu Patrimóniu di Umanidadi. El foi distingidu pa Kanal di Tilivizon TIVER, na 2009, komu un di kes figura di susésu, na Kabuverdi, na planu kultural.
El rasebe, três bês foradu, Prémiu «Lingua Kabuverdianu», di Asosiason di Skritoris Kabuverdianu. El konkista purmeru lugar na konkursu internasional di Fundu Bibliográfiku di Língua Purtugês, ku óbra «A Construção do Bulinguismo».
El foi kondekoradu ku Medalha di Méritu y ku Medalha di Vulkon, ruspetivamenti pa Prizidenti António Mascarenhas Monteiro e pa Prizidenti Pedro Verona Rodrigues Pires.
Manuel Veiga é kazadu y pai di dôs fidju.
No comments:
Post a Comment