Pamodi Kabuverdianus Debe Vota Na Barack Obama?

Pa Agnelo A. Montrond

Obama y Biden é dôs líders vizionáriu inegualável na spétru pulítiku merkanu atual. Ku es dinámika di vitória ki dja es tene, ka ten tadju pa es ka sér nos prizidenti y visi-prizidenti na prósimu dia kuatu di Nuvénbru. Midjor ki ningen, es ta ben protagoniza kel mudansa puzitivu ki Mérka y Mundu Interu sa ta reklama. Kabuverdianus debe vota na Obama nãu pa se kór ó pa se rasa ó pamodi el ta parsi ku nos, má sobritudu pamodi el é úniku kandidatu ki tene un planu ki mé-divéra ta da garantia di midjor difendi interesis di kabuverdianus, y nãu só, na Kaza Branka. Sima ki nos prizidenti Pedro Pires rifri y ben na se diskursu na kel jantar di gala a se onra li na Mérka, y publikamenti nu ta faze ses palavras di-nos, y já agóra nu ta pruveta pa akresenta más pa fla ma es novu y nesesáriu Mérka ki nu meste, só nu ta konsigi-l ku nos votu di kunfiansa na kandidatu sértu, ki é rostu di dimokrasia y di un mudansa verdaderu, y speransa na un futuru midjor na planéta interu.

Pamodi kabuverdianus debe vota tudu na Barack Obama? Es é pergunta ki nu ta koloka pa tudu kabuverdianus, y nu ta ben aponta di sigida, alguns razons di pézu pamodi kabuverdianus y nãu só, debi vota na senador Barack Obama pa Prizidenti ki Mérka meste urjenti:


1) Inpostu - Obama prometi ma tudu kenha ki ta ganha ménus di 250 mil dóla pa anu ta fika ta paga inpostu más poku, y keli é un insentivu finanseru ki ta ben kontenpla maioria di kabuverdianus, y nãu só, na Mérka.

2) Idukason - NCLB (No Child Left Behind - Ka Dexa Ninhun Mininu Fika Pa Trás ) – objetivu di es lei é ixsilenti, má é ka pasa di un promésa ki foi finanseiramenti insustentadu y ki kaba pa sér un falhansu, y ka foi inplementadu di fórma adekuadu pa Dipartaméntu di Idukason. Purtantu, el ka surti ifeitu almejadu. Pur tudu isu y más otus kuzas, kel lei fadja ridondamenti y el ka konsigi dispunibiliza profesoris altamenti kualifikadus pa kada turma, pamodi ka foi disponibilizadu vérbas pa paga y apoia kes profesoris. Obama y Biden prometi ma es ta ben finânsia y reforma kel lei NCLB (No Child Left Behind).

3) Sistema idukativu - Tanbe, es ta atxa ma profesoris ka debe ser forsadu a uza un anu akadémiku interu ta prepara studantis pa testis. Obama fla ma el ta ben midjora métodus di avaliason uzadu pa dokumenta prugrésu akadémiku di studantis y tanbe pa disidi si es sta prontu pa kontinua studus na universidadi ó pa kumesa ta trabadja. Obama ta apusta fortimenti na un aprendizájen individualizadu y midjora responsabilidadi na sistema idukativu, numeadamenti através di apoiu a skólas ki prisiza di midjora ses trabadju, en ves di puni-s y ás vezis até manda fitxa-s.

4) Programa bilingi - Obama y Biden ta apoia tudu pesoas ki sa ta prende ingles: Es ta apoia programa bilingi, y es ta djuda studantis ki inda ka sta fluenti na ingles, ó seja ki inda ten profisiensia limitadu na ingles, pa avansa na ses studu, y es ta ben iziji responsabilidadi a skólas, na sentidu di garanti ma kes studantis ta finda skóla ku susésu. Enfin ses pulítika pa ária di idukason ta ben putênsia nos mininus desdi ki es entra na jardin infantil ti ki es konpleta désimu sugundu anu y tanbe studantis universitáriu. Tanbe es ta apusta fortimenti na enpoderaméntu di nos país ó enkarregadus di idukason, nos skólas, y es ta ben rekruta, prepara, manti (nu ta fla di pasaji ma serka di trinta purséntu di profesoris novus ta abandona karrera di ensinu logu na kes sinku anus na trabadju) y insentiva nos prufesoris, adapta y modifika alguns leis, sinplifika prosésu pa finansiaméntu di studus (nhos fika ta sabe ma entri 2001 y 2010, 2 milhon di studantis ku kapasidadi akadémiku ka konsigi y ka ta podi studa na universidadi pamodi studu é mutu karu y es ka ta podi paga-l. Maioria di studantis ta termina kursu ku lisensiatura ku un dívida ki es ten ki ben paga kuandu es kumesa trabadja), ets.

5) Imigrason: Midjora sistéma di Imigrason - Obama y Biden ta akredita ma debi kabadu ku burokrasia y disfunson na servisus di imigrason y aumenta númeru di imigrantis legal pa manti famílias unidu tudu di djuntu y da respósta a prokura di enprégu ki entidadis enpregadoras ka ten podidu absorvi ultimamenti.

6) Imigrason - Ilimina atrativus pa entradu Mérka ilegalmenti – Pa ki isu podi kontisi, Obama y Biden ta ben da riba di kis entidadis enpragadoras ki ta enprega pesoas ki ka ten dokumentu, ta explora-s y po-s ta trabadja en kondisons poku umanas.




7) Imigrason- diportason: Tra Pesoas di Sonbra - Obama y Biden ta apoia un sistéma ki ta permiti imigrantis ki inda ka tene dokuméntu y ki ten un bon postura pa paga un multa, prende inglês, y asin da-s oportunidadi di sér sidadon merkanu y ivita ki es ben sér diportadu na futuru.

8) Direitu sivil – Minimiza ti ki kaba ku disparidadis di direitus sivil ki inda sta ta vigora na Sistema di Justisa Kriminal: Afro-amerikanus y ispanikus (kabuverdianus inda pior), konparadu ku brankus, es ten dobru di xansi pa ser revistadu, prézu, as vezis ku uzu di forsa pa ajentis di pulísia.

9) Saudi - Pruposta di Planu di Saudi di Barack Obama y Joe Biden - En relason a reforma na ária di saudi, povu merkanu ten konsigidu dôs iskolhas kada un na un extremu: un ki é dirijidu pa guvérnu ku inpostus elevadu y un otu oferesidu pa konpainhas di seguru ki ta funsiona sén régras. Barack Obama y Joe Biden ta atxa ma kes dôs extremus sta tudu erradu, y pur isi es faze prupósta di un planu ki ta fortalesi kubertura di entidadi enpregador, y ki ta atribui responsabilidadis a konpainhas di seguru y ki ta garanti ma pasientis ta disidi ku ses dotor kuidadus di saudi ki es ta prisiza, en ves di sta blokiadu pa burokratas ki ta trabadja na konpainhas di seguru. Ku planu di Obama-Biden, si un pesoa gosta di seguru di saudi ki el tene gósi, nada ka ta ben muda, só présu ki ta nbaxa di un valor másimu di dôs mil y kinhentus dóla pur anu. Pa pesoas ki ka tene ninhun tipu di siguru di saudi, es ta ben ten oportunidadi di skodji un siguru novu ki es ta pode paga.

10) Rasismu y diskriminason - Diminui manenti ti kaba ku rasismu baziadu na kritérius subjetivus - Obama y Biden ta ben konbati pa kaba ku rasismu baziadu na kritérius subjetivus poku klaru pa pesoas ki ta trabadja na izekuson y inplementason di lei federal, y es ta ben kria insentivus pa departaméntu di pulísias tantu a nível di stadu komu a nível lokal pa pruibi es prátika.

Pa es y pa otus razons ki nu konxe sobejamenti, nu ta apela tudu kabuverdianus ki é sidadon merkanu, pa nu vota en masa, na dia kuatu di Nuvénbru, y nu mostra nos pézu pulítiku ki nu ten y faze diferénsa. Nu vota di fórma informadu, nu vota en konsiensia, nu vota ku intelijensia, nu vota na konpitensia y na kandidatu prizidensial ki midjor ta ben difendi nos interesi. Nu vota y nu partisipa na es mudansa stóriku na Mérka. Nu vota dimokrata y pa dimokrasia. Nu lenbra ma sima nu sta nu ka pode fika y sima nu kre nu ka pode sta. Anton nu vota en pézu pa OBAMA y BIDEN.

Agnelo A. Montrond
Cape Verdeans United For OBAMA