Kaju di Grasa

Pur Kaka

Un mudje txiga na porta di Café Magma , el pripara p’el fra argun kuza,ma el kala pasmadu. El fika tarantadu suma burru ora ki kontra ku katxo na kanal. El staba k’un baldi riba kabesa y otu na se mon skerdu. Na se vorta el tinha moska mas di ki kosta di burru’l karretu. Dipos di rakupera di se aparenti sustu, ma inda ku rostu xinxabidu, el pargunta: “ken ki kre kunpra kaju?”. Ningen ka rasponde-l. Tudu argen staba fartu di kaju. Kaju daba dimaaaas...

La na fundu, na kel ladu que ta da pa kuzinha, staba Fausto Rosário akunpanhadu di un stranhu, ta konbersa animadu. Gentis ki staba na mesmu spasu, di bes enkuantu staba ta bota rabu-d’odju pa kel mensa pa odja si ta entende argun kusa di kel konbersu. Kel omi, sintadu frenti a frenti ku Fausto era un djimarra d’omi, mutu mas grandi ki Arculano. Se kabesa rapadu staba ta parse un globu. Omi era tamanhon propi.

Fausto teneba katubelu di mon direita riba mensa y dedon ta nguenta kabesa, na meiu di se dedus el teneba un sigarru ta baza fumu suma karru Bimba na subida Brandon.

Mudje torna pargunta, ma ningen ka liga-l.

Fausto bota mudje un rabu d’odju, y au mesmu tenpu, el puxa mas un fumu k-el sopra pa artura ku mestria, suma Zé di Balé xina-l. El troka sigaru pa mon skerdu y, ku mon direita el pega na kel xikrinha el tra un gorpi di kafe antis di opina sobri asuntu k-el staba ta papia na el ku kel stranhu. Era sugundu “bica” ki dj’el staba na el.

Kantu mudje bendedera-l kaju odja Fausto ku kel xikrinha na mon, el, ku se rostu inda frunhidu di spantu rasmunga :“kela e kafe ki un omi ta bibe? Inda pur sima sen ajunta...! Es ta sta na miséria ku fomi na bila, ora k’es ba fora es ta ba armadu en bon. N ta spera-l na tenpu kanpanha...Pur isu es ka ta kunpra kaju...”

Na kel mumentu nho Lobu baba Lem ku minizadas trás di txitxarru fritadu. Mudje staba la inda ta spia Fausto kran kantu un argen fra sin: “A la nho Lobu ta ben na porta ka nha Sandjon”. Obi ki mudje obi ma la nho Lobu ta ben, el po pé na kamin fadigadu. Ken ki al tene se kuza kume bera nho Lobu? Na presa ki mudje teneba, el diskise di un baldi kaju, inda pur sima el karsa kókó di katxo di Calu di nho Mario, ma nen el ka tuma tenpu pa linpa-l. El ba fadigadu, ta ba ta raspinga-l ku kel xinelu xupakaka bedju kel teneba na pé, ta ba sen spia pa trás, ta ba ta kramuxa ku kel ronku moska ki staba se vorta pamodi "argen na Bila ta tuma un dedon di kafé inda pur sima sen ajunta, pur isu és ê prigisos.... és ka ta pode trabadja nen sés kre..."
Kantu mudje da pa falta di baldi kaju, Nho lobu dja staba sinhor di situasau.