Irmon Kabuverdianus, Nu Uza Y Divulga Alfabétu Kabuverdianu Ofísial(AK, ex-ALUPEC)

Sunday, October 12, 2008

Diportason é ka suluson


Pa Agnelo A. Montrond

Ka nhos manda-m, N ka kre ba ratxa pédra ku madju na Rubera Partidja
Nhos faze-m justisa y nhos djuda-m li-mé, N ka kre ba Katramusa panha padja
Pinto justiseru di Koba Figera sta li - el fra nén tabaku ki fare mortadja
Nhos dexa-m sunha nha sonhu merkanu na Mérka, nén si é di dia na ka Mabédja
Ka nhos ba larga-m la sén rumu sén direson ta puli kalsada ku albérka-l Djédja
Pamodi, nha genti? Pamodi?


//

Mi é sidadon di mundu, anton nhos manda-m pa ixpasu
Nos tudu nu ben. Si otu sta banbudu, es ka kre obi es é ka kulpadu si es ka panha konpasu
Mi é vítima di sistéma pamodi mi é ka éra sin ki N ta daba pasu
Ka nhos dexa-s manda-m aljemadu sen kel brinku lasu
Nho padri, gentis di asosiason, pastor, N txoma-nhos, nhos nega kudi-m y es ganha-m kazu
Pamodi, nha genti? Pamodi?

//

N ka ben ku dia, nén ku óra
Nén N ka ben ku ideia di bai sén N kre bai enbóra
Nhos papia-m ku Obama, dja txiga óra
Dja-m manda rekadu pa Kaza Branka
Es manda fla-m ma Imigrason ki tene txabi ku alavanka
Fladu ma es é ka txakóta
Kreiu é simé …
Pamodi, nha genti? Pamodi?
Parse-m ma inda es ka ntende ma diportason é ka suluson …

Agnelo A. Montrond

1 comment:

Anonymous said...

RIMA DI MUNDU GLOBAL


Nh’armun foi julgadu
Se trabadju diskonsideradu
Atxadu komu kulpadu
Foi kondenadu y diportadu

Se grandi mal
Foi kunfiansa total
Na kolunas di jornal
Ki xeiu di mural
Papia-l di aldea global

Ilegal
Na aldeia global
Ilegal
Rima mal ku aldea global

Kale ke juis des tribunal
Ki atxa komu anormal
Livri sirculasau di pesoal
Nes papiadu aldea global

Ar, terra y agu ke nos planeta
Frontera e kor di tinta kaneta
Ki nun papel dixa idea
Di kes mas forti di nos aldea

sirculasau di produtu e pesoal
Skrebedu ku kor diferenti
So ta sirkula livrimenti
Kel ki ta da-s ganhu total


Kaka