Kriolu dja da sapatéta ta bai … El ka ten tadju, nau!

Dr. Manuel Veiga (skerda) y CecIlio Cabral (direita)

Pa Agnelo A. Montrond

Dedikatória: Pa louva nha amigu y pulítiku karismátiku Cecilio Cabral, fidjadu-l Nos Prizidenti Pedro Pires y subrinhu karnal di Amílcar Cabral


Pa mata un formiga nu ka meste uza kanhon, nen bonba di neutron …
Pa kenha ki ta ntende meia palavra é basta
Es é razon di sér di es nha puema rasteru, renti txon
//

É mi própi ki é Kriolu nasidu y kriadu na Kabu Verdi
N ten sinku séklu
Má N ka batizadu nen rajistadu tê inda
N sa ta bai ku nha pé
Pa-m bai batiza y rejista nha kabésa
Óra dja txiga …

//
N ta ratxa na tenpestadi di béntu Sul ki é nha trabiseru
Y N ta da sapatéta ta bai sén tadju
//

Rabulisu ki é nha silénsiu ka ta disvia-m atenson
Ki fare txoru di mininu moru
//

Txeia ka ta tadja-m na rubera
Kontra más trubada
Ki ta nina-m
Óras ki el ta ratadja na séu
//

Ralanpu ki é nha sónbra ka ta pega-m
Mi é más rápidu ki lus na sukuru di se klaréza
//

N ka ten médu-l morti
Ki fari di finadu
//

Ka bu djobe-m lutu
Ka bu mexe ku mi
Dexa-m susegadu mos
N ka ta aviza-bu más ma ken aviza amigu é
//

Ka bu ben tenta linpa bu mon xuxu di tirna na mi
Bu pensa ma é ku kudje paduku ó ku kamunga ki ta skrebedu puezia?
Ná susega. Ba da porku djanta, ta fika-bu midjor.
//


Dédu miminhu
Simonsinhu
Pai-di-tudu
Furabolu
Mata-piodju
//

Mamá N ten fómi
Du ba furta
Es ta pega-nu
Du ta korre
Xa-m ratira londji di nhos
//

Dexa di pirsigi-m
Para di djobe-m lutu
N ta marafusta na bo
N ta bafabu ki nen pizadéla
N ta morde-bu ki nén furmingóna préta
N ka ta larga-bu tementi burru prétu ka ruza
Tementi kabra motxa ka nberra três bes
//

Si N pega mundu roladu ku el
Na es jogu di kabra-séga
N ta rabenta-s pan
N ta bira tudu kuza na un pontu brumedju
Sén dimenson
//

N ta xinta-s baxu-l zéru
Pariba-l di infinitu
//

Es k’é Ioti Pingu d’oru
N ta resita-s vérsu ku rima y melodia di soku-l Puéta
Ken ki leba-l
Ta pensa ma é karru ki dja da na el
//

N patia na Rubera Trás di midinpinu
N odja kuza na Djédji-Léla
Má tê inda N ka fla ningen el
N tene-l gardadu pa prizenti …


//

É mi própi ki ta po-l bate ropa na rubera
Fitifiti-l na internet
Xagua-l na lua
Y seka-l na stréla
//

El ta liza-l gó na un kabu pértu
Dipos di infinitu …
//

Xa-m bai anti sukuru fitxa
N krê pasa Déus ki sta di lutu na se kaminhu
//

N ta nbrabise mar
Y N ta kakula ondias tê ki ba sérra
Ki ningen ka ta pode midi-l
N ta bira tudu kabu sukuru sima breu ta konpiti ku klaréza
Dirrumunhu gó ta ba kontra ku txuba na nogera
//

Motor di nha aviãu é itérnu
El ka ta para
Nen el ka ta kansa
//

Rafodju é fémia!
Txoma-m nha nómi
Si bo é omi
N ta kudi-bu ku un vérsu skerderu na fonti
//

Nhos dexa di arénga
Xa-m bai, N tene présa …
N ta volta já.
Ó diému, pega riju na pinsel
N sa tra-bu skada …

Agnelo A. Montrond