Irmon Kabuverdianus, Nu Uza Y Divulga Alfabétu Kabuverdianu Ofísial(AK, ex-ALUPEC)

Sunday, February 15, 2009

Anedóta: dos amigu y dos ségu


Dos amigu

Staba dos amigu ta anda un kaminhu londji p’afrónta. Staba uma lumi sol ta ratxa-s na kakuruta, ma ramédi ka tinha: es tenba ki bafatia pé ti ki es txiga undi ki es staba ta bai.

Pa anima kunpanheru es ba ta tra kunpanheru na konbérsu. Es papia na bida di tudu algen di ses zóna: kenha ki e dretu, ménus dretu, ka bali, skoberus, lanbedoris, dizoredjadus, onéstus, bedjakus, konpitentis, roskon, txipi, idukadus, sarbaxis, trabadjador, prigisozu, ets.

Kantu konbérsu kurrikeru arma kaba, es kumesa ta poi imajinason ta funsiona. Un fla kel otu: “mi, si N bira prizidenti di Mérka, N ta kaba ku fómi y ku gérra na Mundu”; Kel otu responde y el fla-l: “ Ná, mi si N atxa sén kontu gósi li, N ta da-bu mil iskudu”; respósta foi: “Mintira ki bu konta. E metadi-metadi: sinkuénta kontu pa bo y sinkuénta kontu pa mi. Trumodi nu sa ta anda di djuntu; Kel otu reaji y fla-l: “Modi ki bu ten sinkuénta kontu si e mi ki atxa-l. Bu ka debe tene kabesa prontu. Másimu ki N pode da-bu e dés kontu”; kel otu da-l respósta y fla-l: “Bu sa ta da pa abuzadu má mi gó dja bu kontra ku di bo. Si bu insisti ku dinheru ki e ka di bo y bu ka merese, N ta kume-u un nobidu gósi li, N ta mostra-u kantu N bali”; Kel otu ka spéra pa más nada y nheme-l un tabéfi zás riba bokon y gérra kumesa. Es briga sen tadju ti ki es parti kunpanheru. Un fla kel otu: “má undi ki sén kontu sta?”; kel otu responde-l: “e si N atxa; ma inda N ka atxa”; …

___________________________________________________________


Dos ségu

Un individu ki tinha fama di rei di abuzadu bai na meiu di dos ségu ki staba na pórta di merkadu ta pidi zimóla y el fla-s: “ali, nhos toma mil eskudu nhos parti”. Má nada e ka da-s y el bai se kaminhu. Pasadu un bokadu, un di kes ségu fla kel otu: “dispatxa bu da-m nha kinhentu skudu”; kel otu fla-l: “bu debe sta na brinkadera. Da-m nha kinhentu xkudu só bu dexa di brinkadera. N ka sta pa patetisi txeu”; reason di kel otu ségu foi: “midjór bu da-m nha dinheru pa N ka rabenta-u piskós gósi li”; kel otu ka spéra pa más nada y el pasa-l se skerderu bera naris y gérra komesa. Un mos bai tadja kel gérra y el leba un bengalada na totis, uan …

Dipos pulisia ben, el raborbe-s y ka atxa niun di es ku ninhun tiston na bolsu. Pulísia fla: “Kel la gó ka ta fazedu”.

No comments: