“Apokalipsi 4,7 y 4,11
Prumeru limária bibu ta parseba ku un liãu; sugundu ta parseba ku un toru; tirseru tenba róstu sima di un ómi; y kuartu éra sima un ágia ta bua. Nhordés, Nho é dignu di rasebe ónra, glória y majestadi, pamódi é Nho ki kria tudu kuza; y es foi kriadu y es ta izisti pamódi vontadi di-Nho. ”
Kabuverdi ten tudu
Ten Nhordés
Ten kabuverdianas y kabuverdianus
Ten ilhas y ilhéus
Ten «todas as coisas visíveis e invisíveis»
Kabuverdi ten pulítiku y ten rabidanti pulítiku
Ten onéstu y ten malandru
Ten patakeru y ten pédigalu
Ten oportunistas, ten kaguetis, ten pokabrigónhas
Inda Kabuverdi ten más
Ten burru y ten spértu
Ten burru na ladera ku rabitxi y seladu
Ten burru livri y burru marradu
Ten burru mintrozu, ten mintrozu burru, ten onéstu burru y ten burru onéstu
Ten burru ki ta pensa ma e’ ta ngana y uza spértu
É duedu óras ki mintira ta podu pa monta verdadi
É tristi odja un burru sén rabitxi armadu en spertu di mê-dia pa tardi
Ta tenta ngana povu ki é rei di spértu y intelijenti
Ta bota berdi pa ben kodje maduru
Ku konbérsu fiadu na kanpanha-l falsidadi
Pa tenta ngana povu ki ten forsa diskizitu móda toru
Sin, povu é móda toru
Es tudu dôs ten forsa diskizitu
Má é duedu gó pamódi ninhun di es ka ten konxsiênsia di ses forsa
Un kualker mininu é kapas di manobra y kontrola toru, apezar di tudu forsa ki el ten
Un mininu el só podi leba un toru pa fonti
El pode marra-l, dismarra-l, po-l un tornel y leba-l pa matadoru
Má si toru xatia, el pode razolve na nbia se própi dónu
Dónu di toru sta konstantimenti ta korre risku di rasebe uns txifri a kaulker muméntu
Un dirijenti di un país pode mobiliza se povu y el manda-l pa gérra
Un guvernanti é kapas di kontrola se povu apezar di tudu forsa ki el ten
Un governanti pode marra se povu duranti se mandatu y dismarra-l dipos
Na kanpanha un pulítiku spirienti pode manobra eleitoradu
Kandidatus a kargu pulítiku podi leba povu pa urna
Má si povu revolta, el pode razolve na nbia-s
Es ta korre risku di rasebe uns txifradas …
Povu é moda toru
Se dirijenti é moda un mininu
Es tudu dôs ta korre risku …
No comments:
Post a Comment