Pa Agnelo A. Montrond, USA
Povu ki más ta ordena fla na urna ku ses vótus, pa nu ka volta pa trás, pamódi é midjór nu kuntínua ta transforma nos Stréla Kabuverdi na un izénplu na Áfrika y na mundu, ku es BON GUVERNASON di Dr. José Maria Neves y se ekipa ki bira-nu un PDM y un referênsia na Atlántiku.
Kabuverdianas y kabuverdianus, rizidentis na Kabuverdi ó na diáspura, mostra ku ses votus di kunfiansa ma guvérnu di Dr. José Maria Neves merese más un mandatu pa el kuntínua ta bira Kabuverdi kada bês más grandi, más dizenvolvidu, ku alegria y filisidadi na korason di tudu kabuverdianas y di tudu kabuverdianus, ku más y midjór saudi pa tudu algen!
Kabuverdianas y kabuverdianus spadjadu pa mundu interu, mostra ku ses votus di kunfiansa ma guvérnu di Dr. José Maria Neves merese más un mandatu pa el kuntínua ta bira Kabuverdi un país di kunfiansa na nos morabéza y na prugrésu na tudu kantu y rekantu di Kabuverdi.
Nos povu da kónta ma Kabuverdi Sta Na Móda y ma el debe kuntínua na móda. Nos povu é intelijenti y dja el da fé ma Kabuverdi sa ta bira kada bês más y midjór Kabuverdi, un Nason Kosmopolita Global. Eleitoris ki ta fala más altu dja fla ma es krê pa Kabuverdi kontinua ta bira kada bês más mudérnu y konpititivu na tudu ária pusível y imajinável. Povu krê más y midjór Kabuverdi, sén frontera má ku orgulhu nasional pa dizenvolviméntu di kada un di nos ilhas y di nos désimu prumeru ilha ki é nos diáspura. Nu ta kuntínua ta sunha ku pobréza komu un palavra mortu na disionáriu di Kriolu.
Povu puxa pa kabésa, eleitoris baskudja ses mimória, es odja ku odju di odja, es xinti ku naris di xinti, es obi ku obidu di obi, y es da kónta ma Kabuverdi sa ta dizenvolve di manera armoniozu y ekilibradu. Kabuverdianus dimonstra na urna ma dja es ntende ma es guvérnu merese opurtunidadi pa kuntínua ku es dinámika na se ajenda di trabadju pamodi Kabuverdi sta na kaminhu sértu. Kabuverdi sta na kaminhu suguru, alkatruadu, sinalizadu, y iluminadu. Kabuverdi sta na kaminhu abensuadu pa Nhordés, bunitu di naturéza, y akarinhadu pa Amor a Nos Térra.
Má nu ka ta kruza nos brasu y spéra só pa guvérnu di Dr. José Maria Neves trabadja pa transforma Kabuverdi na kel Kabuverdi ki Amilcar Cabral sunha ku el. Nu ta kuntribui tanbe pa bira Kabuverdi kada bês más Kabuverdi: Térra di pás, di gozu, di ruspetu pa direitus umanu, di demokrasia, di liberdadi, di igualdadi y justisa susial pa tudu kabuverdianus, independentimenti di konvikson pulítiku ó rilijiozu di kada un.
N ta faze un apélu pa opozison, ki N ta apruveita pa felisita pa forma pedagójiku, demokrátiku y serenu komu ki es aseita ses derróta, pa es asumi y dizenpenha ses papel ki povu da-s na urna na es eleison. Nu meste muda es mentalidadi di krispason pulitiko-partidáriu, y dexa di pensa ma si N ka sta ku bo, mi é kóntra bo, pa nu uni na nos diferénsas y kopera ku guvérnu di Dr. José Maria Neves, pa tudu djuntu nu kuntínua ta bira Kabuverdi kada bês más Kabuverdi, ku bonansa di tudu kel ki falta-nu na pasadu, pa imigrason dexa di ser nos sina. Nu djunta mon pa nu bira kel dilema: “Ter que partir e querer ficar ” en Ten prazer na fika y vive na Kabuverdi y bai pa stranjeru só si nu krê ba pasa féria ó vizita familiaris y amigus. Nu sunha ku unidadi y luta. Nu sunha ku pulítikus íntegrus ki ka ta pinta Kabuverdi ku kór di pobréza y di sufriméntu só pa spertéza. Nos tudu djuntu inda nos é poku pa nu trabadja pa kria kondison pa midjora vida di kabuverdianus, ku más y midjór inprégu, más y midjór idukason, más y midjór justisa, más y midjór seguransa, y un futuru midjór pa kada un di nos.
No comments:
Post a Comment