DISKURSU DI JMN NA ONU É MOTIVU DI ORGULHU PA TUDU KABUVERDIANU!

Pa Agnelo A. Montrond, USA

Exselénsia, Dr. José Maria Neves, Purméru Ministru di Kabu Verdi, diskursa na Kriolu na ONU. Kantu ki N obi es nóba, kabélu sanganha-m na korpu. N fikâ radjador, ku pé altu txon, rei di orgulhozu di tudu kenha ki ta papia nos lingua y ki ta valoriza nos kultura.

Dr. José Maria Neves faze más di ki stória na se perkursu di pulítiku karismátiku y pragmátiku kantu ki el diskursa na Língua Kabuverdianu na 66u seson di Asenblêia di ONU, ónti sábadu dia 24 di seténbru. E’ karrega nos Kriolu y el po-l lá altu na tribuna di ONU, ónbru-ku-ónbru ku se kolégas inglês, fransês, alemon, spanhol, etc. Kantu más altu Kriolu subi na vulkon di se dgnifikason y valorizason, más tamanhu é ruspetu ki mundu ta da pa nos lingua.

Nason Kabuverdianu en pézu ta orgulha di es jéstu grandi di Dr. José Maria Neves, ki diriji mensájen na kualidadi di riprezentanti di Kabu Verdi y di kabuverdianus pa reprezentantis di mundu interu, na lingua di térra. N ta tra nha xapéu pa es atu koerenti y konsistenti di Dr. José Maria Neves: si reprezentanti di Fransa ta diskursa na fransês ki é lingua nativu di fransezis, si reprezentanti di Inglatérra ta diskursa na inglês ki é lingua nativu di inglezis, si reprezentanti di Alemanha ta diskursa na alemon ki é lingua nativu di alemons, si reprezentanti di Purtugal ta diskursa na purtugês ki é lingua nativu di purtugezis, Dr. José Maria Neves ta merese más di ki un milhon di palmas di tudu kabuverdianus spadjadu na mundu interu, pa koerênsia y konsistênsia ki el teve, pa sima kes otus riprezentantis faze, pa sabiamenti y deliberadamenti uza ku orgulhu y ditirminason, KRIOLU DI KABU VERDI, lingua di identidadi di nos nason global, pa diskursa na Língua Kabuverdianu na ONU.

É ku atus di es kalibri y di es envergadura ki nu ta valoriza y dignifika nos lingua. Mestede mutu más José Maria Neves, mutu más Dr. Manuel Veiga, na es luta y labuta pa ofisializason di nos lingua. Dja txiga maré di nu ultrapasa diskulpa ma kondison pa ofisializason di Kriolu inda ka sta kriadu. Mestedu é ason, móda es di Dr. José Maria Neves na ONU, y nãu diskulpas pa adia ofisializason di nos lingua. Nu djunta mon, en ves di nu skorrega na nos lingua na parlaméntu pa partidariza ofisializason di Kriolu ku diskulpa insustentadu ma inda kondison ka sta kriadu. Ka nu spéra di brasu kruzadu na petu pa kondison pa ofisializason di Kriolu kriadu purméru pa dipos nu ofisializa Kriolu. Nos pulítikus devia sigi izénplu di Dr. José Maria Neves pa nu pode vense es dizafiu y ofisializa lingua ki é di-nos, ki nu ka panha na txea y ki nen nu ka ganha na gérra.

Es dinámika na perkursu di Kriolu Ka Ten Tadju. Sima pruvérbiu na Kriolu ta fla: «Kaminhu Lonji ta andadu é di béspa». Kriolu dja sta lonji ta subi: e’ nasi, e’ gatinha, dja-l bira grandi, dja el bai ONU, falta-l é só entra na nos konstituison pa el skrebe ku létras grandi móda el: LÍNGUAS OFÍSIAL DI KABU VERDI É KABUVERDIANU Y PURTUGÊS, ÓNBRU-KU-ÓNBRU.

Viva Dr. José Maria Neves

Viva Dr. Manuel Veiga

Viva tudu kriolistas

Viva Kabuverdianas y kabuverdianus

Viva Lingua y Kultura Kabuverdianu