Kumunidadi Kabuverdianu Partisipa En Masa Na Jantar Ku Nos Priméru-Ministru, Dr. José Maria Neves

Pa Agnelo A. Montrond

BROCKTON, EUA, 17 di Maiu di 2009 - Onti, dia dizaseis di Maiu, na Brockton, sidadi más kabnuverdiana na Mérka, sentenas di pesoas disloka di várius lokalidadis pa bai partisipa na kel jantar, ki konta ku onróza prizensa di Priméru-Ministru di Kabu Verdi, Dr. José Maria Neves, di nos Enbaixadora na Washington, Dra Fatima Veiga, di nos Konsul Jeral na Boston, Dra Maria Jesus Mascarenhas, di reprezentanti di «Mayor» (Prizidenti di Kámara) di Brockton, Sr. Moisés Rodrigues, y di más dignatárius.

Lógu dipos di jantar, sigintis pesoas uza di palavra:

Ana Novais ki aproveita pa agradesi prizénsa di kumunidadi na kel ivéntu, y au mesmu ténpu el da nos Priméru-Ministru, un rekadu di kumunidadi ki ta pergunta-l modi ki situason di alfandega y servisus na frontera sta na kabu Verdi, modi ki imigrantis ta tratadu óras ki es bai di féria y pamodi ki pasaji pa bai Kabu Verdi ku TACV sta asin taun karu.

Asigir foi ves di Moisés Rodrigues, ki en reprezentason di «Mayor» di Brockton, Honorable James Harrington, ki ka podeba sta prizenti pamodi dja el teneba se féria markadu na se ajenda ántis y el staba fóra di Brockton, fla prizentis ma administrason di Brockton sa ta trabadja pa faze tudu ki e pusível pa kabuverdianus na Brockton pode xinti ma es sta na ses kaza.

Nos enbaxadora na Washington Dra Fatima Veiga fala di ajenda di vizita di nos Priméru-Ministru, Dr. José Maria Neves, un ajenda mutu pertadu, má mesmu asin, nos Priméru-Ministru sénpri ta konsigi ranja ténpu pa sta ku kumunidadi kabuverdiana na Mérka, pa un muméntu di konvíviu, di morabéza, di konfraternizasaun y sobretudu di kumunikason. El fala di sforsu ki sa ta sér fetu na ária di nos diplomasia, y el konpartilha ku kumunidadi algun susésu ki dja konsigidu, numiadamenti programa Millenium Challenge Account, parseria ku alguns universidadis amerikanas sima Bridgewater State College, y tanbe el mensiona alguns enkontrus di Priméru-Ministru ku alguns altu dirijentis merkanus: el enkontra ku governador di Massachusetts Deval Patrick onti y oji el ta sér distingidu ku grau Doutor Honoris Kauza na lei, un títulu autorgadu pa Universidadi di Rhode Island, URI, en rekunhesiméntu di nos Pruméru-Ministru komu un izénplu di un jóven líder kabuverdianu y tanbe un líder afrikanu. Manhan sugunda-fera, el ta sta na Universidadi Bridgewater State College pa un konferênsia sobri dizenvolviméntu di Kabu Verdi.


Na se intervenson, nos Priméru-Ministru, Dr. José Maria Neves, entri otus asuntus, el fala di unidadi entri ilhas di Kabu Verdi. El fla ma óras ki ta fazedu un bon óbra, un bon prujétu, na un ilha kualker, pa es óbra ó prujétu sér motivu di alegria y di orgulhu na tudu kes otus ilhas. Nu debe ten un persepson global di dizenvolviméntu di kabu Verdi. El fla-nu ma tudu algen na Praia debe fika kontenti ku konkluzon di prujétu di anel rodoviariu na Fogu; ma tanbe tudu algen na Fogu debe fika kontenti ku konstruson di aeroportu internasional na Boavista; un otu izénplu ki el da-nu, e óras ki nu ta sunha y pensa na un Kabu Verdi global, kes des ilhas y más un ilha ki e diaspora kabuverdianu, injinherus y arkitetus ki ta forma na universidadi di Kabu Verdi na Praia, ó na un otu lugar kualker, y ki ku alegria y orgulhu ta bai trabadja na planiaméntu di dizenvolviméntu urbanistiku di Nova Sintra na Brava ó na un otu lugar kualker na un di kes nos ilhas; etc. En reason a rekadus di kumunidadi ki Ana Novais da-l, en jeitu di reason, Pruméru-Ministru fla kumunidadi ma di faktu inda nu ta depara ku alguns difikuldadis na Kabu Verdi. Ma difikuldadis na Kabu Verdi e ka di oxi nén di onti. Kabu Verdi sénpre tevi difikuldadis strutural y otus ki nu erda di kulonialismu. Má guvérnu sa ta trabadja ku afinku pa trasnforma kes difikuldadis na oportunidadis. Difikuldadis dja sa ta fika kada bes más poku, y oportunidadis sa ta bira kada bes más txeu, mesmu na es ténpu di grandis difikuldadi ikonómiku pa mundu interu. El sita izénplu di prujétu Fast Ferry, un prujétu fundamental pa Kabu Verdi, y el fla ma dja sta lansadu un Oférta Públiku di Subskrison (OPS) di un milhon y 500 mil obrigasons na Bolsa Di Valoris di Kabu Verdi. Na parti final di se intervenson, nos Pruméru-Ministru fla kumunidadi ma nu meste sér kada bes más otimista y trabadja sénpri ku determinason pa nu pode vense difikuldadis y kria kondisons pa kada kabuverdianu vive se vida ku dignidadi, y asin kontribui pa realizason di sonhu di Amílcar Cabral.

Agnelo A. Montrond
aamontrond@yahoo.com