Nha Mai Virginia

Ami e bu fidju
Kel minina di odju kastanhu
Ku olhar ansiozu pa diskubri un novu mundu

//

Un fidju ki desdi sédu
Prende ma bo e strada suguru
Fonti undi N ta mata nha sedi

//

Mai, bo e nha mai
Mudjer fórti y balenti
Ki ta luta tudu dia
Ka ta perde gérra nunka
Pamodi kenha ki kumesa drétu ka ta perde koraji

//

Bo e mudjer fórti ki na noti friu ta kenta-m na kama
Bo e nha mai ki ta txora klaru
Y ta txora ngatxadu
Pa un bida midjor pa bu fidju

//

Bo e mai ki ta zeza di noti
Ta pidi Déus na séu
Pa libra-nu di prigu y di torménta

//

Mai, N ka ten palavra pa N diskreve
Kantu ki N ta ama-bu
Virginia, maizinha di nha korasan,
Bo e inpurtanti pa mi
Desdi primeru bes ki n txoma-bu di mai

//

Mai, bo e nha lus
Bu ta suporta sol kenti
Kada minutu N kre obi bu vos
N kre pa bu obi-m ta fra-bu ma N kre-bu txeu
N ta ama-bu Virginia, nha maizinha kirida

//

Ami e prinséza di bus odju
N ten sertéza ma un dia N ta sér orgulhu di-bo, nha mai
Kada lágrima ki kai di bus odju
Ten sertéza ma el ka ta ben sén un milhaun di surrizu

//

Nha amor pa bo e móda un eklipsi

Bu fidja

Manuela Pina