Barack Obama É Más Ki Sinplismenti 44u Prizidenti Di Mérka!

Pa Agnelo A. Montrond


Obama e más ki un sínplis prizidenti. El e surrizu, olhar, y speransa na róstu di tudu algen, di más pikinoti a más grandi. El e forsa, lus, speransa, y gia ki mundu meste. El e un prizidenti vizionáriu, y un líder karismátiku, ki ta ben protagoniza mudansa y unidadi na mundu interu.Na Déus Pai tudu Poderozu; Kriador di séu y di térra; Di tudu kuza vizível y invizível, nu ta kunfia y akredita, sima Abraham Lincoln na se investidura, kantu el beija kel bíblia ku se mon.

Dia vinti di Janeru meiu-dia, ku un asistênsia di más di dos milhon di algen, Obama ta presta juraméntu, frenti di xéfi di justisa, pa el ser ofisialmenti proklamadu 44u prizidenti di Stadus Unidus.

Es investidura e un muméntu markanti na stória di Mérka. E un muméntu istóriku pesoal pa Obama y koletivu pa tudu mundu.

Es e ki e Muméntu ku létra grandi. Es e ka só bes di Obama. E se óra ki dja txiga.
E se ténpu ki dja pila. Na rilóji más izatu di mundu, ki povu merkanu regula ku intilijênsia y sabedoria, ku ses votu di konfiansa na mudansa ki mundu interu sa ta reklama.

Kada palavra y kada diskursu di Obama e un lison di stória di Mérka. Prizidenti Obama e xéfi komandanti di un novu dinámika na sédi di Mundu, ki e un Mérka unidu na diferénsa; Un inspirason divinu; Un lideransa y vizon paralélu, ki ta poi mon na kel mesmu bíblia ki Abraham Lincoln uzaba na se serimónia di investidura presidensial na 1861.



Asin, Obama ta dimonstra, y el ta prova, ma vizon, karisma, y lideransa ka ten kor, má el ten pézu, y el ta okupa spasu.

Sonhu di Obama e inspiradu pa otus grandis sonhus, di líders ki pur koinsidênsia, stória uni na perkursu y na data. Investidura di Obama e realizason di varius sonhus di grandis liders sima Martin Luther King, Nelson Mandela, Amilcar Cabral, y otus.


Obama ta presta juraméntu na Kapitóliu di Stadus Unidus, ki foi konstruidu ku suor na kósta di skravus, el ta anda na avenida Pensylvania ,y el ta bai rizidi na un kaza istóriku tanbe, konstruidu ku suor na kósta di skravus.

Prizidenti Obama ta ben luta pa pás, unidadi y stabilidadi na mundu. Kultiva amizadi y kaba ku dizamizadi entri povus y entri nasons. Konbati terrorismu, sob tudu fórmas, ku tudu meius, na mundu interu.

20 di Janeru di 2009: ta faze izatamenti 36 anu ki Amilcar Cabral (ki nasi dia 12 di Seténbru di 1924) foi barbaramenti asasinadu na dia 20 di Janeru di 1973; 80u aniversáriu di nasiméntu di Martin Luther King (ki nasi dia 15 di Janeru di 1929 y foi asasinadu na 4 di Abril di 1969), Jr.
A partir di es muméntu sa ta ben kumesadu un novu kapítulu na stória di Mérka.


Infilizmenti ten kenha ki ta ôdia un vizionáriu y un líder di kalíbriu di Barrack Obama. Pur isu, seguransa ten ki ta pasadu a penti finu: terréstri, marítimu y aériu. Pa mante distansia y kontrola tudu movimentason.

Un líder ka ta mididu pa se kor, má pa se kapasidadi y se dimenson umanu. Obama e un novu sol na orizonti merkanu, ki ta ben ilumina ku susésu es país ki e un muzaiku linguístiku y kultural, na undi ki tudu algen ta nasi igual, y debe ten mesmu oportunidadi di realiza kel sonhu merkanu.

Agnelo A. Montrond