KABU VERDI STA NA MÓDA

Pa Alberto Alves (Neves)

Nos amor é profundu
Pa es dés ilha di mundu
Pa es kantinhu sagradu
Pa es terrinha mimadu
//
Kada pasu di stória
Ten un mar di leitura
Ten rijistu y mimória
Ten eróis di bravura
//
Insertéza ki fradu
Dja fika na pasadu
Oji tudu sta biradu
Kabu Verdi sta mudadu
//
Desdi kanpu tê sidadi
Dja nu pasa flôr di idadi
Dja nu ten maturidadi
Viva viva liberdadi
//
Nu luta ku orgulhu pa un futuru rizonhu
E simé ki foi nos sonhu
Desdi sinku di Julhu
//
Ali ten mar ten areia
Ali ten sol tudu dia
Nu ten klima tropikal
Ten festival y karnaval
//
Nu ten povu bondozu
Ten vulkaun majistozu
Ten suségu ten gozu
Kabu Verdi ki e distinu
//
Imigranti nhos ben
Vizitanti nhos ben
Tudu mundu nhos ben
Kabu Verdi sta na móda

Albero Alves (Neves)