Kamin di Musteru

Pa Alberto alves (Neves)

Kamin di Musteru
Pa Ribera Djeu
N bai kaza d’Anteru
N bai djobê kretxeu
//
N funda pa Taláia
N korrê trás di Máia
N dixê Fajkanzinha
Loku pa Nininha
//
N’un fésta renadu
Ku sinu tokadu
N kumê tataruga
Ku kudjê kamuga
//
Na Murru Sunbangu
N bibê kaldu frangu
Ku kafé kentinhu
Na ká Nho Fidjinhu
//
N txigâ na Kemada
N atxâ Mariduarda
Ku amor di sina
Kretxeu di kontina
//
Na Bila di Greja
Barkon ku serveja
Ku pexi fritadu
Ku tóka trankadu

//
Néla na janéla
Ta parse donzéla
Landa na baranda
Ta djobê di banda
//
La na ká Xeminha
Dipos di un pinginha
Ferbedu marisku
Pa faze pitisku
//
N bai deta di kósta
Ta kaska lagósta
Es konta-m txeu stória
Ki N poi na mimória
//
Es fra-m ma nha flana
Sta spera-m ku ngana
Pa N pensâ un kuzinha
Pa N rumâ bidinha
//
Flana ntrega-m txabi
Pa N bai pasâ sabi
N bai kama ku sonu
N atxa flanu ku dónu
//
N’un noti di pás
Na Musteru Trás
N faze serenata
Na pórta d’ingrata
//
Dentu kafetal
Na txon di Fejual
Djuntu ku Nho Ntoni
N subi Pai Antoni
//
N badjâ na ká Truka
Na lus di kafuka
N rosa ku Rufina
Bunita minina
//
N txigâ Kutélu Artu
N pidi bisti fatu
Pa N bai txon di Korvu
Badju pidi noivu
//
N barâ Txada Grandi
N bai kel fésta grandi
Ku Nhonho d’Avinu
Na kaza di Tinu
//
Na pé di mangera
Na txon di videra
La pértu di un gruta
Fórti kumê fruta

//
Ku paxaun pa Eva
Dixê zóna Rélva
N faze dispidida
N kantâ na partida
//
Dixa-m ten kanteru
Na txon di Musteru
Dixa-m ser sorteru
Pa N subi puleru
//
Dixa-m ten txaberu
Ku txabi Musteru
Dixa-m na Musteru
Nén ki é sen dinheru


Alberto Alves (Neves)