Rubera Djeu e Rubera Nhordés!

Pa Agnelo A. Montrond

Situadu na Djarfogu, a sérka di vinti kilómetru a nordésti di sidadi di Sanfilipi y a poku minutu (sérka di oitu kilómetrus) a uésti di vila di Igreja, Rubera Djeu ki tanbe e konxedu pa Djeu, ó Djê «tout court», e un aldeia ki ta akolhê un di kes más antigu, si e ka própi kel más antigu povuadu di konselhu di Musteru. Rubera Djê e parti integranti di munisípiu di Musteru y el ta pertensê fregesia Nosa Sinhóra di Ajuda. Rubera Djê ten sigintis limitis: pa uésti, ten Kutel Banana, Kutel Figerinha y Bóka Fonti ki e separadu di Djeu pa Rubera Kulundjun; pa lésti ten Kazinha y Djê Fóra ki e separadu di Djeu pa Rubera Partidja; pa sul ten Séladu, Kobada, y Pé di Monti ki ta fikâ pértu di Monti Xalu; pa nórti ten Dakabalá, Barrera Trás y Barrera Dianti. Tudu kabu ki N bá N ta sinti sodadi Rubera Djeu. Pur isu N ta frâ ma Rubera Djeu e rubera sodadi. Rubera Djeu, N ka ta troka-bu nén ku Paris, nén ku Amsterdan, nén ku Nóva Iorki, nén ku Londris, nén ku Praia, nén ku Mindélu, nén ku Sanfilipi, nén ku Greja, nén ku nada.

Tres sentinélas sénpri na puzisaun di sintidu ta guardâ y ta resguardâ Rubera Djeu: Monti Portéla, Monti Xalu y Monti Djon Funandi. Sérra, ladu a ladu ku vulkaun, kuazi ta beja séu, e sima un muralha di Berlin natural, ki superiormenti ta vijiâ y kontrolâ tudu muviméntu na séu, na térra y na mar di Rubera Djeu. Kontrasti di Azul di se mar, di Branku di se séu linpu y puru na dia sén txuba, di Marélu di mindju di Ratxan, di Brumedjaun na kanbar di sol e kóris ki ta enfeita karta pustal di Rubera Djeu.

Rubera Djeu e un rubera di kultura: Bina Manzinha, di Kutélu, e figura di proa ki distakâ na múzika na Rubera Djeu ki el diskrevê asin: «Rubera Djeu e Rubera Nhordés – Nha genti fórti kabu sabi, forti kabu dósi, e li ki e Rubera Nhordés. N ka ben ku dia, nén N ka ben ku óra. E li ki e nha morada. Morada sértu e na Rubera Djê. Nha korasan sa ta trabadjâ sima rilóji di kuatu kabésa. …» Rubera Djeu e tanbê konxedu pa ses tokadoris: Xalé di Nhamá, un poli-instrumentista y un grandi tokador di robéka; Amadeu Gomes Martins (Madéus di Feminha), nos Umbertóna, e un rekintadu tokador di violaun; Agustinhu di Sakorru, di Serkinhu, se dédu é tudu sabidu, e kantor y un ruspetadu tokador di violaun; Juzé Lasu, di Djê Déntu, kantor, konpozitor y un grandi tokador di violaun; Carlos Spinola, Soné di Manelinhu, di Serkinhu, nos Eugénio Tavares, e nos grandi konpozitor y autor di alguns létras di múzikas interpretadu pa Ana Lopes, di Kazinha, más konxedu pa Klarinda, ki e nos Cesária, e un di kes midjór vós fimininu di Rubera Djeu; Agnelo Armando Montrond, más konxedu na Djeu pa Armandu di Aginélu, João Domingos De Pina (Juaun di Kaka), di Pórta Tabérra, ó Pórta Ka Lion, Casimiro De Pina (Nhónha di Alídiu), – tres tokadoris di violaun, y más ki N ka sa ta lenbrâ gosin.

Muzikalidadi karateristiku na Djeu e un autentiku sinfonia melódiku pruduzidu na se konservatóriu natural ki ta inklui rezonánsia di zurru di burru y bérru di kabra na stibaria, katxô ta ladra di noti ku refléksu di seis arti, vibrasaun di tanboru di Rui Préta, Djon di Luka, y Alídiu Bibi, konbinadu ku vózis sonantis y inegualáveis di kantaderas dufunta Mimi di Anjérka, dufunta Patusina, y Mima Txaginha, rítimu di pilon y kolexa na konpasu bináriu ku armonia perfeitu, fogeti, buskapé y bonbóna na fésta di Nho Sanpalinhu, Nho Sanfilipi, Nha Santana, Nho Santantóni, Sandjon, y Sanpedru, galu ta kantâ di madrugada na konpasu pilon pa kel kuskus frésku pa kafé di parmanhan antis di gentis ba padjigal panhâ kuza ingran, mundâ y ordinhâ limárias, panhâ padja, y panhâ lenha.

Di entri kes más ilustris y antigu figuras di Rubera Djeu nu ta sita alguns nómis: dufuntu Agnelo Montrond – Kabu Xéfi y kumersianti; dufuntu Hugo Aguinaldo José Rogdrigues, más konxedu pa Furtunatinhu – propietáriu; dufuntu Silvestre Gomes Martins, más konxedu pa Sirbésti Karrulina - proprietáriu; dufuntu Fortunato Barbosa Amado, más konxedu pa Naku – kumersianti y proprietáriu; dufuntu José Vaz, más konxedu pa Djédjé di Nha Katrina – kumersianti; dufuntu Alirio Lopes de Pina (Alidiu Lion) – kumersianti y proprietáriu; dufuntu Carlos Barbosa Amado (Karru Naku) - kumersianti y proprietáriu; dufuntu Alfredo Monteiro (Féfé di Xalé), kumersianti; José Alves (Juzé di Rikéta) – profesor; Viriatu di Feminha – boksista (bokseru) y profesor na Purtugal; Luis Gomes Martins – injinheru y profesor; dufuntu António Vaz Mendes (Ntoninhu di Aginélu) - kapataz agríkula; Manuel António Montrond (Ntoninhu di Ntoni) – kapataz agríkula ki oji sa ta trabadjâ na nbaxada di Mérka na Kabu Verdi; dufuntu Nicolau Vaz De Pina, más konxedu pa Nakulá di Mana - grandi infriméru ki ta fazeba trabadju di dotor na Djeu, y más otus nómis ki du ta ben akresentâ dipos.

Maioria di populasaun di Rubera Djê ta vivê di agrikultura y kriasaun di limárias. Alguns, má mutu poku, ta vivê di péska y kumérsiu retalhista. Kes ki e funsionáriu públiku e kontadu na dédu. Ántis na Djeu tinha só un skóla primária, un greja katóliku, un greja adventista, un postu di korreiu y un postu sanitáriu. Já oji, ten mutu más infrastruturas, ki e indikadoris di dizenvolviméntu ki ultimamenti ten karaterizadu dinámika di Kâmara Munisipal di Mustéru, superiormenti lideradu pa Edil Musterensi, Sr. Carlos Fernandinho Teixeira. A títulu di izénplu nu ta sita: Delegasaun Munisipal ki ta sirbi pa atendiméntu di munísipis pa kobransa di inpostus, undi ki rizidentis podê bá aprezentâ kexa, y skuadra polisial ta sta la sénpri prizenti pa atendê pesoas; Jardin Infantil ki ta presta kel sirvisu indispensável pa idukasaun efetivu di «floris di revolusaun» y futurus líders di Djeu; Strada pa karru di asésu pa Serkinhu; Strada pa karru di asésu pa Barrera; Séntru Kumunitáriu di Ribeira Ilhéu pa juventude, etc. Tanbê oji dja ten alguns lójas nóvu na Djeu pa kumérsiu retalhista y ten un lója di João Vaz Montrond, ki e nha primu y ki e más konxedu pa Fernandi di Nhomendi, ki e úniku na konselhu ki ta faze nagósiu a grosu.

Du ta apruveitâ pa lansâ un apélu a tudu kuadrus, prufisionais, ómis y mudjeris di negósiu, enfin a tudu argen di Djeu, ses famíliaris, parentis y amigus, ki sta na stranjeru, pa djunta ku nos pa du formâ un grupu fórti en prol di dizenvolviméntu susial, ikunómiku y umanu di nos zóna, pa na un futuru prósimu, en ves di trabadju rixu y kastigadu di kel ténpu, na undi ki fómi, mizéria, y duénsa éra distinu di ómi, mudjer y kriansas, du da nos kontribuisaun pa mudernizâ infrastruturas rodoviárias, idukativus, di saudi, susial, etc, y retribuí gentis di Djeu un vida kondigna ki es meresê, konpititivu a nível nasional y internasional. Du lenbrâ ma pa nos sonhu birâ realidadi, nos tudu inda nos e poku pa djuntâ mon y trabadjâ ku seriedadi y abnegasaun, pamodi trabadju e txeu y nesesidadis e ka poku. Du ta tornâ lansâ es apélu a tudu kenha ki di un fórma ó di otu ten algun afinidadi ku txon di Bina Manzinha, ki sunha birâ Rubera Djeu, se bérsu, na Rubera Nhordés, pa apoia-nu ó partisipa ku nos na es djunta-mon pa Djeu. Pas es kauza justu, partisipasaun di tudu kabuverdianu y di un kualker sidadaun di mundu e nesesáriu y seguramenti ta fazê diferénsa na vida di kes ki sta más nesesitadu. Nu ta gostaba di podê djuda-s ku kumida pa es kumê y agu pa es bibê pa es ka deta nén ku fómi nén ku sedi, agu pa es labâ pa es ka duesê, ropa pa es bisti, ramédi pa kenha ki podê sta duenti y ka ten dinheru pa kunpra-l, material pa minis ki sta na skóla y ki ka podê kunpra-l. Tudu kel-li e pusível ku partisipasaun y kontribuisaun di nos tudu.