Sr. Tito Paris ta diskulpa-m, má kel-li gó N ten ki fla:

Pa Agnelo A. Montrond


Es kuza di Sr. Tito Paris, ki en jeitu di pau-mandadu, ta abri bóka y konbérsu ta sai a toa, y ta intxi petu pa fla irresponsávelmenti ma el e asumidamenti kóntra ALUPEC, e ka otu kuza sinaun un txakóta, un baléla ki ta lenbra-nu di kes reasionáriu katxor di dos pé, ki na kel altura éra kóntra nos indipendensia, y ki oji sta tudu rapendedu.

Sin, fladu ma Sr. Tito Paris e própi kóntra ALUPEC! Y arguméntu di Sr. Tito, ki e ka arguméntu má sinplismenti un manda bóka, e ma ALUPEC sa ta divide Sotavéntu ku Barlavéntu. Nada más falsu Sr. Tito Paris. Kel-li, ti na Paris e un autentiku farsa y un puru invenson di kantor di «Dansá má mi Krióla». A naun sér ki algen segrada-l el na oredja y pidi-l pa el faze es spetákulu li, di grasa, na kumunikason susial.

Sr. Tito Paris ta poi bóka na tronbóna y ta kanta ma ALUPEC sa ta divide Sotavéntu ku Barlavéntu. Ken ki fla Sr. Tito kel-li? Na undi el obi-l? Será ki Sr. Tito Paris ta konsigi prova es afirmason? N ta dizafia-l publikamenti pa el prova-l.

Si el ka sabeba, dexa-m ba ta fla-l ma au kontráriu di kuza ki el pode ter fladu, ALUPEC e un alfabétu ki ta inspira na lójika matimátika y el e unifikador: el ta unifika y sinplifika skrita di tudu variantis di Sotavéntu y di Barlavéntu. Pur favor, ka nho kunfundi rezisténsia ku divisionismu ó bairrismu linguistiku. Verdadi e ki ten algen na Barlavéntu ki e kóntra ALUPEC (alienadus y katxorris di dos pé, mandis nha amigu Dr. Marciano Moreira) y ten algen ki e favor. Y mesmu kuza ta kontise na Sotavéntu. Kel-li sin, e un faktu.

Manuel D’Novas flaba ma tudu gatu pintadu bira konpozitor na nos térra. Já agóra nu podia apruveitaba pa imita-l y flaba ma gósi tudu kantor pingadu pau-mandadu kre gratuitamenti sér kóntra ALUPEC y sén sabe pamodi. Má nu ka ta bai pa kel kaminhu la.

A prupózitu: un amigu di meu fla-m ka dura, ma el e kóntra ALUPEC, má ka 100 %. Y Sr. Tito, kantu pursentu kóntra el e?

Ku tudu onestidadi, integridadi y amor ki nu ten pa nos Kabu Verdi di Speransa, pa nos Kriolu ki e nos denominador kumun, y nos spuenti másimu, ka nu bira es kuza en Praia kóntra Mindélu nau. ALUPEC kre e Praia ku Mindélu unidu.

N ta apruveita pa manda es rekadu li pa Sr. Tito Paris: Pa un kantor subresai y bira un stréla na nos palku muzikal global, e ka ten ki ser forsadu a ser kóntra ALUPEC, má sin, e ten ki ser un bon artista, ruspetador di spesialidadi di kada un, y ki ta akredita na konpitensia di nos sientistas linguistas, sima Dr. Manuel Veiga y otus, ki debe gia-nu na es prusésu di normalizason di nos skrita y ofisializason di nos lingua. Ó Sr. Tito Paris kre inxina renadu toka tanbor y inxina Nho Padri da misa? Ki enjenharia linguistiku e kel-li?

Agnelo A. Montrond

aamontrond@yahoo.com