Agnelo A. Montrond
- Nha genti, nhos sabeba ma, má N kre traison di nha amigu, di ki karísia di nha inimigu?
- Y nhos sabeba ma gosta di algen pamodi el e branku ó el e prétu, e mesmu kuza ki koba-l só fédi y txoma-l di tuga ó di prétu di Giné?
- Kenha ki sabeba ma filisidadi di mudjer branka ó di omi branku ka ta konpara ku mizéria di omi branku ó di mudjer branka?
- Y ken ki sabeba ma e ka ku rasismu ki ta lutadu kóntra rasismu má ku morabeza y solidariedadi?
- Nhos sabeba ma óras ki gentis ta fla ma es gosta di mi, razon e kel-mé óras ki gentis ta fla ma es ka gosta di mi?
- Y nhos sabeba ma kenha ki ta anda pus-dretu na kaminhu ta txiga undi ki el sa ta bai?
- Tanbe, bu sabeba ma présu di bu txapeu ka ten nada a ver ku kuefisienti di bu intilijênsia?
- Y bu sabeba ma bu debe anda dretu na mundu y trata mundu dretu, pamodi e ka nén bu pai nén bu mai ki da-b-el di prizenti?
- Nhos sabeba ma omi e un bitxu runhu, ás bes sima un liaun, pa luta y difende se kabésa?
- Nhos sabeba ma un omi sén rabu-l padja ta anda suguru na sukuru, má kenha ki ta anda tortu, sédu ó tardi el ta diskubridu?
- Y bu sabeba ma bu debe rasguarda bu korason pamodi e’ la ki bida sta?
- Bu sabeba ma bu debe djobe y spia sénpri pa dianti?
- Y bu sabeba ma kaminhu di kabra nén di burru dja ka ten más?
- Bu sabeba ma bu debe spia dretu pa bu ka po pé na sujidadi?
- Bu sabeba ma bu debe da pasu firmi y anda ku koraji?
- Bu sabeba ma bu ka debe nunka anda ta da zigi-zagi?
- Y finalmenti, bu sabeba ma un trópa di burru komandadu pa un lébri ta ganha gérra kóntra un trópa di lébri komandadu pa un burru?
- Nha genti, nhos sabeba … ?
Agnelo A. Montrond
No comments:
Post a Comment