Kúmulu di absurdu

Pa Aderico De Sousa Alves*

Éra un bes, staba kuatu amigus ta toma kafé na kafé Armonia-Dosi-Enkontru:

• un éra ségu y el ta staba sénpri ta odja nuvéla;

• kel otu éra mudu y el ta pasaba se ténpu ta ruê na vida di algen;

• kel terseru éra surdu y el ta staba só ta obi relatu;

• y kel kuartu éra manku y el ta staba sénpri fóra di se karrinhu di róda;

Un staba ta kume katxupa gizadu ku óvu y longisa. El toma un golpada di kel kafé sabi di Fogu, ku bóka intxidu el fla ses amigus: “rapasis, es ta da bon kafé na es kau.”;

Kel otu fla: “aian, es nha prégu sta sabi y fadjadu”;

Kel terseru da ku kabésa y el fla: “sértu mé, es da-m un laska di kuskus di midju térra, y es mantega-l baka sta un dilísia”.

Es kontínua ta kume manenti baxu di kel konbérsu animadu. Tudu ses konbérsu N ka obi, ma kel parti li gó N obi y N ten ki konta-nhos-el:

Kel surdu fla ma el obi kel mudu ta fla ma kel ségu fla-l ma el odja kel manku ta partisipa na korrida di konpitison na Praia ki organizadu ka dura pa trezi di Janeru y el fika na pruméru lugar.

Sapatinha rubera riba, sapatinha rubera baxu, ken ki sabi más konta midjór.

*Ku ajuda di se prufisor di matimátika, Agnelo A. Montrond, a partir di un otu verson ki el konta-l.