Milharis di pesoas dja morre na Aiti, vítimas di kel piór terramótu, na es últimu duzéntus anu, ki abala es país irmon, na dia 12 di janeru pasadu, y inda pelu ménus más tres milhon di algen sa ta prisiza di ajuda internasional.
Episéntru di kel sismu di grau 7 na skala di Richter staba apenas 10 milhas lonji di kapital aitianu, Port-au-Prince, ki ten un populason di sérka di un milhon di pesoas.
Palásiu prezidensial, instalason di sédi di korpu di pas di Nasons Unidu, asenbleia nasional, y pelu ménus un ospital fika konpletamenti distruidu.
Ekipas internasional di apoiu a situasons di disatri kumesa y kontinua ta txiga na Aiti, un país ki sigundu se própi prizidenti, es enórmi terramotu é un gólpi jiganti na kel país karibenhu di nóvi milhon di abitanti, ki fika inda más póbri y ses infrastruturas inda fika más frajilizadu.
Fázi di operason di buska y salvaméntu djuda salva txeu pesoas, má inda sta alguns vítimas na stadu di saúdi krítiku ta prisiza di ajuda médika y medikamentoza pa minimiza perda umanu.
Pesoalmenti N ta manifesta públikamenti nha solidariedadi ku póvu aitianu en jeral, partikularmenti ku nhas amigus aitianus ki N konxe na Fransa y na Mérka, y ku ses famíliaris.
Agnelo A. Montrond
No comments:
Post a Comment