Pa Agnelo A. Montrond Dedikatória: N ta didikâ es textu pa tudu kes ki inda sa ta vivê na situasaun di penúria na
Musteru.
Andâ na kaminhu di burru ó di kabra, éra un bes. Oji, di Rubera Djeu, argen ta bá di karru pa vila di Igreja ó pa Bila via Kanpana y txiga la na «fai» minutu. Ka ten konparasan entri Rubera Djeu di onti ku Rubera Djeu di oji y ka ta ben ten konparasan entri Djeu di oji ku Djeu di manhâ. Ántis, maioria di kazas éra di pédra brutu y kubértu ku karapati. Oji maioria di kazas e fetu di bloku di simenti y kubértu ku tedja ó ku simenti. Dja ten lus ilétriku y telefóni na Djeu. Oji e basta karkâ mon na interuptor y sendê lus. Maioria di polulasaun di Djeu ten un familiar ó un parenti pértu na stranjeru ki ta djuda-s ku dinheru. Má inda ten un númeru mutu reduzidu di argen ki ka ten ningen pa djuda-s y ki ta vivê na un situason ki kualker tipu di ajuda finanseru ta fazê diferénsa. Própi Prizidenti di kâmara, Fernandinho Teixeira, dja pidi intervensaun urjenti di guvérnu, pa abri trabadju pa konstrusaun di strada di Baia di Korvu y di anel rodoviariu di Fogu, sen dimóra, pa garanti katxupa y susténtu di alguns jóvens, mudjeris y xéfis di famílias ki sta dizenpregadu y frustradu ku es falta di oportunidadis di enprégu. Du mestê djudâ minimizâ situasaun di penúria ki sa ta spadjâ pa tudu konselhu di Musteru. Y própi dadus di INE, Institutu Nasional di Estatístika, ta indikâ ma taxa di pobréza sa ta aumentâ na Musteru (na 2007, aumentu foi di kuazi dés purséntu). Rubera Djeu, komu parti integranti di konselhu di Mustéru sta na mésmu situasaun. Antan, e ku ideia na djudâ arguns di kes tipus di argen la, ki sat a kriadu un grupu di amigus pa apoiâ kes ki sta más nesesitadu. Un grupu di pesoas riuni na pasadu dia dimingu y es inisia kriasaun di un kumisaun «Ad Hoc» ki ta integrâ sigintis eleméntus: Antero Lobo Gomes ki e prizidenti, Filipe Lobo Gomes ki e tizoréru, José Quintino Mendes ki e sekretáriu, Agnelo A. Montrond, Arlindo Correia, y sa ta pensadu na konvida Etelvina Soares Rosa (Tali di Afu), Eugenia di Pipita, Ana Lopes, Marta di Xiba, Adelaidinha Maria Xinha, Nicolau Gomes (Lainhu), y más pesoas. Naturalmenti ki partisipasaun di tudu argen e benvindu, sobretudu di kuadrus, prufisionais, di ómis y mudjeris di nogósiu di Rubera Djeu sima:
Kuadrus y prufisionais: Viriatu Di Sirbesti - injinheru – Purtugal; Luis Gomes Martins – injinheru – Kabu Verdi; José Gomes (Dui di Mémé) – injinheru – Kabu Verdi; Agnelo Armando Montrond – injinheru / profesor – Mérka; Carlos Paulino Vaz – injinkeru – Mérka; Carlos Spinola (Soné di Manelinhu) – kursadu na justisa kriminal – Mérka; Casimiro Jesus Lopes de Pina (Nhónha di Alídiu) – adivogadu – Makau; Leão de Pina – kursu superior – Kabu Verdi; Arlindo Correia (Rulinhu di Tudéka) – injinheru eletrotékniku – Mérka; José Eugénio Montrond – xéfi fiskal di kâmara di Musteru; Pedro Agnaldo Montrond, más konxedu pa Pégrégu - Diretor di Pólu Iducativu númeru 3 di Djê ku Talaia, y jugador di Kutelinhu; Domingos Vaz Mendes, más konxedu pa Uginhu di Fidjinha Xinha – vereador di Kâmara Municipal di Musteru pa ária di disportu y kultura; y más otus ki du ta ben mensionâ dipos; Ómis di Nogósiu: Arlindo Correia (Rulinhu di Tudéka), proprietáriu di Restauranti Laura na Dorchester; João Vaz (Djonsa di Nhamá) – proprietáriu di un «Liquor Sore» na Roxbury y di diskotéka Macumba na Mattapan; Silvina, donu di un salaun di beléza; José di Djena Dilaida, donu di un ofisina mekanika di karru na Brockton, Nelson di Manidjinha, donu di Mendes Heating, António Gomes, konstrusaun, y otus ki nu ta ben mensiona dipos. Es kumisaun ta tornâ riuni na Dorchester na prósimu dia dumingu pa kuntinuâ trabadju di rekrutâ más menbrus. Pa angariasaun di fundu sa ta pensadu na kriâ un asenbleia di menbrus ki ta fikâ ta pagâ mínimu di sinku dóla pa mês. Tanbê tenedu ideia di organizâ un jantar konvíviu na restauranti Laura na Dorchester pa kel mesmu fin. Más atividadis di es tipu ta ben ser organizadu. Inda kumisaun ta kontâ ku patrusíniu di proprietárius di negósius ki e di Rubera Djeu, y naun só. Vérba ki kumisaun kunsigi angariâ ta ser enkaminhadu pa Rubera Djeu y el ta bai ser uzadu prioritariamenti pa situasaun di morti, ivakuasaun di duentis pa ospital na Ktulel di Asukra ó pa Praia. Asin ki más pormenoris stiver dispunível nu ta informa públiku.
Nos sonhu e dizenvolviméntu susial, ikunómiku y umanu di nos zóna, pa en ves di trabadju rixu y kastigadu di kel ténpu na undi ki fómi, mizéria, y duénsa éra distinu di ómi, mudjer y kriansas, du modernizâ infrastruturas rodoviárias, idukativus, di saudi, susial, ets, y retribuí gentis di Djeu un vida kondigna ki es meresê, konpititivu a nível nasional y internasional. Pa nos sonhu birâ realidadi, nos tudu nos e poku pa djuntâ mon y trabadjâ ku seriedadi y abnegasaun pamodi trabadju e txeu y nesesidadis e ka poku. Nu ta lansâ un apélu a tudu kenha ki di un fórma ó di otu ten algun afinidadi ku txon di Bina Manzinha, ki sunha birâ Rubera Djeu, se bérsu, na Rubera Nhordés, pa apoia-nu ó partisipa ku nos na es djunta-mon pa Djeu. Pas es kauza justu, partisipasaun di tudu kabuverdianu y di un kualker sidadaun di mundu e nesesáriu y seguramenti ta fazê diferénsa na vida di kes ki sta más nesesitadu. Nu ta gostaba di podê djuda-s ku kumida pa es kumê y agu pa es bibê pa es ka deta nén ku fómi nén ku sedi, agu pa es labâ pa es ka duesê, ropa pa es bisti, ramédi pa kenha ki podê sta duenti y ka ten dinheru pa kunpra-l, material pa minis ki sta na skóla y ki ka podê kunpra-l. Sima ki prizidenti ileitu di Mérka, Barack Obama frâ, «Yes We Can», du ta parafrazia-l y du ta frâ sin e pusível ku partisipasaun y kontribuisaun di nos tudu.
Agnelo A. Montrond – aamontrond@yahoo.com
No comments:
Post a Comment