Nos Amor E Un Kuadradu Perfeitu

Pa Manuela Pina

Nha amor pa bo e móda 2 × 2
Nha amor pa bo e móda 4
Nha amor pa bo e móda raís kuadradu di duzaseis

//

Nos amor e ka paralélu
Mas e perpendicular na simetria di nos kurasaun ortogonal

//

Bo e sirkunferênsia di nha bida
Bu ta sta 365 dia na órbita di nha sonhu
Y 180 grau na nha surrizu

//

Bo ki e nha variável dipendenti
Na nha odju e bo ki e probabilidadi
Na nha lábius, e bo ki e funsaun di nha bida
E bo ki e «Slope» di nha realidadi
Bu sta 100% na nha orizonti

//

Na nha loukura e bo ki e adisaun
Multiplikasaun na nha dizeju
Subtrasaun na nha sonhu
Y divisaun na nha pensaméntu

//

Bo e un kuadradu perfeitu na nha dia-dia
Nos bazi e fórti
Nos ispuenti e flutuanti na nha pensaméntu
Bo e maior ki nha dizeju
Menor ki nha tristéza
Pamodi bo e koordenadas na nha kaminhu

//

Manuela Pina