Stória, stória, fartura de séu amén.
Na prinsípiu, Déus poi tudu limárias nómi. El poi burru nómi di “Manuel Da Graça”. Déus rakomenda tudu limárias pa-s lénbra ben di ses nómi, pa-s ka kunfundi ses nómi ku di ninhun otu limária.
Pasadu un ténpu, Déus riuni ku tudu limárias y El pergunta kada un di es kal ki éra se nómi. Tudu limárias fla ses nómi dretu, ménus burru ki skesi di se nómi. Anton Déus xatia ku el y El fla-l: abo, bu nómi é Burru, y bu ta fika burru pa tudu ténpu. Na tudu kau ki bu bai, bu ta sér sénpri burru: na ladera, na kobon, na kutélu, na parlaméntu, na tribunal, na guvérnu, na oposisãu, ó na ONU, bo é ki é burru. Juméntu gó é bu nominhu di kaza.
Na skóla, Burru ta staba ku korda largadu ta spadjiga koxu pa tudu banda. El ka tenba ruspetu pa ningen, nen pa se prufsor ki éra rei di burru. Livru prifiridu di Burru éra un livru ki Mintirozu skrebi. Kel livru poi Mintirozu fika famozu, ti ki el ganha prémiu nóbel di mintira y konta ka-si. Parti más sabi di livru di Mintirozu éra na página 13. E éra si: “Prufsor di burru éra úniku burru ki óras ki kes otus limárias ta staba ta durmi, podeba zurra ku tudu forsa pa-s podi fika ta sabi ma el é ki tenba Ph.D. (dotoraméntu) na burraria, mestradu na salvajaria, otu mestradu na da koxu ku expesialidadi na karrega karga pizadu na ténpu di azagua, baxarel na kabésa ka prontu, otu baxarel na gataria y makakaria, prufesor katedrátiku di plajiarismu ku txeu piskiza fetu y un bokadu di óbras kopiadu na internet publikadu ku se nómi y ki é rekonhesidu mundialmenti. Dotor Burru fla ma dja el burru dja, pamodi el é ki é maridu-l bésta. Ken ki ka fika sabi prublema é di sel.”
Na béspa di dia di Sãu Nunka, limárias tinha ki disidiba si éra burru ó mintirozu ki ta fikaba Kabu Xefi. Mintirozu fazi kanpanha y el fla limárias pa-s toma kudadu ku vota na Burru, pamodi Burru ta staba na kuzas ka dretu. El fla-s ma Burru ta staba ta uza dinheru xuxu, ma alguns limárias ta staba ta finansia alguns prujétus di Burru ku dinheru di dróga. Tudu limárias fika spantadu ku kel konbérsu di Mintirozu. Burru kexa na tribunal di Zóna, má ti oxi juis ki ta staba xintadu na un moxinhu, ka julga kel kazu. Talvês, el sa ta spéra pa Koné bai di Mérka. Burru perdi eleison pamodi limárias kardita na kel konbérsu fiadu di Mintirozu. Anton, inda oji é Mintirozu ki sa ta manda na tudu limárias. Mintirozu é Kabu Xefi, Rei, y Dónu, di tudu limárias: di pikinoti ti más grandi. Mintirozu ki sa ta manda na tudu txikeru, tudu manjedor, tudu lapa, tudu gudjeru, tudu stibaria, tudu barraka, tudu padjigal, tudu tosa, tudu sistérna, tudu tabérna, …
Un belu dia Burru ku Mintirozu kontra ku kunpanheru. Mentirozu purgunta burru: “É burru ki é mintirozu ó é mintirozu ki é burru?” Burru responde-l: “ Ben, mi nha opiniãu é siginti: N ka favor, N ka kontra, antis pelu kontráriu.” Mintrirozu akresenta y fla-l: bo é onéstu y trabadjador; pur isu ki-m gosta di-bo. Bo ki é midjór fidju di nos térra. Nu mesti un líder sima bo ki é ka favor, nen kontra, antis pelu kontráriu. Bo é un bon lider pamodi povu ki ta guia-bu. Kuza ki es fla-bu, si é verdadi ó mintira, bu ka ta nporta. Bu ta kunpri.
Un dia, Mintirozu konta Burru uma mintira y el purgunta-l kal ki éra se opiniãu. Burru labanta xeiu di bazofaria y el respondi: “Bon, mi na es asuntus sériu sima kel ki nu sa ta fala di el li, N ka nen favor, nen kóntra, antis pelu kontráriu. Mintirozu sabia ma Burru é ka éra kapaz di diskubri se mintira. Anton Mintirozu ta pasaba se ténpu só ta goza ku Burru.
Kuzas bira margós kantu Burru txoma Mintirozu di mintirozu, nun kazamentu undi Mintirozu éra padrinhu y staba ta fazi un diskursu. Malkriadu paga kafuka y limárias kumesa un gérra sen donu. Es tranka pórta pa ningen ka sai: txopu sendi na paredi kantu porku fika ta kufu-kufu, toru fika ta nbia algen, baka ta poi txifri pa tudu banda, katxor ta ladra, enfin. Éra un konfuzon total.
Pasadu uns dias, nun fésta di botizadu, ki Burru éra padrinhu, Mintirozu ki staba na un otu botizadu ki el éra padrinhu, txoma Burru di burru. Es atxa ma es staba ta insulta kunpanheru dimás, ma es tinha ki fazeba algun kuza pa para ku kes insultus. Anton Burru kexa di Mintirozu y Mintirozu kexa di Burru. Es tevi ki bai pa tribunal. Burru iziji ma juis ka podia ser mintirozu y Mintirozu iziji ma juis ka podia ser burru. Burru dja da koxu, zurra, y fazi diabus-kuatu. Mintirozu tanbê dja fazi un bokadu di disparati ti ki es txiga un akordu. Burru fla ma el ta seta bai pa tribunal má juis ka podi sérba nen mintirozu, nen burru, antis pelu kontráriu.
Kazu di Burru ku Mintirozu foi sigidu ku txeu interesi pa tudu limárias. Dia di julgaméntu tribunal staba xeiu di limárias ki kuazi ka tinha kabu nen di poi pé. Staba juméntu ki éra tistimunha di Mintirozu, lobu, xibinhu, tia Ganga, Maria Kondon, katxor di pekadu, Bela Adormesida ki kordadu pa bai obi kel justisa, grupu rabéladu, Anita na Justisa, y Pinókiu ki éra tistimunha ki Burru leba. Nariz di Pinókiu fika ta kunprida óras ki mintirozu fika ta da dipoiméntu. Kada bês ki burru papia, juméntu fika ta da koxu y ta zurra. Kel juis anula kazu pamodi el atxa ma é normal burru ser burru y tanbê ma mentira é ka krimi. El atxa ma ka kumetedu niun krimi. Dia di senténsa final, juis ki éra rei di burru, bistidu tudu di prétu, lé sentensa y el fla: “Burru é ka mintirozu, nen Mintirozu é ka burru, antis pelu kontráriu”. Sapatinha rubera baxu, sapatinha rubera riba, ken ki sabi más konta midjór.
Agnelo A. Montrond
No comments:
Post a Comment