Alberto Alves "Neves"
I
Ka nhos txoma-m Badiu
Ka nhos fla-m Sanpadjudu
Ka nhos faze más briu
Nhos sta mutu bokudu
II
Anos é kabuverdianu
Di li nhos ka ta tra-nu
Antan ka mesti gérra
Nos tudu é fidju térra
III
Nu ka branku sigunda
Nu ka burru karrétu
Es kuza ten ki muda
Nu ten ki tra-l di pétu
IV
Nu luta sen vaidadi
Pa nos dignidadi
Pa frenti sen maldadi
Ki sta filisidadi
V
Si térra ka ten oru
Ka mesti dizaforu
Nen ka nu spera djuntu
Pa sapatu-l difuntu
VI
Si bidion é ka pexi
Nu mexi nu ramexi
Albérka ka sapatu
Bida ka sta baratu
VII
Finadu mal nterradu
Firida mal kuradu
Difuntu mal karsadu
Dja da pésti rakaida
Boston, 14 de Abril de 1998 Alberto Alves "Neves"
3 comments:
Prezadu amigu Neves,
Prumeru N kre da-bu nhas parabenx pa bu zelu y abnegason ki bu ten dimonstradu na difeza di interesis di nos kumunidadi ki bu ta poi pa riba di tudu y di todus. N sta kunfianti ma bu ta leba-nu a bon portu. Ku bo na lemi nu sta diskansadu y kunfianti na bu monzada. Ma tanbe bo e un omi di kultura: bo e un konpositor y pueta y difensor di identidadi kabuverdiana. Es bu puezia e sinplismenti belu. E un grandi kontributu pa promoson y divulgason di nos lingua. N ta tra nha xapeu y N ta sauda-u kabuverdianamenti.
Un amigu
Pa nha konpatriota ku K grandi, Dr. Agnelo Montrond, mas un parabens pa mas es inisiativa pa prumove nos alma - lingua kabuverdianu sabi doxi!
Pa Sr. Neves: sta fladu, ben fladu, sima ta fladu, rimadu na konbersu sabi, kadensiadu na talaiabaxu, konpasadu na ragas di kola sanjon, na petu di finason i na altar di tudu kes otu nos tantan: nu ka badiu, nen sanpadjudu! Reina pa dividi tene dias kontadu! ANOS E KABUVERDIANUS! Ku K grandi, ragatxadu riba kabesa di alienadus i ajentis di alienason! Uapu, pueta Neves dja kanta dja i vos di pueta e vos di Deus!
Poema di identidadi nacional ki ta fazem sinti um sentimentu di irmandadi y di un uniau forti ti dimas.Um autentiku inu nacional.kanta irmau Neves.Kanta Irmau,ki omi e serteza y hinu e liberdadi.
um abrasu di
Jose A. Lopes
Post a Comment