Povu É Moda Toru; Se Dirijenti É Moda Un Mininu!

Agnelo A. Montrond

Dedicatória:
Ao meu ilustríssimo amigo, S. Exa o Reverendo António Leite, autor da primorosa obra Encontros Memoráveis, cuja leitura é de recomendação obrigatória, que me exortou algumas das palavras que se seguem, numa recente conversa amena no restaurante Sodadi em Brockton, EUA.

“Apokalipsi 4:7 y 4:11
Prumeru limária bibu ta parseba ku un liãu; sugundu, ta parseba ku un toru; tirseru tenba róstu sima di un omi; y kuartu éra sima un águia ta bua. Nhor Diós, Nho é dingu di rasebe ónra, glória y majestadi, pamodi Nho é ki kria tudu kuza, es foi kriadu y es ta izisti pamodi vontadi di-Nho. ”

___________________________________________________________

Povu é moda un toru
Es tudu dôs ten forsa diskizitu
Má ninhun di es ka ten konxsiênsia di ses forsa

//

Kuriozu gó, é ki un kualker mininu podi manobra un toru
Un kualker mininu é kapas di kontrola toru, apezar di tudu forsa ki el ten
Un mininu el só podi leba un toru pa fonti
Un mininu pode marra-l y dismarra-l
Un mininu pode po-l un tornel
Un mininu podi leba-l pa matadoru

//

Má si toru xatia, el pode razolve na nbia se própi donu
Donu di toru sta konstantimenti ta korre risku di rasebe uns txifri a kaulker muméntu

//

Un governanti é kapas di kontrola se povu, apezar di tudu forsa ki el ten
Un pulítiku experienti pode manobra se eleitoradu
Un kandidatu a un kargu pulítiku podi leba povu pa urna
Un governanti pode marra se povu duranti se mandatu y dismarra-l dipos
Un dirijenti di un país pode mobiliza se povu y el manda-l pa gérra

//

Má si povu revolta, el pode razolve na nbia se própi dirijenti
Dirijenti di un povu sta konstantimenti ta korre risku di rasebe uns txifrada di grévi ó manifestason popular di diskontentaméntu, a kaulker muméntu

//

Povu é moda toru
Se dirijenti é moda un mininu
Es tudu dôs ta korre risku …

Agnelo A. Montrond