Régras ki foi prupostu pa es nóvu manera di skrebe purtugês a partir di 2009 é mutu paresidu ku régras di ALUPEC!

Agnelo A. Montrond

A partir di 2009, Purtugal, Kabu Verdi, Brazil y Sãu Tumé y Prínsipi ta kumesa ta skrebe portugês di mesmu manera: skrita di portugês ta ben fika unifikadu.

Akordu Ortográfiku pa unifikason di skrita di portugês foi aprovadu ka dura, y Kabu Verdi aderi a kel akordu, djuntu ku Purtugal, Brazil, y Sãu Tumé y Prínsipi. Kes paízis li ta fika ta skrebe purtugês di mesmu manera.

Enbóra purtuges ki ta papiadu na Sãu Tumé y Prínsipi, Brazil, Kabu Verdi, y Purtugal é ka izatamenti igual, ten un lijeira diferensa ki ka ta intirfiri ku intilijibilidadi, es akordu é un grandi pasu y avansu pa sinplifikason di skrita di purtugês ki ta ben fika ta skrebedu di un só manera, sima é kazu di inglês, spanhol, fransês, ets.

Es é un bon izénplu ki debe sér sigidu na Kabu Verdi, ki na es muéntu stadu na es prusésu y muviméntu pa unifikason di skrita di Kriolu. Situason linguístiku na Kabu Verdi ta pirmiti di fazi un paralelismu y sirbi di es izénplu pa konvense más pesoas ki inda ka da kónta ma kabuverdianus meste apusta na unifikason y sinplifikason di skrita di Kriolu, pur várius razon. Y régras ki foi prupostu pa es nóvu manera di skrebe purtugês é mutu paresidu ku régras di ALUPEC. Só pa sita un izénplu, nalguns kazus, létras mudu sima h, kuazi dja ka ta fika ta uzadu más na purtugês. En ves di herva, ta fika ta skrebedu erva na purtuges.


Tevi txeu rezisténsia a es akordu ortográfiku ki kaba pa triunfa na Purtugal. Nu sta kunfianti y konvensidu ma mesmu kuza ta ben kontisi na Kabu Verdi tanbe. Anton é kada bes ku más koraji y konvikson ki nu ta fla ma ALUPEC Ka Ten Tadju.